Alkitab Mobile SABDA
[VER] : [SIMALUNGUN]     [PL]  [PB] 
 <<  Yesaya 9 >> 

Bagah-bagah Pasal Partubuh ni Raja Damei

1(8-23) Tongon, seng lanjar golap nagori na hona odoh-odoh in! Songon na pinaroh ni Jahowa sapari habadoron bani tanoh Sebulon ampa tanoh Naftali, sonai do bani panorang na sihol roh bereon-Ni hasangapon bani dalan na dompak laut, tanoh na i dipar ni Bah Jordan, ampa bani tanoh ni sipajuh begu-begu.

2(9-1) Bangsa na mardalan ibagas hagolapan mangidah sada panondang na bolon, halak na marianan bani linggoman ni hamatean, poltak do i babou ni sidea sada panondang.

3(9-2) Ipabuei Ham do bangsa in, itambahi Ham malas ni uhurni; marmalas ni uhur do sidea i lobei ni bohi-Mu, songon malas ni uhur sanggah pariama, songon halak na marolob-olob sanggah marbagi taban-taban.

4(9-3) Ai pasangan na bani tangkuhukni, pakon lanja-lanja na bani abarani ampa lonsing-lonsing ni sipangodoh-odoh, Ham do na mamonggolhon songon bani ari ni Midian.

5(9-4) Ai sagala sipatu na mardorob-dorob manlangkah, anjaha sagala pakeian porang na marlapu daroh maningon bois do tutungon, gabe sipanganon ni apuy.

6(9-5) Ai domma tubuh banta sada na etek-etek, ibere do banta sada anak, tampei bani abarani do panggomgomion, anjaha ibahen do goran-Ni: Paruhur Halongangan, Naibata Parkuasa, Bapa sadokah ni dokahni, Raja Damei.

7(9-6) Parrarat ni harajaon-Ni ampa hadameion-Ni seng marpunsa ai bani hotak ni si Daud ampa bani harajaonni, halani ipatotap anjaha ipatoguh do ai marhitei uhum pakon hapintoron humbani sonari nari ronsi sadokah ni dokahni. Simburu ni Jahowa Zebaot do mambahen sonai.

Uhum ni Naibata bani Efraim halani Hengkeng ni Uhurni

8(9-7) Itongos Tuhan do sada hata bani si Jakob, anjaha sogop do ai bani Israel.

9(9-8) Botohon ni ganup bangsa in do ai, ai ma halak Efraim ampa halak Samaria, na mangkatahon ibagas pangenjengon ampa gijang ni uhur:

10(9-9) Tembok batu na dob marumbak ai, paulionnami do marhitei batu gingging; hayu jetun na dob iroboh ai, gantihonnami do bani hayu ares.

11(9-10) Jadi isuruh Jahowa ma si Resin mandorab sidea, anjaha ijuljul munsuh bani sidea,

12(9-11) ai ma halak Aram hun hapoltakan, halak Palistim hun hasundutan, gabe bois Israel ibonduti. Sonai pe ganupan ai seng surut ope ringis-Ni, tongtong ope gostong tangan-Ni.

13(9-12) Seng mulak bangsa ai bani na mambogbogsi, seng ipindahi Jahowa Zebaot.

14(9-13) Halani ai irotap Jahowa ma humbani Israel ulu pakon ihur, dangkah ni palem ampa arung-arung ibagas na sadari.

15(9-14) Pangintuai-pangintuai pakon na sangap-sangap, ai ma ulu ai, anjaha nabi na mangajarhon ladung, ai ma ihur ai.

16(9-15) Ai pambobai ni bangsa on do na mambahen kahou sidea, anjaha na binobahon ni sidea hona bondut.

17(9-16) Halani ai seng ihamalaskon uhur ni Tuhan anak garama ni sidea, anjaha seng maidop uhurni bani na tading maetek atap naboru na mabalu, ai ganup do sidea parjahat anjaha sibahen na masambor, anjaha ganup pamangan manluarhon haotoon. Sonai pe ganupan ai seng surut ope ringis-Ni, tongtong ope gostong tangan-Ni.

18(9-17) Tongon, gara hajahaton ai songon apuy, ipangan rimbang pakon hupi-hupi, imosogkon harangan na potpot, martimpul do timusni hu babou.

19(9-18) Marhitei panomboh ni ringis ni Jahowa Zebaot mosog do tanoh in, anjaha bangsa in doskon soban sipanganon ni apuy; seng marsihaholongan be na marsanina.

20(9-19) Mangkarat halak dompak siamun, tong do loheian ia, mandaub halak dompak sambilou, tong do seng bosur; ganup marsipangan daging ni hombar rumahni.

21(9-20) Manase mangankon Efraim, Efraim mangankon Manase, dob ai rap sidea mangimbang Juda. Sonai pe ganupan ai, seng surut ope ringis-Ni, tongtong ope gostong tangan-Ni.



Studi lengkap, silahkan lihat: Alkitab SABDA.
Dengar dan baca Alkitab Karaoke, silahkan kunjungi: Alkitab Karaoke.
Rencana Multimedia Baca Alkitab: BaDeNo.
Studi Alkitab dengan AI: Alkitab GPT.

 <<  Yesaya 9 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Alkitab GPT
Bantuan
Single Panel Single Panel