Parmulak ni na Tongah Tolu Marga na hampit Hapoltakan ai
1Ijia idio si Josua ma halak Ruben, Gad pakon satongah marga Manase,
2anjaha nini ma dompak sidea, “Domma ihorjahon nasiam haganup na tinonahkon ni si Musa, juakjuak ni Jahowa hubani nasiam, anjaha itangihon nasiam do ganup sorangku pasal ganup na huhatahon ai bani nasiam.
3Seng itadingkon nasiam sanina nasiam, domma pala na sain dokahni ronsi sadari on, tapi bujur do iramotkon nasiam ganup tonah ni Jahowa, Naibata nasiam.
4Domma marhasonangan nuan sanina nasiam ibahen Jahowa Naibata nasiam, romban hubani bagah-bagah-Ni hubani sidea; on pe mulak ma nasiam hu lampolampo nasiam, hu tanoh parbagianan nasiam, na binere ni si Musa, juakjuak ni Jahowa hubani nasiam i dipar ni Bah Jordan.
5Bujur tumang ma nasiam manramotkon sagala parentah pakon titah, na tinonahkon ni si Musa, juakjuak ni Jahowa hubani nasiam, ai ma mangkaholongi Jahowa Naibata nasiam, pakon marparlahou bani ganup dalan-Ni anjaha manramotkon tonah-Ni, pakon marsijoloman hu Bani anjaha mambalosi Si humbani gok ni uhur ampa gok ni tonduy nasiam.”
6Dob ai ipasu-pasu si Josua ma sidea, isuruh ma sidea laho marayak lampolampo ni sidea.
7Tapi anggo hubani na satongah marga Manase, domma ibere si Musa parbagianan i Basan, anjaha hubani na satongah nari ibere si Josua rap pakon saninani i hasundutan ni Jordan, hampit laut. Jadi sanggah na sinuruh ni si Josua sidea laho, anjaha ipasu-pasu sidea,
8nini ma dompak sidea, “Mulak ma nasiam hu rumah nasiam mararta na buei, marpinahan na bahat tumang, marpirak, maromas, martombaga, marbosi pakon marhiou na buei tumang; bagi nasiam ma taban-taban humbani munsuh nasiam rap pakon sanina nasiam.”
Anjapanjap na i Lambung ni Jordan
9Dob ai mulak ma ginompar ni si Ruben, Gad pakon satongah marga Manase, manadingkon halak Israel hun Silo, na i tanoh Kanaan, laho hu tanoh Gilead, marayak tanoh parbagianan ni sidea, na dob ondos bani sidea hinan, romban hubani hata ni Jahowa marhitei si Musa.
10Jadi dob das sidea hu nagori dohorhon Jordan na i tanoh Kanaan, ipauli ginompar ni si Ruben, si Gad pakon satongah marga Manase ma ijai sada anjapanjap i topi ni Jordan; banggal tumang.
11Dob ai tarbogei ma hubani halak Israel, “Tonggor ma, domma ipauli ginompar ni si Ruben, si Gad pakon satongah marga Manase sada anjapanjap tontang ni tanoh Kanaan i nagori dohorhon Jordan, hampit dipar parbagianan ni halak Israel.”
12Jadi dob ibogei halak Israel ai, martumpu ma ganup kuria ni halak Israel hu Silo, laho marporang dompak sidea.
13Dob ai isuruh halak Israel ma marayak ginompar ni si Ruben, si Gad pakon satongah marga Manase hu tanoh Gilead, si Pinehas, anak ni Malim Eleasar,
14pakon sapuluh kopala hasomanni, sada kopala humbani ganup marga Israel mar sasaompung, ganup sidea kopala ni sada marga i tongah-tongah ni halak Israel marribu-ribu.
15Jadi dob das sidea bani ginompar ni si Ruben, Gad pakon satongah marga Manase i tanoh Gilead, nini sidea ma dompak sidea:
16Sonon do hata ni ganup kuria ni Jahowa, “Pangoseion aha do in, na binahen nasiam dompak Naibata ni Israel, ai ma na marbalik nasiam sadari on humbani Jahowa, marhitei na pinajongjong nasiam bani nasiam sada anjapanjap laho manggeori dompak Jahowa?
17Maotiktu ope gatni banta hajahaton na i Peor, na so taruras ope hita hunjai ronsi sadari on, gabe masa sampar bani kuria ni Jahowa?
18Anjaha sihol marbalik ope nasiam sadari on humbani Jahowa? Anggo manggeori nasiam sadari on dompak Jahowa, manringis ma Ia patar bani ganup kuria ni Israel.
19Tapi anggo butak tanoh parbagianan nasiam in, roh ma nasiam mandipar hu tanoh parbagianan ni Jahowa, hajongjongan ni lampolampo ni Jahowa, ase dapotan parbagianan nasiam i tongah-tongah hami; tapi ulang ma manggeori nasiam dompak Jahowa, sonai homa dompak hanami, marhitei na ipauli nasiam bani nasiam sada anjapanjap, legan humbani anjapanjap ni Jahowa Naibatanta in.
20Ai lang mangosei do si Akhan anak ni si Sera marhitei ugas sisiaponkon, gabe sogop ringis-Ni bani ganup kuria ni Israel? Anjaha seng pitahsi matei halani hajahatonni ai.”
21Jadi nini ginompar ni si Ruben, si Gad pakon satongah marga Manase ma mambalosi kopala ni Israel marribu-ribu,
22“Naibata, Naibata do Jahowa! Naibata, Naibata do Jahowa! Ibotoh do, anjaha Israel pe botohonni do! Anggo na laho manggeori do hanami dompak Jahowa, barang sihol marbalik, ulang ma iurupi Jahowa hanami sadari on.
23Anggo na sihol marbalik humbani Jahowa do, ase ipauli hanami sada anjapanjap bennami, barang anggo na sihol manggalangkon galangan situtungon barang galangan sipanganon barang galangan pardameian hanami i atasni, Jahowa ma na mambalaskon ai bennami.
24Lang, tapi ibahen hanami do on halani biar bani panorang na sihol roh. Ra hatahonon ni ginompar nasiam do bani ginompar nami, ʻAha do parsaoran nasiam bani Jahowa Naibata ni Israel?
25Bah Jordan on do parbalogan na binahen ni Jahowa parholangannami bani nasiam, alo ginompar ni Ruben pakon Gad; seng parrupei anggo nasiam bani Jahowa.ʼ Gabe langlangan ni ginompar nasiam ma ginomparnami marhabiaran bani Jahowa.
26Halani ai ihatahon hanami ma: Pauli hita ma banta sada anjapanjap, seng bahen panggalangan ni galangan situtungon, barang galangan sisayaton,
27tapi bahen saksi i tongah-tongah nami pakon nasiam, pakon i tongah-tongah ni ginomparta magira, paboa na masuk hanami marhorja i lobei ni Jahowa marhitei galangan situtungon, sisayaton pakon hatarimakasihon nami; ase ulang ihatahon ginompar nasiam magira hubani ginomparnami, “Seng parrupei nasiam bani Jahowa!
28Anjaha ipingkiri hanami ma, anggo sonai ihatahon sidea magira bennami pakon bani ginomparnami, gabe hatahononnami ma, ʻTonggor nasiam ma usihan ni anjapanjap ni Jahowa na dob binahen ni ompungnami, sedo bahen panggalangan ni galangan situtungon barang galangan sisayaton, tapi bahen saksi do i tongah-tongahta.ʼ
29Daoh ma in hun bennami, anggo manggeori hanami dompak Jahowa, barang marbalik humbani Jahowa sadari on, marhitei na paulihon sada anjapanjap bahen panggalangan ni galangan situtungon, galangan sipanganon barang sisayaton pe, legan humbani anjapanjap ni Jahowa, Naibatanta in, na jongjong i lobei ni lampolampo ni ai.”
30Jadi dob ibogei malim Pinehas pakon kopala ni kuria ai pakon kopala ni Israel marribu-ribu na rap pakonsi, hata na hinatahon ni ginompar ni si Ruben, Gad pakon Manase ai, gabe dear ma uhur ni sidea mambogeisi.
31Dob ai nini si Pinehas, anak ni malim Eleasar ma dompak ginompar ni si Ruben, Gad pakon Manase, “Sadari on ma ibotoh hita, paboa i tongah-tongahta do Jahowa, halani seng sihol mosei nasiam dompak Jahowa marhitei humbani pambahenan on. Nasiam do na paluahkon halak Israel sadari on humbani tangan ni Jahowa.”
32Dob ai mulak ma si Pinehas, anak ni si Eleasar pakon kopala-kopala ai humbani ginompar ni si Ruben pakon si Gad, mulak hun tanoh Gilead, hu tanoh Kanaan, marayak halak Israel, laho mamboan barita ai bani sidea.
33Jadi malas tumang ma uhur ni halak Israel mambogei barita ai, ipuji halak Israel ma Naibata, anjaha seng be isura uhur ni sidea laho tangkog mamorang sidea, laho mangagou tanoh, na niianan ni ginompar ni si Ruben pakon si Gad.
34Dob ai ibahen ginompar ni si Ruben pakon si Gad ma goran ni anjapanjap ai: Saksi; ai nini sidea do, “Gabe saksi ma on i tongah-tongahta, paboa Jahowa do Naibata.”
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel