Gulungan Panuratan na Tinutung ni Raja Joyakim
1Paompat-tahunkon, dob raja si Joyakim, anak ni si Josia, raja ni Juda, roh ma hata on hubani si Jeremia humbani Jahowa,
2“Buat ma sada gulungan panuratan, suratkon ma hujai haganup hata na dob Hutonahkon hubam pasal Israel pakon pasal Juda ampa pasal haganup bangsa-bangsa, mulai humbani ari Huparsahapkon ho, humbani panorang ni si Josia nari das hubani sadari on.
3Andohar ra ginompar ni Juda manangihon pasal haganup hamagouan, na dob Husurahon sibahenon-Ku bani sidea, ase andohar ganup sidea mulak humbani dalanni na jahat in, gabe marpamuati uhur-Hu mangidah hajahaton ni sidea, ampa mangidah dousa ni sidea.”
4Jadi idilo si Jeremia ma si Baruk anak ni si Neriya, gabe isuratkon si Baruk ma bani gulungan panuratan ai, domu hubani na niluarhon ni si Jeremia hata ni Jahowa, na hinatahon-Ni hu bani.
5Jadi ihatahon si Jeremia ma hubani si Baruk, “Hona larang do ahu masuk hu rumah ni Jahowa.
6Halani ai ho ma laho hujai, anjaha sanggah ari puasa, i lobei ni bangsa ai, i rumah ni Jahowa, basa ma hata ni Jahowa na bani gulungan panuratan ai, na sinuratkonmu domu hubani na huhatahon bam. Maningon basaonmu do homa ai ibogei haganup halak Juda, na marrohan hun hutani bei.
7Andohar ra sidea marrogop i lobei ni Jahowa padaskon elek-elek ni sidea, anjaha ganup sidea ra mulak humbani dalanni na jahat in, ai banggal tumang do ringis ampa gila, na nilumbahon ni Jahowa bani bangsa on.”
8Jadi ibahen si Baruk, anak ni si Neriya ma haganup, songon na tinonahkon ni Nabi Jeremia hu bani, ai ma pasal na mambasa hata ni Jahowa humbani gulungan panuratan ai ibagas, rumah ni Jahowa.
9Dob ai palima-tahunkon dob raja si Joyakim, anak ni si Josia, raja ni Juda, bani bulan siah, itingtingkon ma ari parpuasaon i lobei ni Jahowa hubani haganup bangsa na i Jerusalem ampa hubani haganup halak na roh hun huta-huta ni Juda hu Jerusalem.
10Jadi ibasa si Baruk ma i lobei ni haganup bangsa ai hata ni si Jeremia humbani gulungan panuratan ai ibagas rumah ni Jahowa, ibagas kamar ni si Gemarya, anak ni si Sapan, jurutulis ai, ai ma i alaman parhuluan bani dalan masuk hu horbangan baru, na bani rumah ni Jahowa.
11Jadi dob ibogei si Mikaya, anak ni si Gemarya, anak ni si Sapan haganup hata ni Jahowa na humbani buku ai,
12turun ma ia hu rumah ni raja ai, laho hu kamar ni jurutulis ai; marrapot do ijai haganup kopala-kopala: Si Elisama jurutulis ai, si Delaya anak ni si Semaya, si Elnatan anak ni si Akbor, si Gemarya anak ni si Sapan, si Sedekia anak ni si Hananya ampa kopala-kopala na legan.
13Jadi ibaritahon si Mikaya ma bani sidea haganup hata na binogeini ai, sanggah na ibasa si Baruk buku ai i lobei ni bangsa ai.
14Jadi isuruh haganup kopala-kopala ai ma si Jehudi, anak ni si Netanya, anak ni si Selemya, anak ni si Kusi marayak si Baruk, laho mangkatahon, “Boan ma gulungan na binasamai i lobei ni na mabuei in, anjaha eta ma.” Jadi iboan si Baruk, anak ni si Neriya ma gulungan ai, laho ma ia marayak sidea.
15Nini sidea ma hu bani, “Hundul ma ho, anjaha basa ma in!” Jadi ibasa si Baruk ma ai bani sidea.
16Jadi dob ibogei sidea haganup hata ai, marsikawahan ma sidea halani tarsonggot; nini sidea ma hubani si Baruk, “Maningon patugahonnami do haganup hata on bani rajanta.
17Lanjar isungkun sidea ma si Baruk, ʻPatugah ma bennami, sonaha do panuratkonmu bani ganup hata on?ʼ
18Balos ni si Baruk bani sidea, ʻSi Jeremia do mangkatahon ganup hata ai bangku, sanggah na husuratkon ai bani buku on marhitei tinta.ʼ
19Dob ai nini kopala-kopala ai ma bani si Baruk, ʻLaho anjaha marponop ma ho pakon si Jeremia, anjaha ulang ma adong na mambotoh atap ija hanima.ʼ”
20Jadi masuk ma sidea hu alaman ni istana ai laho marayak raja ai, dob isimpan buku ai i kamar ni si Elisama, jurutulis ai, ipatugah sidea ma ganup hata ai bani raja ai.
21Dob ai isuruh raja ai ma si Jehudi mangalop buku ai, anjaha ialop ma ai hun kamar ni si Elisama, jurutulis ai; ibasa si Jehudi ma ai ibogei raja ai ampa ganup kopala-kopala ai, na jongjong i lambung ni raja ai.
22Bulan siah ma ai, gabe hundul do raja ai i rumah musim borgoh Ni; gara do apuy ibagas pandadangan i lobei ni.
23Siapkonsi ibasa si Jehudi tolu atap ompat kolom mintor irotap raja ai ma ai bani pisou penani, lanjar igijigkon hubagas apuy pandadangan ai, ronsi bois haganup gulungan panuratan ai ipangan apuy na i pandadangan ai.
24Tapi ise pe lang dong na tarsonggot atap na marrigati pakeianni, age raja ai ampa haganup juakjuakni, na manangar ganup hata ai.
25Age pe ielek-elek si Elnatan, si Delaya ampa si Gemarya raja ai, ase ulang namin itutung buku ai, tapi seng itangihon sidea.
26Iparentahkon raja ai do Jerahmeel, anak ni raja ai, ampa si Seraya anak ni si Asriel, ampa si Selemya anak ni si Abdeel, laho manangkap si Baruk jurutulis ai pakon Nabi Jeremia, tapi domma iponopkon Jahowa sidea.
27Dob ai roh ma use hata ni Jahowa bani si Jeremia, dob bois itutungi raja ai gulungan panuratan ai na marisi hata na sinuratkon ni si Baruk ai, domu hubani na hinatahon ni si Jeremia bani.
28Buat ma gulungan na legan, anjaha suratkon ma hujai haganup hata ondi, na bani gulungan na parlobei ondi, ai ma na dob itutungi si Joyakim raja ni Juda.
29Anjaha pasal si Joyakim raja ni Juda hatahon ma, “Sonon do hata ni Jahowa, ʻItutung ho do gulungan ai, nim: Mase ma isuratkon do ijai, paboa na maningon roh do raja ni Babel laho parsedahon tanoh on, ampa laho mamboiskon jolma ampa pinahan?ʼ
30Halani ai sonon do hata ni Jahowa pasal si Joyakim, raja ni Juda, ʻSeng dong be ginomparni na hundul bani paratas ni si Daud, anjaha maningon sampakkononkon do bangkeini hu darat, milasan arian, borgohan bodari.ʼ
31Anjaha marlulu do Ahu bani pakon bani ginomparni ampa bani juakjuakni halani hajahaton ni sidea; anjaha pasogopon-Ku do bani sidea, bani pangisi ni Jerusalem ampa bani halak Juda haganup hamagouan, na dob Hulumbahon hinan bani sidea, tapi seng ra sidea manangihon.”
32Dob ai ibuat si Jeremia ma sada gulungan na legan, iberehon ma bani si Baruk, anak ni si Neriya, jurutulis ai; isuratkon ma hujai, domu hubani na hinatahon ni si Jeremia, haganup hata ni buku ondi, na dob tinutung ni si Joyakim, raja ni Juda ibagas apuy; buei ope hata na domu hujai itambahkon hujai.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel