Hona Sap Halak na Porsaya
1Dob ai huidah ma ompat malekat jongjong bani na ompat suhi-suhi ni tanoh on, manjolom na ompat logou ni tanoh on, ase ulang mangombus logou hu tanoh, laut ampa haganup hayu.
2Anjaha huidah ma homa sada malekat na legan, naik hun hapoltakan ni mata ni ari, manjolom sap ni Naibata na manggoluh in. Maling do ia mardilo-dilo bani malekat na ompat ai, na dob manjalo kuasa laho mansedahon tanoh pakon laut in,
3nini ma, “Ulang parseda nasiam lobei tanoh pakon laut, age hayu pe, paima isap hanami sagala juakjuak ni Naibatanta bani pardompakanni.”
4Anjaha hubogei do buei ni sagala na dob marsap ai: Saratus ompat puluh ompat ribu humbani haganup marga ni Israel.
5Hun bani marga Juda sapuluh dua ribu na dob marsap, humbani marga Ruben sapuluh dua ribu, humbani marga Gad sapuluh dua ribu,
6humbani marga Aser sapuluh dua ribu, humbani marga Naptali sapuluh dua ribu, humbani marga Manasse sapuluh dua ribu,
7humbani marga Simeon sapuluh dua ribu, humbani marga Lepi sapuluh dua ribu, humbani marga Isasar sapuluh dua ribu,
8humbani marga Sebulon sapuluh dua ribu, humbani marga Josep sapuluh dua ribu, humbani marga Benjamin sapuluh dua ribu, na dob marsap.
Halak na Tinobus humbani Bangsa-bangsa
9Dob salpu ai, huidah ma humpulan na banggal, na so boi bilangan ni atap ise, humbani ganup bangsa, suku, marga, ampa hata jongjong i lobei ni paratas ai pakon i lobei ni Anak ni biribiri ai, marhiouhon hiou putih anjaha manjolom bulung ni palem.
10Maling do sora ni sidea mardilohon, “Bani Naibatanta, na hundul bani paratas in do haluahon, ampa bani Anak ni biribiri in!”
11Anjaha jongjong ma sagala malekat inggot paratas ai ampa ingot sintua ampa pargoluh na ompat ai, anjaha manrogop ma sidea i lobei ni paratas ai marsombah bani Naibata,
12nini ma, “Amen! Puji-pujian pakon hasangapon, hapentaron pakon tarima kasih, hamuliaon pakon hagogohon ampa kuasa ma bani Naibatanta in ronsi sadokah ni dokahni! Amen.”
13Jadi marsahap ma sada humbani sintua ai, nini ma dompak ahu, “Ise do siparhiou putih in, anjaha hunja do in roh?”
14Jadi huhatahon ma dompaksi, “Ham tuanku, ham do mambotohsi.” Jadi nini ma dompak ahu, “In ma na dob roh humbani hamarsikon banggal ai; domma iburihi sidea hiou ni sidea anjaha ipaputih ibagas daroh ni Anak ni biribiri in.
15Halani ai sai i lobei ni paratas ni Naibata do sidea marugas Bani arian pakon borngin ibagas rumahni, anjaha Ia, na hundul bani paratas ai ma, paherbangkon lampolamponi i atas ni sidea.
16Seng be loheian sidea, lang be horahan, lang be hona milas ni ari sidea atap aha na milas pe;
17ai parmahanon ni Anak ni biribiri na i tongah-tongah ni paratas ai do sidea, anjaha arahkononni do sidea hubani bah tubuh hagoluhan, anjaha apusan ni Naibata ma sagala iluh humbani mata ni sidea.”
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel