Ibuha Anak ni Biri-biri ai do Onom Lak humbani na Pitu ai
1Dob ai huidah ma, ibuha Anak ni biribiri ai ma sada lak humbani na pitu ai. Jadi hubogei ma sada humbani pargoluh na ompat ai marsora songon longgur mangkatahon, “Roh ma!”
2Mangkawah ma ahu, gabe huidah ma sada huda putih. Marsior do na mangajak huda ai, ibere do bani sortali, anjaha misir ma ia songon parmonang laho marhamonangan.
3Jadi dob ibuha lak na paduahon, hubogei ma pargoluh na paduahon mangkatahon, “Roh ma!”
4Jadi luar ma sada huda na legan, gerger songon apuy. Ibere do bani na mangajak huda ai kuasa mambuat damei hun tanoh on, ase marsibunuhan sidea; lanjar ibere do bani sada podang na banggal.
5Sanggah ibuha lak na patoluhon, hubogei ma sora ni pargoluh na patoluhon mangkatahon, “Roh ma!” Jadi huidah ma adong sada huda sibirong, anjaha adong do sada timbangan bani tangan ni na mangajak ai.
6Anjaha hubogei ma sora hun tongah-tongah ni pargoluh na ompat ai mangkatahon, “Satumba boras hargani sadinar, tolu tumba andolei hargani sadinar! Tapi ulang ma parseda minak pakon anggur.”
7Jadi dob ibuha lak na paompatkon, hubogei ma sora ni pargoluh na paompatkon mangkatahon, “Roh ma!”
8Mangkawah ma ahu gabe huidah sada huda silabu; ia goran ni na mangajak huda ai Hamatean do, anjaha nagori toruh do mangihutkonsi. Ibere do bani sidea kuasa bani saparompat ni tanoh on, ase ibunuh marhitei podang, lohei, sampar ampa binatang panoroh na i tanoh on.
9Jadi dob ibuha lak na palimahon, huidah ma i toruh ni anjapanjap ai tonduy ni sagala na sinayat halani hata ni Naibata ampa halani panaksihon ni sidea.
10Marsora na maling do sidea mardilo-dilo, nini ma, “Piga dokah nari do, Ham Tuhan Na Pansing anjaha Na Sintong, ase manguhumi Ham anjaha iluluhon Ham darohnami dompak na marianan i tanoh in?”
11Jadi ibere ma bani sidea hiou putih sada bei, anjaha ihatahon ma bani sidea ase sabar tongkin nari, paima gok bilangan ni juakjuak hasoman ni sidea ampa sanina ni sidea, na laho bunuhon ope songon sidea.
12Jadi huidah ma, sanggah na ibuha lak na paonomkon, masa ma lalou bolon, gabe marbirong ma mata ni ari songon guni horu anjaha ganup bulan ai songon daroh.
13Anjaha bintang na i langit ai mardabuhan ma hu tanoh, songon pardudur ni buah ni hayu ara, sanggah idugur logou na mapor.
14Masab ma langit songon surat ginulung, anjaha sagala pulou pakon dolog mosor humbani iananni hinan.
15Anjaha sagala raja ni tanoh on pakon na sangap-sangap pakon puanglima pakon halak na bayak pakon na markuasa, sagala jabolon ampa halak na mardeka, marponop bei ma sidea hubagas liang pakon batu na i dolog.
16Nini sidea ma bani dolog ampa batu, “Jombai ma hanami anjaha rungkub ma hanami humbani bohi ni na hundul bani paratas in ampa humbani ringis ni Anak ni biribiri in,
17ai domma roh ari ni ringis-Ni na banggal in; anjaha ise ma na boi manahan in?”
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel