Itamuei Jesus Lima Ribu Halak
1Dob salpu ai, idipari Jesus ma Tao Galilea, ai ma Tao Tiberias.
2Buei do halak mangirikkon-Si, halani ididah sidea tanda halongangan, na binahen-Ni bani halak na boritan.
3Jadi tangkog ma Jesus hu dolog, laho hundul hujai rap pakon susian-Ni.
4Tapi dohor ma Paskah, ai ma ari raya ni Jahudi.
5Sanggah mangkawah Jesus anjaha ididah roh buei halak hu lobei-Ni, jadi nini ma dompak si Pilippus, “Hunja ma bolionta ruti, ase mangan sidea in?”
6Tapi ihatahon pe sonai, na laho manlajousi do, ai ibotoh do aha sibahenon-Ni.
7Ibalosi si Pilippus ma Ia, “Harga dua ratus dinar pe ruti seng sungkup bani sidea, ase ganup sidea manjalo otik bei.”
8Jadi marbalos ma hubani sahalak humbani susian-Ni ai, ai ma si Andreas, anggi ni si Simon.
9“Adong do ijon sada dakdanak, na mamboan lima ruti pakon dua dengke, tapi sadiha ma in bani na sain buei?”
10Tapi nini Jesus ma, “Hatahon hanima ma hundul jolma in!” Adong do bolag sampalan ijai, gabe hundul ma dalahi ijai hira-hira lima ribu halak bueini.
11Ase ibuat Jesus ma ruti ai, anjaha dob ihatahon tarima kasih, ipamberei ma bani na hundul ai; anjaha sonai do homa dengke ai, atap sadiha ninuhur ni sidea.
12Ase dob bosur sidea, nini ma dompak susian-Ni ai, “Patumpu hanima ma teba-teba in, ase ulang soya.”
13Jadi ipatumpu sidea ma, anjaha adong do sapuluh dua bantei teba-teba humbani na lima ruti ai, na so bois na mangan ai.
14Ase dob ididah simbuei ai tanda na binahen ni Jesus ai, nini sidea ma, “On ma tongon nabi ia, na sihol roh hu dunia on.”
15Dob ibotoh Jesus, na sihol roh sidea manangkap-Si, laho pabangkitkon-Si gabe raja, jadi surut ma sahalak-Si hu dolog.
Jesus Mardalan i Atas Tao
16Ase dob bod ari, tuad ma susian-Ni ai hu tao ai.
17Imasuki sidea ma sada parau, anjaha idipari sidea ma tao ai laho hu Kapernaum. Domma pala golap ari, tapi lalab do seng roh Jesus manjumpahkon sidea.
18Anjaha mangombus ma logou na gogoh, gabe margilumbang ma tao ai.
19Jadi dob marluga sidea hira-hira dua atap tolu paal daohni, ididah sidea ma Jesus mardalan i atas tao ai, roh mandohori parau ai, gabe mabiar ma sidea.
20Tapi nini ma dompak sidea, “Ahu do on, ulang mabiar!”
21Sihol pamasukon ni sidea ma Ia hu parau ai; mintor das ma parau ai hu pasir situjuon ni sidea ai.
Jesus do Ruti Hagoluhan
22Patarni ai ibotoh na mabuei, na i dipar ni tao ai ma, na so adong ijai parau na legan sobali na sasada ai, anjaha na so dihut Jesus masuk hu parau ai rap pakon susian-Ni, pitah susian-Ni ai do na misir.
23Tapi marrohan do parau hun Tiberias dohor hu ianan parmanganan ruti, na tinonggohon ni Tuhan in.
24Ase dob ididah halak na mabuei ai, na so ijai be Jesus, age susian-Ni ai pe, imasuki sidea ma use parau ai, anjaha laho ma sidea hu Kapernaum mangindahi Jesus.
25Jadi dob jumpah sidea Ia i dipar ni tao ai, nini sidea ma hu Bani, “Guru, sadihari do Ham hujon?”
26Nini Jesus ma mambalosi sidea, “Na sintong tumang do na Huhatahon on bani nasiam, ipindahi nasiam pe Ahu, sedo halani na dob ididah nasiam tanda in, tapi halani na bosur ai do nasiam mangan ruti ai.
27Ulang ma sipanganon na laho salpu horjahon nasiam, tapi sipanganon na totap ronsi hagoluhan sisadokah ni dokahni ma, na sihol bereon ni Anak ni Jolma in bani nasiam. Ai Ia do na tinokankon ni Bapa in, Naibata.”
28Dob ai nini sidea ma hu Bani, “Aha ma sibahenonnami, ase ihorjahon hanami horja harosuh ni Naibata?”
29Nini Jesus ma mambalosi sidea, “On do horja harosuh ni Naibata, ase porsaya nasiam bani na sinuruh-Ni.”
30Dob ai nini sidea ma, “Aha tanda ibahen Ham, ase ididah hanami gabe porsaya hanami Bamu? Aha ihorjahon Ham?
31Ia ompungnami, mangan manna do i halimisan, songon na tarsurat in, ʻIbere do ruti hun nagori atas panganon ni sidea.ʼ”
32Jadi nini Jesus ma hubani sidea, “Sedo si Musa na mambere ruti bani nasiam hun nagori atas, tapi Bapang-Ku do mambere ruti na tongon bani nasiam hun nagori atas.
33Ai na susur hun nagori atas, in do sibere hagoluhan hu dunia on, in do ruti na humbani Naibata.”
34Dob ai nini sidea ma, “Tuhan, ruti na sonin ma tongtong bere Ham bannami.”
35Nini Jesus ma hubani sidea, “Ahu do ruti hagoluhan in. Barang ise na roh hu Bangku, seng anjai loheian be ia, anjaha na porsaya Bangku, seng anjai horahan be ia.
36Tapi domma Huhatahon bani nasiam, ididah nasiam do namin Ahu, tapi seng porsaya nasiam.
37Haganup na binere ni Bapa in Bangku, in do na roh hu Bangku, anjaha seng anjai pabalion-Ku na roh hu Bangku.
38Ai seng susur Ahu hun nagori atas, laho mambahen rosuh ni uhur-Hu, rosuh ni uhur ni na marsuruh Ahu do.
39Anjaha on do rosuh ni uhur ni na marsuruh Ahu, ase ulang magou Hubahen age sada humbani haganup, na dob niondoskon-Ni in Bangku, ase Hupagoluh in tene bani ari parpudi.
40Ai on do rosuh ni uhur ni na marsuruh Ahu, ase haganup na mangidah Anak in anjaha porsaya Bani, dapotan hagoluhan na sadokah ni dokahni, anjaha papuhoon-Ku do ia bani ari parpudi.”
41Jadi marungut-ungut ma halak Jahudi dompak-Si halani hata-Ni ai, “Ahu do ruti, na susur hun nagori atas,”
42Gabe nini sidea ma, “Ai lang Ia do Jesus, anak ni si Josep, anjaha ai lang itandai hita do bapa-Ni pakon inang-Ni? Mase ma ihatahon, ʻNa susur hun nagori atas do Ahu?” ʼ
43Nini Jesus ma mambalosi sidea, “Ulang nasiam marungut-ungut!
44Ise pe lang na boi roh hu Bangku, anggo seng Bapa in, na marsuruh Ahu, manogusi; anjaha Ahu do na papuhohonsi bani ari parpudi.
45Adong do tarsurat bani buku ni nabi-nabi, ʻNa niajaran ni Naibata do sidea ganupan. Haganup na manangihon Bapa in anjaha marguru hu Bani, in do na roh hu Bangku.ʼ
46Seng dong halak na dob ongga mangidah Bapa in, sobali na roh humbani Bapa in; Ia do na dob mangidah Bapa in.
47Na tongon tumang do na Huhatahon on bani nasiam, barang ise na porsaya, parrupei do ia bani hagoluhan sisadokah ni dokahni.
48Ahu do ruti hagoluhan in.
49Na mangan manna do ompung nasiam i halimisan, anjaha matei do.
50On do ruti na susur hun nagori atas, ase ulang matei na mangankonsi.
51Ahu do ruti na manggoluh, na susur hun nagori atas. Barang ise na mangan ruti on, manggoluh do ia sadokah ni dokahni. Ia ruti sibereon-Kai bahen hagoluhan ni dunia on, in ma daging-Ku.”
52Dob ai marsual ma halak Jahudi samah sidea, nini ma, “Sonaha ma boi Halak on mambere daging-Ni in panganonta?”
53Jadi ihatahon Jesus ma hubani sidea, “Anggo seng ipangan nasiam daging ni Anak ni Jolma in, anjaha seng iinum nasiam daroh-Ni, seng dapot nasiam hagoluhan in.
54Na mangankon daging-Ku anjaha na manginum daroh-Ku dapotan hagoluhan na sadokah ni dokahni, anjaha papuhoon-Ku do ia bani ari parpudi.
55Ai sipanganon na tongon do daging-Ku, anjaha siinumon na tongon do daroh-Ku.
56Barang ise na mangankon daging-Ku anjaha na manginum daroh-Ku, ai do na marianan ibagas Ahu anjaha Ahu ibagas ia.
57Songon parsuruh ni Bapa Sipargoluh in Bangku, gabe manggoluh Ahu marhitei Bapa in, sonai do manggoluh marhitei Ahu na mangankon Ahu.
58On do ruti na susur hun nagori atas, tapi seng songon na pinangan ni ompung-ompung ondi, hape matei do. Na mangankon ruti on manggoluh do ronsi sadokah ni dokahni.”
59In ma hata ni Jesus, sanggah mangajari Ia i parguruan i huta Kapernaum.
Surut Buei Susian ni Jesus Manangar Hata ai
60Ase buei ma humbani susian-Ni na manangar hata ai, mangkatahon, “Hata na koras do in, ise ma ra pabogei-bogei in?”
61Ibotoh Jesus ma, na dob marungut-ungut susian-Ni ai pasal ai, gabe nini ma dompak sidea, “Mintor halani in ma hanima sangsi?
62Sonaha ma anggo ididah hanima holi Anak ni Jolma in naik hu ianan-Ni hinan?
63Tonduy in do pagoluhkon, seng marguna anggo daging in. Ia hata na Huhatahon bannima, Tonduy do in ampa hagoluhan.
64Tapi adong do deba hun bannima na so porsaya.” Ia Jesus ibotoh hinan do humbani mungkahni, ise sidea na so porsaya ampa na sihol mantahihon-Si.
65Jadi nini ma, “Halani ai ma ase Huhatahon bannima, paboa na so tarbahen atap ise roh hu Bangku, anggo seng na binerehon ai bani marhitei Bapa in.”
66Buei ma humbani susian-Ni ai na manadingkon-Si hunjia nari, seng be ihasomani sidea Ia.
Hasaksian ni Susian-Ni
67Jadi nini Jesus ma hubani na sapuluh dua ai, “Ai seng dihut hanima sihol laho?”
68Ibalosi si Petrus ma Ia, “Hu bani ise ma hanami laho Tuhan? Bamu do hata hagoluhan sisadokah ni dokahni!
69Anjaha domma ihaporsayai anjaha itanda hanami, Ham do Na Pansing ni Naibata!”
70Ibalosi Jesus ma sidea, “Ai lang sapuluh dua do hanima, na dob Hupilih in? Tapi sibolis do sada hun bennima.”
71Si Judas, anak ni si Simon Iskariot do, na hinatahon-Ni ai. Ia do na mantahihon-Si use, ai ma sahalak humbani na sapuluh dua in.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel