Parseda ni Jerusalem ampa Pambuangan na hu Babel
1Marumur dua puluh sada tahun do si Sedekia, sanggah bangkit ia gabe raja, anjaha sapuluh sada tahun do ia mamarentah i Jerusalem. Goran ni inangni, ai ma si Hamutal, boru ni si Jeremia, na hun Libna.
2Ihorjahon do sogam ni uhur ni Jahowa, usih songon na binahen ni si Joyakim.
3Ai halani ringis ni Jahowa do ase masa sonai hu Jerusalem ampa hu Juda, gabe iusir sidea hun lobei ni bohi-Ni. Dob ai marbalik ma Raja Sedekia mangimbang Raja Babel.
4Anjaha pasiah-tahunkon dob raja ia, bani bulan sapuluh, ari sapuluh roh ma si Nebukadnesar, raja ni Babel, rap pakon ganup tentarani mandorab Jerusalem; ihubu sidea ma huta ai, anjaha ibahen batar-batar inggot.
5Jadi tarhubu ma huta ai das ronsi pasapuluhsada-tahunkon, dob raja si Sedekia.
6Paompatbulankon ari siah, masa ma lohei maningting i huta ai, seng dong be sipanganon bani bangsa parnagori ai.
7Dob ai ibuha ma sada dalan halopusan ibagas tembok ni huta ai; maporus ma raja ai ampa haganup siparmunsuh borngin-borngin hun horbangan, na i holangkolang ni tembok na dua ai, na dohor bani pohon ni raja ai; tapi ihubu halak Kasdim do huta ai inggot. Laho ma sidea dompak Arabah.
8Tapi iayak tentara ni halak Kasdim ma raja ai, jadi dapot ma si Sedekia i pamah ni Jeriko, anjaha ganup tentarani ai merap ma hun lambungni.
9Itangkap sidea ma raja ai anjaha iboan ma ia tangkog mangadap raja ni Babel hu Ribla, na i tanoh Hamat, lanjar idabuh ma uhum bani.
10Ibunuh raja ni Babel ma anak ni si Sedekia i lobei ni matani, anjaha ibunuh do homa haganup kopala-kopala ni Juda i Ribla.
11Ipadarat do mata ni si Sedekia haduasi anjaha irantei ma ia bani rantei tombaga, anjaha iboan raja ni Babel ma ia hu Babel, lanjar inahkon hubagas tutupan ronsi ari parmateini.
12Bani bulan lima, ari sapuluh, ai ma pasapuluhsiah-tahunkon dob raja si Nebukadnesar, raja ni Babel, roh ma hu Jerusalem si Nebusaradan, kopala ni papanriah-riah parriah-riahngawal, siparugas i lobei ni raja ni Babel.
13Itutung ma rumah ni Jahowa, rumah ni raja ai ampa haganup rumah-rumah na i Jerusalem; itutung do haganup rumah na banggal-banggal.
14Iparseda haganup tentara ni halak Kasdim, hasoman ni kopala ni pangawal ai ma haganup tembok ai, inggot Jerusalem.
15Deba humbani halak na masombuh ni bangsa ai ampa teba-teba ni bangsa ai, na tading ibagas huta ai ampa na marbalik hu bani raja ni Babel ampa halak na tading humbani tuhang, iboan si Nebusaradan, kopala ni pangawal ai do hu habuangan.
16Tapi deba humbani halak sisombuhan i nagori ai, itadingkon si Nebusaradan, kopala ni pangawal do, laho mangkorjai pohon anggur pakon juma.
17Ia tiang tombaga, na bani rumah ni Jahowa pakon sagala onjolan ampa bongbongan tombaga, na i rumah ni Jahowa iparseda halak Kasdim do, anjaha tombaga ai iboan do ganup hu Babel.
18Ibuat sidea do hudon, sonduk, raot, batil ampa haganup parugas tombaga, na pinakei marugas i rumah panumbahan;
19sonai homa sagala mangkuk, balanga parapuyan, mangkuk pamispisan, hudon, parsuluhan, batil ampa sambung, haganup na humbani omas ampa na humbani pirak, ibuat kopala ni pangawal ai do.
20Tiang na dua ai, bongbongan na sada ai ampa na sapuluh dua lombu tombaga, na i toruh ni bongbongan tombaga ai, ampa onjolan ai, na pinauli ni Raja Salomo bani rumah ni Jahowa, sabonar na so tartimbang do buei ni tombaga ni ganup parugas ai.
21Sapuluh ualuh asta do gijang ni sada tiang, anjaha lilitni sapuluh dua asta, hapalni ompat jari anjaha marruang do ai.
22I atas tiang ai adong do uluni humbani tombaga; lima asta do gijangni. Adong do jala-jala ampa buah ni dalima inggot ulu ni tiang ai, haganup humbani tombaga; usih do hujai tiang na paduahon ai, ampa buah dalimani.
23Siah puluh onom kamata do buei ni buah dalima ai margantungan. Haganup saratus kamata do buah ni dalima, ai ma na bani jala-jala ai inggot.
24Anjaha iboan kopala ni pangawal ai do si Seraya, sintua ni malim ai, ampa si Sepanya, malim paidua ai, ampa sijaga labah sitolu halak ai.
25Anjaha iboan do homa hun huta ai sada siparpangkat, ai ma na mangopalai halak siparmunsuh ampa pitu halak hasoman sapanriah ni raja ai, na jumpah ibagas huta ai, ampa jurutulis ni kopala ni tentara ai, na marhara parnagori ai jadi tentara, ambahni ai onom puluh halak humbani bangsa parnagori ai, na jumpah ibagas huta ai.
26Iboan si Nebusaradan, kopala ni pangawal ai ma sidea hu Ribla, hu lobei ni raja ni Babel.
27Ihatahon raja ni Babel ma sidea bogbogan matei i Ribla, i tanoh Hamat. Sonai ma parbuang ni Juda hun tanohni.
28In ma buei ni bilangan ni bangsa, na binoan ni si Nebukadnesar hu habuangan: Bani pasapuluhpitu-tahunkon tolu ribu dua puluh tolu halak bangsa Juda.
29pasapuluhualuh-tahunkon dob raja si Nebukadnesar, iboan do hun Jerusalem ualuh ratus tolu puluh dua halak;
30dua puluh tolu tahun dob raja si Nebukadnesar, ibuang si Nebusaradan, kopala ni pangawal ai do pitu ratus ompat puluh lima halak Juda; tumpu haganup: ompat ribu onom ratus halak.
31Tapi patolupuluhpitu-tahunkon dob tarbuang si Joyakin, raja ni Juda, ari dua puluh lima bulan sapuluh dua, iidopi si Ewil-Merodak, raja ni Babel ma si Joyakin, raja ni Juda; bani tahun parlobei dob raja ia ipadarat ma ia hun tutupan.
32Basar do ia marsahap pakonsi, anjaha gijangan do ibahen hundulanni marimbang raja-raja na rap pakonsi i Babel.
33Bulih do ia mananggali pakeian tutupanni ai, anjaha sapanganan do ia tongtong rap pakon raja ai, sadokah manggoluh ia.
34Anjaha siap arian do ibere Raja Babel bani bohalni, songon na dob tinotapkon bani, barang sadiha na porlu bani, sadokah manggoluh ia das hubani na rotap hosahni.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel