Doding Tangis-tangis Pasal Raja-raja ni Juda
1Tapi anggo ho, bahen ma sada doding tangis-tangis pasal panrajai i Israel,
2anjaha hatahon ma, “Songon singa boru-boru do inangmu i tongah-tongah ni singa! Manggompang do ia i tongah-tongah ni anak ni singa, laho pabanggal-banggalhon anakni.
3Ipagodang-godang do sada humbani anakni ai, gabe singa ajar-ajar do ai; iguruhon do naha manoroh, ibondut do jolma.
4Isuruh bangsa parbegu ma na manlawansi; hona tangkap ma ia ibagas godung ni sidea, iboan sidea do ia, ihalihiri hu tanoh Masir.
5Dob ididah inangni hiranan ia anjaha seng saud pangarapanni ai, ibuat ma sada humbani anakni na legan, anjaha iajar ma ai gabe singa ajar-ajar.
6Mardalani do ia i tongah-tongah ni singa, gabe singa ajar-ajar do ia; iguruhon do naha manoroh, ibondut do jolma.
7Iparseda do bentengni anjaha iparreong huta-hutani; tarsonggot do nagori ampa pangisini halani sora ni paraumni.
8Roh ma marurup bangsa-bangsa mandorabsi inggot; ipaherbang sidea do puhotni i babouni; hona tangkap do ia ibagas godung ni sidea.
9Ihalihiri do ia, ipamasuk hubagas harang, anjaha iboan hubani raja ni Babel; dob ai ipamasuk ma ia hubagas tutupan, ase ulang tarbogei be sorani i atas ni dolog ni Israel.
10Songon hayu anggur do inangmu ibagas pohon anggur, na sinuan i topi ni bah mardalan; ramos buahni anjaha marrantingi halani buei ni bah.
11Tarpakei do dangkahni bahen tungkot harajaon halani jengesni, manjurjur do ai hu atas i tongah-tongah ni rantingni; taridah do ai humbani na daoh halani gijangni ampa tabunni.
12Tapi hona orbat ma hayu anggur ai ibagas ringis, anjaha igijigkon hu tanoh; melus ma ai ibahen logou hapoltakan, buahni mangkatangtang; ipansuakkon ma dangkahni na dear ai, gabe sipanganon ni apuy.
13Anjaha sonari tarsuan do ai i halimisan bani tanoh dorging-dorging, na so marbah.
14Luar do apuy humbani dangkahni, bois ipangan ranting ampa buahni, gabe seng dong be tading ijai dangkah na jenges, seng dong be tungkot harajaon laho manrajai.” In ma doding tangis-tangis ai, anjaha saud do ai gabe doding tangis-tangis.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel