Parugamaon na Sintong: Seng Parpuasaon, Tapi Pambalosion do
1Paompat-tahunkon dob manrajai raja Darius, roh ma hata ni Jahowa hubani si Sakaria, bani ari ompat bulan siah, ai ma bulan Kislev,
2sanggah na isuruh si Betel-Sareser pakon si Regem-Melek suruhanni, laho manungkun Jahowa,
3lanjar manungkun malim-malim na i rumah ni Jahowa Zebaot ampa nabi-nabi, “Naha, nunutonnami ope tangis-tangis ampa marpuasa bani bulan lima, songon na somal binahennami, domma pala martahun-tahun?”
4Jadi roh ma hata ni Jahowa Zebaot hu bangku sonon,
5“Hatahon ma hubani ganup halak na i tanoh on ampa hubani malim, ʻIa marpuasa pe hanima anjaha tangis-tangis bani bulan lima ampa bulan pitu ibagas na pitu puluh tahun on, ai Bangku do hanima na marpuasa ai?
6Anjaha anggo mangan ampa minum hanima, ai lang bannima sandiri do hanima na mangan ampa na minum ai?ʼ
7Ai lang sonai hinan do hata na ipatugah Jahowa marhitei pamangan ni nabi na ijia, sanggah niiankon ope Jerusalem anjaha marsonang-sonang rap pakon huta-huta inggotni ai, anjaha adong ope na mangiankon tanoh dangsina ampa tanoh bornoh ai?”
8Dob ai roh ma hata ni Jahowa hubani si Sakaria sonon,
9“Sonon do hata ni Jahowa Zebaot, dalankon ma uhum na sintong, patuduhkon ma dear layak ampa idop ni uhur bani ganup hasomanni.
10Ulang odoh-odoh na mabalu, na so marinang, na so marbapa panginsolat atap na musil; anjaha ulang ma adong hun bannima na mamingkirhon na jahat dompak hasomanni ibagas uhurni.”
11Tapi manjua do sidea manangihon ai, hengkeng do sidea anjaha itutup pinggolni ulang ibogei.
12Ipamapir do uhurni songon batu intan, ase ulang ibogei sidea titah ampa hata na tinongos ni Jahowa Zebaot marhitei Tonduy-Ni ampa marhitei nabi na parlobei ai. Halani ai do ase gajag ringis ni Jahowa Zebaot.
13“Songon Ahu na dilo-dilo, hape seng itangihon sidea, sonai ma sidea dilo-dilo, tapi seng tangihonon-Ku,” nini Jahowa Zebaot.
14“Halani ai domma Hupurpurhon sidea hu tongah-tongah ni sagala bangsa, na so tinanda ni sidea hinan, gabe tarulang tanoh ai dob itadingkon sidea, seng dong be na marhujai-hujon. Sonai ma tanoh na madear ai gabe halimisan ibahen sidea.”
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel