1“Anggo sihol mulak ho, ale Israel,” nini Jahowa, “Hu Bangku ma ho mulak! Anjaha anggo iambukkon ho sihagigihononmai seng anjai mompas-ompas be ho hun Bangku.
2Anjaha anggo ibijahon ho, “Songon sintongni manggoluh Jahowa, ibagas hasintongan, habonaron ampa hapintoron, jadi parhatuahon ni bangsa sipajuh begu-begu ma dirini ibagas ho, anjaha puji-pujionni ho.”
3Sonon do hata ni Jahowa hubani halak na i Juda ampa pangisi ni Jerusalem, “Tinggala hanima ma juma roba bannima, ulang martidah i tongah-tongah ni hupi-hupi.
4Sunat hanima ma dirinima bani Jahowa, ambukkon hanima ma sibur-sibur ni uhurnima, ale dalahi na i Juda ampa pangisi ni Jerusalem, ase ulang manomboh ringis-Ku songon apuy, anjaha gajag seng dong na mangasup mangintopi, halani hajahaton ni pambahenannima.”
Munsuh hun Utara na Roh Parsedahon
5“Baritahon hanima ma i Juda anjaha pabogeihon i Jerusalem, hatahon hanima ma, ʻSompul ma tarompit i nagori in, gogoh ma mardilo-dilo, hatahon ma: Martumpu ma, laho ma hita masuk hu huta na pinatoguh in!
6Pajongjong ma mandera partanda dompak Sion! Maporus ma, ulang sohsoh! Ai parohon-Ku ma hamagouan hun utara, sada hasedaon banggal.
7Mandarat do singa humbani iananni, bingkat do siparseda bangsa-bangsa; luar do ia humbani iananni laho parsedahon tanohmu; mangkareong ma hutamu, seng marpangisi be.
8Halani ai marhiou guni ma hanima, tangis anjaha doruh-doruh ma, ai seng surut hun banta gara ni ringis ni Jahowa.
9Bani panorang ai,” nini Jahowa, galek ma uhur ni raja-raja ampa na sangap-sangap, tarsonggot sagala malim anjaha hirjat sagala nabi.
10Jadi nini sidea ma, “Ham Tuhan Jahowa, taroto tumang do bangsa on ampa par Jerusalem, ibahen Ham, nimu, ʻMarsonang-sonang pe hanima, hape podang do na mangonai bani goluhnami.ʼ
11Bani panorang ai hatahonon ma bani bangsa on ampa bani Jerusalem, ʻLogou na milas hun buntu-buntu na leseng i halimisan mangombus dompak boru ni bangsang-Ku, sedo laho marsege atap mamiari, logou na doras tumang,
12anjaha Ahu do na mamarentahkon ai, laho manguhumi sidea.
13Tonggor ma, songon hombun do ia naik, songon halisungsung do garetani; dorasan do hudani ase lali. Magou ma hita, ai bois ma hita!
14Burihi ma uhurmu humbani hajahaton, ale Jerusalem, ase maluah ho. Piga dokah nari marianan pingkiranmu, na jahat in ibagas uhurmu?
15Tangar, roh do tugah-tugah hun Dan ampa barita na masambor hun Dolog Efraim!
16Patugah ma bani Juda, tingtingkon bani Jerusalem. Roh do sipangkubu hun nagori na madaoh, marsurak do sidea mangimbang huta ni Juda.
17Songon pamurou do sidea manginggoti Jerusalem, halani manlawan ia dompak Ahu,” nini Jahowa.
18“Parlahoumu ampa pambahenanmu do parohkon ai bam. Halani hajahatonmu do ase sonai paetni, tongon, ronsi pusu-pusumu do itolpus.
19Aih, boritni in, boritni in huahap! Itusuk do atei-ateihu! Mardojob-dojob do pusu-pusungku, seng tarbahen ahu sip, ai hubogei do sora ni tarompit ampa surak-surak ni siparporang.
20Marnunut do hataluan itingtingkon, maseda do ganup tanoh in, sompong do lampolampong-Ku ipareong, tongkin tumang anggo barung-barung-Ku.
21Piga dokah nari idahon-Ku mandera porang in, anjaha bogeion-Ku sora ni tarompit?
22Tongon, na oto do bangsang-Ku, seng itandai sidea Ahu, anak na lontong do sidea, seng dong maruhur; pandei do sidea mangkorjahon hajahaton, tapi sonaha mambahen na madear, seng ibotoh sidea.
23Mangkawah Ahu dompak tanoh in, tonggor, domma maseda anjaha lumei; Hutarei langit, magou do haliharonni.
24Mangkawah Ahu dompak dolog-dolog, tonggor ma, dugur do sidea; anjaha buntu-buntu mambal-ambal hujai-hujon.
25Mangkawah Ahu inggot, tonggor ma, seng dong jolma, anjaha manuk-manuk pe domma habur ganupan.
26Mangkawah Ahu, tonggor ma, tanoh na lambutan salih jadi halimisan, anjaha sagala hutani domma mareong i lobei ni Jahowa, halani gajag ni ringis-Ni.
27Ai sonon do hata ni Jahowa, ʻHaganup tanoh in maningon tarulang do; tapi seng lanjar bois bahenon-Ku.
28Halani ai marhoru ma tanoh in, anjaha langit na i babou ai golap; ai Ahu do na mangkatahon in, seng Husolsoli uhur-Hu; Ahu do na mamutuskon, seng marulak-ulakan uhur-Hu.ʼ
29Maporus do sagala huta halani sora ni parhuta ampa parpamah; marmasukan sidea hu harangan, manangkihi hu salahsah; sagala huta hona tadingkon, seng dong halak na mangiankonsi.
30Ho, ale na dob tinaluhon, aha do na binahenmin. ase marbaju saholat ho, ase mamakei ugas-ugas omas ho, ase iminak-minaki ho matamu? Soya-soya do na pinajengesmai dirimu. Magigi do kasihanmu mangidah ho; hosahmu do sihol buatonni.
31Tongon hubogei do songon sora ni naboru na mangarou, usih bani doruh-doruh ni naboru laho mantubuhkon bunga tubuhni, ai ma sora ni boru Sion na hosah-hosah pagostong tanganni, nini, ʻMagou ma ahu, ai ondos bani sipamunuh do tonduyhu!ʼ”
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel