Naborit ni Raja Hiskia, Parmalumni ampa Hata Puji-pujianni
1Bani panorang ai boritan ma si Hiskia, narus-narus matei. Jadi roh ma Nabi Jesaya, anak ni si Amos marayaksi, nini ma dompaksi, “Sonon do hata ni Jahowa, ʻPatorsa ma rumahmu, ai matei ma ho, seng manggoluh be.ʼ
2Jadi ipahusor si Hiskia ma bohini dompak dingding, martonggo bani Jahowa;
3nini ma, ʻHam Jahowa, ingat Ham ma naha ahu marpangabak i lobei-Mu ibagas hasintongan, ibagas bulat ni uhur, anjaha hudalankon do aha na madear i lobei ni bohi-Mu.ʼ Anjaha gogoh-gogoh do tangis si Hiskia.
4Dob ai roh ma hata ni Jahowa bani si Jesaya, sonon,
5ʻLaho ma ho anjaha hatahon ma bani si Hiskia: Sonon do hata ni Jahowa, Naibata ni si Daud, ompungmu: Domma Hutangihon tonggomu, domma Huidah iluhmu, tonggor ma, tambahkonon-Ku ma umurmu sapuluh lima tahun nari.
6Paluahon-Ku ma ho pakon huta on humbagas tangan ni Raja Assur, anjaha ondingan-Ku do huta on.
7Anjaha on do tanda humbani Jahowa bamu, paboa pasaudon ni Jahowa do hata na hinatahon-Ni ai.
8Tonggor ma, paulakon-Ku ma dompak pudi sapuluh garis halinoh ni mata ni ari na bani jam ni si Ahas ai.” Jadi mulak ma tongon sapuluh garis dompak pudi halinoh ni mata ni ari na dob turun ai.
9Surat ni si Hiskia, raja ni Juda, sanggah boritan ia anjaha malum ia use humbani naboritni ai,
10“Ningku do, bani parsitongahan ni ari-aringku do ahu misir. Bani horbangan ni nagori toruh do ahu iondoskon. Ibuati do ari-ari ni goluhku.
11Ningku do, ʻSeng be idahonku Jahowa bani tanoh ni halak na manggoluh, seng be idahonku jolma i tongah-tongah ni na mangiankon dunia on.ʼ
12Irumbakkon do barung-barungku, ibuat humbangku songon lampolampo ni parmahan; songon partonun, sonai do ibalun goluhku, irotap do ahu humbani tali-Ni. Arian pakon borngin sai ipaturut Ham do ahu. Doruh-doruh do ahu ronsi sogod,
13songon singa do Ia mamparponggol holi-holingku, arian pakon borngin do ipadob Ham ahu.
14Songon manuk-manuk layang-layang do ahu marditit-ditit, marduhur-duhur songon asas. Loja do matangku mangkawah dompak babou. Ham Jahowa, hona odoh-odoh do ahu, Ham ma pangondingi bangku.
15Aha ma hatahononku? Ai domma isahapkon ai bangku, anjaha ai do ipasaud. Maporus do humbangku sura sihol modom, halani pusok ni uhurhu.
16Ham Jahowa, maronjolan hujai do goluh ni jolma, anjaha ibagas ai do goluh ni tonduyhu, sai pajorgit Ham ma ahu, anjaha pagoluh Ham ma ahu.
17Tonggor ma, gabe hatuahon do bangku paet ni pangahapanku; anjaha Ham do na marramotkon tonduyhu humbani godung hamagouan, ai isampakkon Ham do ganup dousaku hu pudi-Mu.
18Ai pe seng tarpuji nagori toruh Ham, seng tarpasangap hamatean: anjaha sagala na dob manuruk tanoman seng tarbahen mangarap bani hasintongan-Mu.
19Halak na manggoluh, do mamuji Ham songon na hubahen sadari on. Bapa hubani anakni patugahkon hasintongan-Mu.
20Jahowa do sipaluah bangku, halani ai marhusapi ma hita mamuji-muji sadokah goluhta i rumah ni Jahowa.
21Dob ai nini si Jesaya ma, ʻBoan ma hujon buah ara na hinarei, lapuhon ma ai bani bayoh ai, ase malum ai.ʼ
22Anjaha nini si Hiskia ma, ʻAha ma tanda paboa na tangkog ma ahu hu rumah ni Jahowa?ʼ”
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel