Alkitab Mobile SABDA
[VER] : [TAA]     [PL]  [PB] 
 <<  1 Timotius 6 >> 

1Wali aku re’e wo’u sangkodi mangkonong pamporani i mPue Allah resi watua to mangaya. Pamporani i mPue Allah tau etu mampobuuka tau puenya masipato ra’angga. Apa ane ia manga’angga tau puenya etu, sa’e taa maya manto’o maja’a i Pue Allah apa saba to nikanya. Pasi sira taa seja maya manto’o maja’a anu to kita mampotunde.

2Wali bara re’e watua to puenya tau to mangaya seja, wali ane ewa see, taa matao ane watua etu mampobuuka, “Taa mawei ane aku taa manga’angga tau puengku etu apa kami dua pua’i to samba’a pangaya.” Taa kojo matao ane ia mampobuuka ewa wetu. Kasimbalinya yako etu, to tao-tao watua etu maopis kojo mangansawang tau puenya, apa tau puenya etu tau to mangaya seja to naporayang mbatuanya etu. Wali patundeka anu to kuto’o si’i pasi paposiaka kojo tau see sira mangalulu.

3Wali re’e tau to mampoguru anu to yusa. Tau etu taa mangalulu anu to monso, to nato’o i Yesu Kerisitu, Pue ngkita. Pasi taa mangalulu anu to kita mampotunde mangkonong lengko to singkonong pei i Pue Allah.

4Wali ane tau to ewa wetu, ia mangei pasi bea kojo. Ia rani kojo mangaliwu tingka pasi masibanta mangkonong batuanginya gombo ntau. Wali yako lengkonya etu mawali wo’u palaong to maja’a, etu semo tau kaloo pasi timopo, matingka, bawiwi pasi mampondayaka anu to taa matao mangkonong sa’e.

5Pasi re’e seja mawali masibanta ri oyo ntau to tamo matao pampobuukanya. Tau etu tamo mangansani anu to monso. Sira mampobuuka ane masua agama, etu semo jaya damangarata kasugi.

6Pei kamonsonya, ane kita mampolengkoka lengko to singkonong pei i Pue Allah, pasi ane kita mangepe gana kojo to re’e resi kita, ane ewa see bae kasugi ngkita.

7Apa tempo kita rapoanaka, tempo etu kita tare kesaa to kita nangkeni ri lino. Pasi tempo kita damate, tare seja kesaa to kita maya damangkeni.

8Wali ri katuwu ngkita si’i ane kita gana ewa pangkoni pasi pake, to tao-tao kita mangepe masanang.

9Pei tau to ojo rani sugi, tau etu daragoda pasi daraakal. Anu to mangagoda pasi mangaakal ia, etu semo pamporani ndayanya to bea pasi to maja’a. Wali pamporani ndaya to etu damampakaja’a katuwu ntau etu pasi damampopate yau ia.

10Apa ane ewa pinamuya, yako ri kalenya mawali tuwunya. Wali ane tau ojo mamporayang doi, to etu maya raporapaka ewa kale mpinamuya apa yako ri pamporayangnya doi etu mawali samparia anu to maja’a. Apa re’e tau to mamporayang kojo doi, see naka sira re’e mampiyaika pangayanya. Wali tau etu sira roomo mangarata kasesa to yako ri soso ndaya nsira.

11Pei korom semo tau to i Pue Allah Puenya. Wali see naka pakalongko yako ri palaong to maja’a etu. Pei pakadota mangika lengko to masipato raika pasi to singkonong pei i Pue Allah. Pakaroso pangayamu resi i Pue pei porayang kojo sa’e. Pasi ane nurata ngkorom kasesa, pakaroso rayamu mangalulu i Pue. Pasi ikamo to manoto resi sa’e.

12Wali pakadota mampoewaka pangayamu resi i Pue, pasi kongko kojo katuwu to singkasaenya. Katuwu etu korom room napokio i mPue Allah mangantima tempo korom mangaya. Pasi korom re’e mampongakung pangayamu etu seore ri tango ntau boros.

13Wali i Pue Allah pasi i Kerisitu Yesu, sira maya mawali matamanasa mangkonong paposia to dakuto’oka korom. I Pue Allah semo to mangawaika katuwu resi samparia anu to re’e. Pasi i Kerisitu Yesu Ia semo to mawali matamanasa mangkonong anu to monso tempo Ia nangampotango i Pontius Pilatus seore. Wali paposiangku resi korom, etu semo, lulu kojo porenta to room rapakanasaka resi korom etu. Lulu kojo see tare pasi sangkodi porenta etu to taa raluluka, apa ane ewa see tare tau to maya manganto’o maja’a porenta etu. Wali lulu kojo sampe rata temponya kama’i muni i Yesu Kerisitu, Pue ngkita.

14(6:13)

15Apa ane rata temponya to kono, i Pue Allah damanganto’oka i Yesu ma’i muni. Wali ojo patanya i Pue Allah to mangkuasang samparia, pasi Ia rabarong kojo. Ia semo Makole to mangkuasang samparia makole, pasi Ia semo Pue to mangkuasang samparia pue.

16Apa ojo patanya i Pue Allah semo to tare kapateNya, pasi Ia maroo ri raya ngkareme to taa maya napomosuk ntau. Wali tare pasi samba’a tau to re’e mangkita i Pue Allah, pasi taa seja re’e tau to nakurang mangkita Ia. Wali pakabae Ia pei patimonso kuasaNya anu to singkasaenya. Amin.

17Wali re’e wo’u sangkodi to aku rani manganto’o mangkonong tau to sugi ri lino si’i. To’oka sira ne’e mangei pasi ne’e mansarumaka kasuginya, apa tare kasugi ri lino to taa dapura yau. To’oka sira sarumaka i Pue Allah, anu to manoto kojo resi kita. Apa samparia to kita masanang mangampake Ia mangawai.

18Wali to’oka tau sugi etu pakadota mangika palaong to matao, pasi mangansora sa’e yako ri kabuya ndaya pasi ri kanoto ndaya.

19Apa ane sira mangika ewa see, sira re’e mamporomung kasugi ndate Saruga. Ojo kasugi to etu to bae batuanginya ri tempo to darata. Wali ane sira mangika ewa see, sira maya mangangkongko katuwu to monso pu’u.

20O Timotius, jagai kojo anu to room nasarumakaka i mPue Allah resi korom. Ne’e manganto’o gombo to taa mampakasanang i Pue Allah pasi to tare batuanginya. Etu semo gombo to nato’o ntau to mangabanta, manganto’o, “Kami semo to mangansani anu to monso.” Ewa wetu nato’o nsira pei kamonsonya anu to nansani nsira etu taa kojo monso.

21Wali re’e tau to mangalulu gombo ntau etu, roo see sira mawali ewa tau to masepi yau yako ri jaya to monso. Wali tamo kono pangaya nsira. Wali ungkanyamo ruyu gombo si’i, pasi aku marapi resi i Pue Allah see Ia mampaponsanika korom kanotoNya.



Download Audio MP3 (1 Timotius 6):
Mobile (Low Quality) - CD (High Quality)

 <<  1 Timotius 6 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel