1Wali ojo karoonya kami mayunu resi komi seore, yako etu masae sangkodi kita taa simparata wo’u. See naka kami togo mawali mawongko kojo raya mami. Wali tempo kami tamo mangkurang manta’amaka kawongko ndaya mami mampobuuka komi etu, tempo etu kami manganto’o to tao-tao jamo kami dua to maroo-roo ruyu nja’u kota Atena,
2pei mampokau a’i ngkita, i Timotius, dayau resi komi. I Timotius etu, ia samba’a to papolaong i mPue Allah pasi ia mangansawang kami mampakarebaka kareba matao. Wali kami mampokau ia yau resi komi damampakaroso raya ngkomi pasi mampakaroso seja pangaya ngkomi.
3Naka pei ia damangika palaong to etu see tare pasi samba’a komi to mangandolika muni tangonya yako ri pangayanya apa saba kasesa to nurata ngkomi. Apa komi seja mangansani, i Pue Allah roomo mampakanasaka resi kita ane kita mangalulu songka to si Ia, kita damangarata kasesa.
4Komi manasa mangkonong palaong to etu apa tempo kami re’e sindara-ndara pei komi seore, tempo etu kami mampaponsanika yami komi manganto’o kita damangarata kasesa. Wali komi mangansani monso pu’u gombo mami etu, apa palaong etu nawalimo resi komi.
5Wali see naka aku mampokau i Timotius yau resi komi seore, apa aku tamo kukoto manta’amaka kamoru ndayangku mampobuuka komi. Aku mampokau ia yau mangalo’a bara wimba pangaya ngkomi, bara tiroo maroso, bara tamo. Apa aku moru mampobuuka i Kepala Measa to rato’oka seja i Panggoda bara roomo mangagoda yau komi see komi mangandolika yau tangomu yako ri pangaya ngkomi. Apa ane ewa see, tamore batuanginya palaong mami resi komi seore.
6Wali i Timotius yau resi komi seore pei si’i-si’i ia rata muni resi kami pasi ia mangkenika kami kareba to matao mangkonong pangaya ngkomi pasi pamporayang ngkomi. Pasi ia manganto’o komi sangkani masanang mampobuuka kami pasi mawongko seja raya ngkomi rani mangkita kami, sewaju ewa kami rani mangkita komi.
7Wali a’i-a’i, kami mangarata kasusa pasi kasesa, pei nempo ewa wetu kami tiroo maroso raya mami saba yako kareba mangkonong komi etu, apa kami kunsani pangaya ngkomi tiroo maroso.
8Wali kami masanang katuwu mami si’i-si’i ane monso pu’u maroso pangaya ngkomi resi i Pue.
9Wali apa saba pangaya ngkomi etu see naka kami mangepe taa gana gombo mami ane ojo manganto’oka i Pue Allah tarima matao. Apa bae kojo kandende ndaya mami ri tango i mPue Allah ngkita apa saba komi.
10Wali wuri eo kami makai-kai mamporapika kojo resi i Pue Allah see kami maya simparata wo’u pei komi. Apa kami rani mampotundeka wo’u komi damampasilonga pangaya ngkomi.
11Wali kami makai-kai see Pa’a ngkita, i Pue Allah semo, pasi i Yesu Kerisitu, Pue ngkita, damangawai jaya see kami maya yau resi komi.
12Pasi kami makai-kai mamporapika resi i Pue see Ia damangansawang komi see kanjo’unjo’u tiduga-dugang komi masiporayang pasi mamporayang seja samparia tau, see tuwu-tuwuja bae kojo pamporayang ngkomi etu sewaju ewa pamporayang mami resi komi.
13Pasi kami mamporapika resi Ia see Ia mampakaroso raya ngkomi, see komi mampakalongko yako ri dosa pasi tare lengko to maya rapakasala ri tango i mPue Allah, Pa’a ngkita, ane ratamo temponya danakama’i i Yesu Kerisitu, Pue ngkita, sindara-ndara pei samparia tau to Ia Puenya.
Download Audio MP3 (1 Tesalonika 3):
Mobile (Low Quality) - CD (High Quality)
<< 1 Tesalonika 3 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel