Seng Tarjalo Bangsa Israel Mangihutkon Aturan
1Nini Jahowa, “Porini isirangkon sada halak binuatni, gabe misir naboru ai hun bani, anjaha laho ia bani dalahi na legan, ra ope dalahi ai mangulaki mambuatsi? Ai lang gabe butak tumang ma nagori ai? Tapi anggo ho domma marbangkis pakon buei halak, ai sihol ope mulak ho hu Bangku?” Nini Jahowa.
2“Mangkawah ma ho dompak sagala buntu-buntu, anjaha tonggor ma! Ija ho na so ongga marbangkis? I topi ni dalan do ho hundul paima-imahon sidea, songon pambahen ni halak Arab i halimisan. Ibutaki ho do tanoh in marhitei parriah-riahonmu ampa hajahatonmu.
3Halani ai do ase tarambat paroh ni udan pamungkah anjaha tartahan udan pangujungi, tapi songon pardompakan ni boru jalang do pardompakanmu, seng ibotoh ho na maila.
4Ai lang dilo-dilo do ho ronsi sonari hu Bangku, ʻAle Bapa, Ham do hatengeran ni uhur bani haposoonku?ʼ
5Ai mintor ra ma Ia manringis lalab? Mintor idingat-dingat ma ai lalab? Tonggor ma, sonai do parsahapmu, tapi ihorjahon ho do na masambor, pala marolom-olom ho.”
Age pe Sonai Parbalikon ni Israel Itampin Naibata do Sidea
6Jadi nini Jahowa ma dompak ahu sanggah panorang ni Raja Josia, “ididah ho do pambahen ni Israel na marbalik in? Laho ia hu atas ni ganup dolog na gijang ampa hu toruh ni ganup hayu na maratah, laho mandalankon parbangkison ijai.
7Nini uhur-Hu, ʻDob idalankon ganupan ai, tontu mulak do ia Bangku; tapi seng mulak ia.ʼ Anjaha age pe ididah Juda, anggini na marbalik ai,
8sonaha pangambukkonon-Ku bani Israel na mangosei ai halani haganup parbangkisonni, anjaha Hubere bani surat sirang, tapi seng mabiar Juda, anggini na marbalik ai, laho do ia homa mandalankon parbangkison.
9Marhitei parriah-riahonni na so maralang-alang ai, gabe butak do ibahen nagori in; marbangkis do ia rap pakon batu ampa hayu.
10Tapi sonai pe ganupan ai, lanjar do seng mulak hu Bangku Juda, anggini siparbalik ai humbani bulat ni uhurni; tapi marsipakulah-kulah do hansa,” nini Jahowa.
11Jadi nini Jahowa ma hu bangku, “Pintoran ope Israel na marbalik ai marimbang Juda sipangosei in.
12Laho ne, anjaha tingtingkon ma hata on dompak utara, ʻMulak ma ho, ale Israel na marbalik in,ʼ” nini Jahowa. “Lang pe manringis Ahu mangidah hanima, ai paridop ni uhur do Ahu,” nini Jahowa; “Seng torus Ahu manggila.
13Asal itanda ho salahmu, paboa na manlawan ho dompak Jahowa Naibatamu, ai ma na niondoskonmai dirimu bani na legan i toruh ni ganup hayu na maratah, tapi anggo hatang-Ku seng itangihon ho,” nini Jahowa.
14“Mulak ma, ale anak na marbalik,” nini Jahowa, “Ai Ahu do tuannima; sihol buaton-Ku do humbennima, sahalak humbani sada huta anjaha dua halak humbani sada marga, anjaha boanon-Ku do hanima hu Sion.
15Anjaha bereon-Ku do bannima parmahan romban hubani rosuh ni uhur-Hu, ai ma na marmahan hanima marhitei habotohon ampa hauhuran.
16Anjaha anggo martambah anjaha manggargar ma hanima i nagori in,” nini Jahowa. “Bani ari ai seng be sahapkonon ni halak pasal poti parpadanan ni Jahowa, seng be taringat ai ibagas uhur, atap ingat-ingaton ai, seng be magouan pasal ai barang paulion ai.
17Bani panorang ai goranon ma Jerusalem paratas ni Jahowa, anjaha martumpu hujai sagala bangsa sipajuh begu-begu, marsombah hubani goran ni Jahowa i Jerusalem; seng be ihutkonon ni sidea uhurni na tendel anjaha na jahat in.
18Bani panorang ai ipadomu ginompar ni Juda ma dirini bani ginompar ni Israel, anjaha rap sidea mulak hun utara hun tanoh, na dob Hubere gabe parbagianan ni ompungnima.
19Nini uhur-Hu, ʻSonaha ma parpabangkit-Hu bam i tongah-tongah ni anak-Ku, anjaha mamberehon bam tanoh na majenges, parbagianan sijengesan i tongah-tongah ni bangsa-bangsa?ʼ Anjaha nini uhur-Hu, hatahononmu do hu Bangku, ʻAle Bapaʼ anjaha seng marbalik ho hun Bangku
20tongon, songon puang-puang na so bujur manadingkon paramangonni, sonai do hanima manadingkon Ahu, ale ginompar ni Israel,” nini Jahowa.
Hamubahon ni Uhur na Sintong do Mambahen Saud Bagah-bagah ni Jahowa
21Tarbogei do sora bani ianan na gijang, ai ma sora tangis-tangis ampa elek-elek ni ginompar ni Israel, halani sambor ni parlahou ni sidea, anjaha lupa sidea bani Jahowa Naibata ni sidea.
22“Mulak ma, ale anak siparbalik, sihol pamalumon-Ku do panundalionnima in. Tonggor ma, roh do hanami mangayaki Ham, ai ham do Jahowa Naibatanami.
23Tongon, sipaoto-oto do pangarapan bani buntu-buntu ampa bani halutuon i atas dolog. Tongon, bani Jahowa Naibatanta do hansa haluahon ni Israel.
24Tapi pambalosion bani sihagigihononkon ai do mamboiskon na hinalojahon ni ompungta humbani etek-etekkon nari, biribiri ni sidea ampa lombuni, anak ni sidea ampa boruni.
25Tibal do hita ibagas habadoronta anjaha sabing banta hahirion, halani mardousa hita dompak Jahowa Naibatanta, hita pakon ompungta humbani hadakdanakonta das ronsi sadari on; anjaha seng itangihon hita sora ni Jahowa Naibatanta in.”
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel