1PANGERAN nimbalan ka Musa
2hal aturan pikeun jelema anu cageur tina kasakit lepra. Dina poean baris dinyatakeun beresih, jelemana kudu dideuheuskeun ka imam.
3Imam kudu kaluar ti pasanggrahan, mariksa. Upama katembong geus cageur,
4imam kudu nitahan mawa manuk anu halal dua siki, kai kiputri sateukteuk, benang beureum jeung hisop sagagang.
5Imam kudu nitah meuncit manuk anu hiji di luhureun wadah tina taneuh beunang ngusian ku cai tina cinyusu.
6Manuk anu hirup keneh ku imam kudu dianclomkeun kana getih manuk anu dipeuncit tea, barengkeun jeung kai kiputri, benang beureum jeung hisop.
7Getih tea kepret-kepret ku imam tujuh kali ka jelema anu rek dinyatakeun beresih tina leprana, tuluy nyatakeun yen eta jelema geus beresih. Manuk anu hirup keneh tea leupaskeun sina hiber ka tegalan.
8Jelemana sina nyeuseuh pakeanana, tuluy titah ngagundulan sirah jeung titah mandi. Geus beresih meunang asup deui ka pasanggrahan, tapi tetep kudu cicing heula di luar kemahna salila tujuh poe.
9Dina katujuh poena sirahna kudu dikerik deui, kitu keneh janggot, halis jeung bulu-bulu awakna kudu dikerik. Pakeanana oge kudu diseuseuh deui, tuluy mandi, kakara beresih.
10Dina kadalapan poena kudu ka imam, mawa anak domba jalu dua bikang hiji umur sataunan sarta anu mulus, tipung tilu kilo campur ku minyak jetun, jeung minyak jetunna sapertilu liter.
11Eta jelema jeung babawaanana ku imam kudu dibawa ka lawang Kemah Tepangan.
12Geus kitu anak domba jalu jeung minyak anu sapertilu liter tea ku imam cokot jieun kurban panebus, sanggakeun ka PANGERAN, sarta engkena pikeun eta imam.
13Eta anak domba kudu dipeuncit di nu suci, paranti meuncit sato kurban pamupus dosa jeung kurban beuleuman. Anu matak kudu kitu, lantaran kurban panebus teh kaayaana suci kacida sakumaha kurban pamupus dosa, eta engkena jadi bagian imam.
14Getihna ku imam kudu dicokot saeutik tuluy oleskeun ka jelema anu rek dinyatakeun bersih tea, kana daun ceulina anu katuhu, kana indung leungeunna nu katuhu jeung kana indung sukuna anu katuhu.
15Minyak jetunna bahekeun saeutik kana dampal leungeun imam anu kenca,
16tuluy kepret-kepret ku saramo nu katuhu di dinya di jero Kemah Tepangan PANGERAN tujuh kali.
17Geus kitu jelema anu rek dinyatakeun beresih teh ku imam diolesan ku minyak anu aya dina dampal leungeunna, dina tempat-tempat anu geus diolesan ku getih anak domba tea, nya eta daun ceulina nu katuhu, indung leungeunna nu katuhu, jeung indung sukuna nu katuhu.
18Minyak anu nyesa keneh dina dampal leungeun kenca imam susutkeun kana sirah jelema anu rek dinyatakeun beresih tea. Kitu petana imam ngajalankeun upacara ngaberesihkeun teh.
19Ti dinya imam kudu ngahaturkeun kurban pamupus dosa, neruskeun upacara ngaberesihkeun. Geus kitu kudu meuncit sato keur kurban beuleuman.
20Tuluy sanggakeun kana altar jeung kurban gandum, neruskeun upacara ngaberesihkeun tea. Geus kitu jelema tea jadi beresih.
21Upama jelemana kurang mampuh lantaran miskin, anak domba pikeun sarat ngaberesihkeun dirina teh cukup ku hiji bae pikeun kurban panebus, sanggakeun ka PANGERAN pikeun bagian imam. Tipung pikeun kurban gandum oge sakilo bae, campur ku minyak jetun, jeung minyak jetunna sapertilu liter.
22Jeung kudu ngahaturkeun japati ngora atawa tikukur ngora dua siki, hiji keur kurban pamupus dosa, hiji keur kurban beuleuman.
23Dina kadalapan poena ti sanggeus dirina beresih, eta pikurbaneun bawa ka imam ka lawang Kemah Tepangan.
24Anak domba jeung minyak jetunna ku imam cokot, sanggakeun ka PANGERAN, engkena keur bagian imam.
25Dombana peuncit, getihna cokot saeutik pake ngulasan jelema tea, daun ceulina nu katuhu, indung leungeunna nu katuhu, jeung indung sukuna nu katuhu.
26Minyak bahekeun saeutik ku imam kana dampal leungeun anu kenca,
27tuluy kepret-kepret ku curuk katuhu tujuh kali di dinya di jero Kemah PANGERAN.
28Ti dinya minyak anu dina dampal leungeunna oleskeun saeutik kana tempat-tempat anu geus diolesan getih tea, nya eta daun ceulina nu katuhu, indung leungeunna nu katuhu, jeung indung sukuna nu katuhu.
29Minyak anu nyesa keneh dina dampal leungeun imam kudu digesrek-gesrekkeun kana sirah eta jelema. Kitu petana upacara ngaberesihkeun.
30Ti dinya imam kudu nyanggakeun hiji japati ngora atawa tikukur ngora,
31jieun kurban pamupus dosa. Anu hiji deui jieun kurban beuleuman, barengkeun jeung kurban kadaharan. Kitu petana upacara ngaberesihkeun.
32Kitu papakonna pikeun jelema anu tas katerap kasakit lepra, anu meh teu kabedag nyumponan pikurbaneun sakumaha mistina pikeun sarat ngaberesihkeun dirina.
33PANGERAN nimbalan ka Musa jeung Harun
34nimbalkeun papakon pikeun imah anu kakeunaan ku panyakit buluk. (Ieu papakon dipaparinkeun keur urang Israil mun geus arasup ka tanah Kanaan anu ku PANGERAN rek dipaparinkeun jadi milik maranehna.)
35Sing saha anu imahna keuna ku panyakit buluk, kudu bebeja ka imam.
36Samemeh imam datang mariksa kudu marentahkeun supaya eta imah dikosongkeun, sabab mun teu kitu saeusi eta imah bakal dinyatakeun najis. Geus kitu imam datang,
37mariksa eta panyakit buluk. Mun aya ceda-ceda semu hejo atawa semu beureum mimiti ngaruksak tembok,
38imam kudu terus kaluar sarta eta imah terus konci lilana tujuh poe.
39Dina katujuh poena ku imam kudu dipariksa deui. Upama panyakit bulukna geus nyebar,
40parentahkeun ku imam supaya tembok anu kakeunaan dibongkar tuluy piceun ka tempat pamiceunan di luar kota.
41Urut ngabongkar kudu ditambal ku nu anyar. Tembok sakurilingna kerik tuluy lapis deui ku nu anyar.
42Upama sanggeus tembokna dibongkar jeung didangdanan teh panyakit bulukna aya deui,
43kudu dipariksa deui ku imam.
44Upama tetela kitu, eta imah teh geus keuna ku najis,
45kudu dirubuhkeun; batu-batuna, kayu-kayuna, lapis tembokna, akutan ka luar kota ka tempat pamiceunan.
46Sajeroning eta imah dikonci tea ku imam, sing saha anu asup ka dinya jadi najis nepi ka burit.
47Sing saha anu kekedengan atawa dahar di dinya, kudu nyeuseuh pakeanana anu harita keur dipake.
48Upama sanggeus tembok eta imah dilapis deui, sarta waktu dipariksa deui ku imam panyakit bulukna teu tembong deui, eta imah kaayaanana jadi beresih, sabab geus tetela panyakit bulukna geus leungit.
49Pikeun nyucikeun eta imah, imam kudu nyadiakeun manuk dua siki, kayu kiputri, benang beureum, jeung hisop sagagang.
50Manuk peuncit hiji luhureun wadah tina taneuh anu dieusian cai tina cinyusu.
51Kayu kiputri, hisop, benang beureum, jeung manuk nu hirup keneh anclomkeun kana getih manuk anu dipeuncit tea jeung kana cai anu dina wadah, terus eta imah teh kepretan tujuh kali.
52Ku cara kitu eta imam teh nyucikeun eta imah ku getih manuk, ku cai seger, ku manuk hirup, ku kayu kiputri, ku hisop, jeung ku benang beureum.
53Manuk anu hirup keneh leupaskeun sina hiber ka luareun kota, ka tegalan. Ku cara kitu imam teh nyucikeun eta imah kalawan upacara, geus kitu eta imah teh beresih tina kanajisanana.
54Kitu papakon hal kasakit kulit anu gawat,
55(14:55-56) cenang, bisul atawa baruntusan, kitu keneh ngeunaan panyakit buluk anu terap kana papakean jeung kana imah.
56(14:55)
57Ieu papakon teh pituduh geusan nangtukeun suci henteuna barang atawa naon bae.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel