Alkitab Mobile SABDA
[VER] : [SIMALUNGUN]     [PL]  [PB] 
 <<  Zakharia 4 >> 

Panonggoran na Palimahon: Parsuluhan Omas ampa Dua Hayu Jetun

1Dob mulak malekat, hasomanku marsahap ai, ipuhoi ma ahu, songon sada halak na pinuhoan humbani na modom.

2Ihatahon ma hu bangku: Aha dong ididah ham?” Hubalosi ma, “Huidah do sada parsuluhan, pitah humbani omas, parminakanni i atasni; pitu do lampu i atasni ampa pitu pipa bani lampu na i atasni ai.

3Anjaha adong do dua hayu jetun jongjong i lambungni, sada hampit siamun ni parsuluhan ai anjaha na sada nari ai hampit sambilou.

4Dob ai ningku ma dompak malekat, na marsahap pakon ahu ai, “Ai aha do artini on, ale tuannami?”

5Dob ai nini malekat hasomanku marsahap ai ma mambalosi ahu, “Ai seng ibotoh ham aha do artini in?” Jadi ningku ma, “Lang, tuanku.”

6Dob ai nini ma dompak ahu, “On ma hata ni Jahowa hubani si Serubabel, ʻSeng marhitei bala barang marhitei gogoh, tapi marhitei Tonduy-Hu do ase saud,ʼ nini Jahowa Zebaot.

7Ai aha do ho, ale dolog na bolon? Maningon gabe pamah do ho i lobei ni si Serubabel. Angkatonni ma hu atas batu parsuhi ai marhasoman surak-surak, ʻJengesni in, dearni in!ʼ”

8Ambahni ai roh do hata ni Jahowa hu bangku sonon,

9“Tangan ni si Serubabel do na dob mambahen onjolan ni rumah on, tanganni do homa na sihol mandobkon on. Jadi botohon nasiam ma, Jahowa Zebaot do marsuruh ahu bani nasiam.

10Ai barang ise na mapas bani ari pamungkah na etek ai, maningon marolob-olob sidea mangidah batu parsuhi, na ibagas tangan ni si Serubabel. Ia na pitu ai, ai ma Tonduy ni Jahowa, ai ma maniar ganup tanoh on.”

11Dob ai ningku ma hu bani, “Ai aha do arti ni na dua hayu jetun na hampit siamun ampa sambilou ni parsuluhan ai?”

12Ningku ma paduahalihon hu bani, “Ai aha do arti ni ranting ni hayu jetun na dua ai, na i lambung ni pipa omas na dua ai panguseian ni minak ai?”

13Dob ai nini ma hu bangku, “Seng ibotoh ham, aha do artini ai?” Balosku, “Lang, tuannami.”

14Jadi nini ma, “Sidea ma sidua halak na mininakan ai, na jongjong i lobei ni Jahowa, sigomgom ganup tanoh on.”



 <<  Zakharia 4 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel