Ambilan Na Madear Pasal Hatuahon na Sihol Roh
1Tonduy ni Tuhan Jahowa do na sogop bangku, ai domma iminaki Jahowa ahu, laho mangambilankon Ambilan Na Madear bani halak na madoyuk; isuruh do ahu pauli-ulihon halak paruhur na maropuk, maningtingkon haluahon bani halak na tartutup, ampa parharhar ni gari bani halak na tarsangkut;
2laho maningtingkon tahun idop ni uhur humbani Jahowa, ampa ari pambalason ni Naibatanta; laho mangapoh sagala na marpusok ni uhur i Sion,
3mamberehon bani sidea sortali gantih ni abuan, minak malas ni uhur gantih ni hiou pusok ni uhur, doding puji-pujian gantih ni tonduy na horu, ase targoran sidea hayu hapintoron, na sinuan ni Jahowa, bahen puji-pujian Bani.
4Paulion do na dob pinarseda; pabayuon ni sidea do huta-huta na dob mareong, na dob tarulang marsundut-sundut.
5Halak na legan do jongjong-jongjong marmahani hulanannima, anjaha bangsa na legan gabe parhorja i jumanima ampa i pohon anggurnima.
6Tapi anggo hanima goranon do malim ni Jahowa, siparugas bani Naibatanta do hatahononkon hanima. Habayakon ni sipajuh begu-begu do panganonnima, anjaha hasangapon ni sidea solukonnima.
7Gantih ni habadoronnima, jaloonnima do parbagianan sidua lompit i tanohnima; gantih ni hahirionnima jaloonnima do malas ni uhur sisadokah ni dokahni.
8Ai Ahu do Jahowa sihaholongi hapintoron, tapi na magigi bani panrampokon ampa na masambor. Sai berehonon-Ku do upah bani sidea sintong-sintong, anjaha bahenon do padan sisadokah ni dokahni bani sidea.
9Tarbarita do ginompar ni sidea i tongah-tongah ni sipajuh begu-begu, sonai anak ni sidea i tongah-tongah ni bangsa-bangsa. Sagala na mangidah sidea botohonnima, bangsa na pinasu-pasu ni Jahowa do sidea.
10Marmalas ni uhur tumang do ahu ibagas Jahowa, marolob-olob do tonduyhu ibagas Naibatangku; ai iparhioui do ahu bani hiou haluahon, anjaha isabingi do ahu bani hiou hapintoron, songon siparunjuk na manggotongi dirini, anjaha songon tunangan na mamakei ugas-ugasni.
11Ai songon tanoh na manubuhkon suan-suanan, anjaha songon pohon na mambahen martumbor bonih na sinaburhon hujai, sonai do Jahowa patubuhkon hapintoron ampa puji-pujian i lobei ni ganup bangsa parbegu.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel