Igambarhon si Hesekiel Pangkubuon bani Jerusalem
1“Tapi anggo ho, ale anak ni jolma, buat ma bam sada batu tanoh halampung, anjaha patibal ma ai i lobeimu, anjaha uhirhon ma hujai sada huta, ai ma Jerusalem.
2Bahen ma hubuan dompak huta ai, pauli ma manara pangkubu, bahen homa tembok pangkubu dompak huta ai, sonai age tentara pangkubu ampa parugas sirongrong tembok inggot.
3Anjaha buat ma sada bosi bolag, anjaha bahen ma ai gabe tembok bosi, parholanganmu humbani huta ai, dompakkon ma bohimu hu huta ai, sonai ma hona hubu huta ai, anjaha dorab ma ai inggot. On ma gabe tanda bani halak Israel.
4Tapi anggo ho, podomi ma soding sambiloumu, anjaha hunahkon ma bam hajahaton ni Israel. Songon buei ni ari ho tibal ijai, sonai ma dokahni porsanonmu salah ni sidea.
5Hutampeihon do hu bam tahun hajahaton ni sidea, bueini ihira marhitei ari, tolu ratus siah puluh ari; sonai ma dokahni porsanonmu hajahaton ni Israel.
6Anjaha dobkonsi dob ibahen ho sonai, patibal ma use dirimu soding dompak siamun, anjaha porsan ma hajahaton ni halak Juda, ompat puluh ari dokahni, sada tahun ihira gabe sadari siporsanon bam.
7Hubani pangkubuon ni Jerusalem ai ma dompakkon bohimu marhasoman tangan na talag, anjaha manjahai ma ho dompak huta ai.
8Tonggor ma, hunahkon do bam tali, ase ulang boi ho marhusor hu siamun atap hu sambilou, paima idobkon ho ari pangkubuonmai.
9Tapi anggo ho, buat ma bam gandum pakon jagul, kasang pakon dali, bajaurei ampa daua, anjaha nahkon ma ai hubagas sada hudon, anjaha pauli ma ruti hunjai, anjaha ai ma panganonmu sadokah tibal ho soding tolu ratus siah puluh ari dokahni.
10Marsibar do sipanganon na boi panganonmu, ai ma dua puluh sekel sadari; marpanorang do ai panganonmu.
11Bah pe marsuhat do inumonmu, ai ma saparonom hin; marpanorang do ai homa inumonmu.
12Pangan ma ai marrupa ruti jagul; masak ma i lobei ni sidea i atas ni ginagat ni jolma.”
13Anjaha nini Jahowa ma, “Sonai ma butak panganon ni halak Israel rutini i tongah-tongah ni sipajuh begu-begu pambuangan-Ku bani sidea.”
14Jadi ningku ma, “Ham Tuhan Jahowa, tonggor Ham ma, seng ongga hubutaki diringku; humbani haetek-etekonku ronsi sonari seng ongga hupangan na matei-matei atap na sinoroh, anjaha gulei na mabutak seng ongga masuk ai hubagas pamanganku.”
15Jadi nini ma dompak ahu, “Tonggor ma, ginagat ni lombu pe hubere bam gantih ni ginagat ni jolma laho pamasakkon sipanganonmu.”
16Ambah ni ai nini ma dompak ahu, “Ale anak ni jolma, parsedaon-Ku ma parbohalan i Jerusalem; marsibar do panganon ni sidea ruti marhasoman biar; bah pe marsuhat do inumon ni sidea marhasoman gobir.
17Hubahen pe sonai, ase hurangan ruti pakon bah do sidea, anjaha rusak sidea marsikawahan, anjaha mandatei sidea halani hajahaton ni sidea.”
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel