Alkitab Mobile SABDA
[VER] : [SIMALUNGUN]     [PL]  [PB] 
 <<  Yesaya 26 >> 

Doding Mangkamalaskon Huta na Niadongkon ni Naibata

1Bani ari ai dodingkononkon ma doding on i tanoh Juda: Dong do huta na toguh banta, haluahon do ibahen songon tembokni ampa batar-batarni.

2Buhai nasiam ma horbangan, ase bongkot bangsa parpintor, na manjolom habujuron.

3Ipatotap Ham do damei bani uhur na marramotkon damei, tongon Bamu do ai marhatengeran.

4Martenger ni uhur ma nasiam tongtong bani Jahowa, dolog batu sisadokah ni dokahni do Tuhan Jahowa.

5Tongon, ipatoruh do na marianan bani na gijang, bani huta na tinggi. Iondun do ai, iondun hu tanoh, isampakkon hubagas orbuk.

6Dogei-dogeion ni nahei ma ai, nahei ni halak na madorun, langkah-langkah ni halak na masombuh.

Panramotion ni Naibata bani Bangsa-Ni ibagas Uhum na Mangonai Tanoh on

7Pintor do dalan ni halak parpintor, hornop do ibahen Ham dalan ni halak parpintor.

8Age bani panguhumion-Mu, ale Jahowa, Ham do iarapkon hanami, goran-Mu ampa pardingat Bamu do na hinasiholhon ni tonduynami.

9Siholan do tonduyhu Bamu borngin, tonduyhu pe ibagas ahu Ham do tongon ipindahi. Ai anggo ihonai uhum-Mu tanoh on, mintor mangguruhon hapintoron do pangisi ni dunia on.

10Jumpahan idop ni uhur pe halak parjahat, seng iguruhon hapintoron, i tanoh ni halak parpintor pe mambahen hajahaton do ia, seng ididah uhurni hatunggungon ni Jahowa.

11Ham Jahowa, timbul do tangan-Mu, tapi seng ididah sidea in; idahon ni sidea ma ai gabe tarbador; pongut ni uhur bani bangsa-Mu ampa apuy sipangan imbang-Mu do mamboiskon sidea.

12Ale Jahowa, Ham do sibere damei bennami, ai Ham do na mambahen saud sagala pambahenannami.

13Ham Jahowa Naibatanami, ongga do irajai tuan-tuan, legan ni Ham hanami, tapi Ham tumang, goran-Mu do idingat hanami.

14Na matei, seng mulak manggoluh, halinoh seng mulak puho; halani ai do ase marlulu Ham laho mamboiskon sidea, anjaha isasap Ham do ganup pardingatan bani sidea.

15Itambahi Ham do bangsa in, Ham Jahowa, itambahi Ham do bangsa in; ipatimbul Ham do diri-Mu; ipabolag Ham do parbalogan ni tanoh in.

16Ham Jahowa, ipindahi sidea do Ham sanggah tarsosak; doruh-doruh do sidea sanggah mangonai ajar-Mu bani sidea.

17Songon naboru na boratan rumah, na dohor sihol mantubuhkon tuah, na mandodoruh halani mangarou, sonai do hanami halani Ham, ale Jahowa.

18Boratan rumah do hanami, mangarou do hanami, doskon na mantubuhkon logou do hanami. Haluahon seng tarparoh hanami bani nagori in, anjaha seng dong tubuh siiankon tanoh on.

19Manggoluh do use na matei-Mu, puho do use bangkei ni sidea. Puho ma anjaha marolob-olob ma, nasiam na marianan ibagas orbuk. Ai namur haliharon do namur-Mu, anjaha padaraton ni tanoh in do use na matei.

20Roh ma, ale bangsangku, masuki ma kamarmu, tutup ma labah i pudimu, ponopkon ma dirimu tongkin paima lopus ringis in.

21Ai tonggor ma, luar do Jahowa humbani ianan-Ni, laho manluluhon salah ni halak na mangiankon tanoh on, anjaha patidakkon ni tanoh in ma daroh na madurus bani, anjaha seng rungkubonni na matei tarbunuh i atas ni.



 <<  Yesaya 26 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel