Alkitab Mobile SABDA
[VER] : [TAA]     [PL]  [PB] 
 <<  2 Korintus 13 >> 

1Wali si’i katogo ngkaninya aku dayau resi komi. Pasi tempo aku darata, aku damamparesa palaong to mawali ri oyo ngkomi. Aku damangika singkonong pei anu to ratulis ri raya ntuntu i mPue Allah to manganto’o, “Ane re’e tau to darabotus, tau etu tawa maya rabotus ane palaonginya tawa napakanasa nu matamanasa dua bara togo mba’a tau.” Ewa wetu to ratulis.

2Wali tempo aku re’e resi komi kadua ngkaninya seore, tempo etu aku roomo mampatiendoka resi komi. Pei si’i-si’i, tempo aku taa siwaka pei komi, aku damanganto’oka wo’u komi to roomo mangika dosa pasi samparia komi to yusa patiendo to etu. Etu semo, ane ratamo aku, tare tau to mangika dosa to aku taa damangabotus.

3Naka pei aku damangika palaong to etu apa komi rani aku damampakanasaka komi monso pu’u i Kerisitu semo to magombo mangampake ngangangku. Wali komi damangepe kuasa i ngKerisitu tempo aku magombo apa i Kerisitu Ia taa mayu’u, pei Ia bae kuasaNya to mapalaong resi komi.

4Apa nempo koronya mayu’u tempo Ia rapaku ri kaju pasape seore, Ia tuwu muni tempo si’i saba yako kuasa i mPue Allah. Wali see naka Ia bae kuasaNya mapalaong resi kita to samba’a pei Ia. Kamonsonya koro ngkita mayu’u seja sewaju ewa Ia seore. Pei tempo si’i kita tuwu seja sindara-ndara pei i Kerisitu apa saba kuasa i mPue Allah. Wali see naka kami re’e seja kuasa damampasilonga komi ane kami darata wo’u resi komi.

5Wali paresa raya ngkomi samba’a pei samba’a see daransani bara monso pu’u komi mangaya i Kerisitu bara taa. Pakanasa ri raya ngkomi samba’a pei samba’a. Wimba, komi bara taa nunsani i Yesu Kerisitu re’e maroo ri raya ngkomi? Pei ane taa monso pangaya ngkomi, Ia tare maroo ri raya ngkomi. Pei ane ewa pampobuukangku, komi monso pu’u mangaya.

6Pasi pamporaningku, tuwu-tuwuja komi damanasa seja kami monso pu’u pomakau i ngKerisitu.

7Wali aku makai-kai resi i Pue Allah see komi taa damangika palaong to maja’a naka ne’e kami rapakasaaka mangampake kuasa mami damanganseko komi. Kamonsonya aku maya mangampake kuasangku etu mampakanasaka sa’e aku pomakau i ngKerisitu. Pei si’a etu to bae batuanginya resi aku. Si’a! Apa nempo sa’e manganto’o kami pomakau to taa monso, taa mawei resi aku. Pei to bae batuanginya resi aku, etu semo komi mangangika palaong to masipato raika.

8Apa ane palaong ngkomi mangalulu anu to monso, kami taa maya mangewa. Apa kami sangkani mampasimbalika anu to monso etu.

9Wali ane komi maroso pangaya ngkomi, kami masanang nempo kami mayu’u. Pasi kami makai-kai see lengko ngkomi kanjo’u-njo’u tiduga-dugang kasilonganya.

10Wali see naka aku mangantulisika yami komi sura si’i tempo aku tawa siwaka pei komi, see komi yoa damampakakonoka samparia tau to roomo mangika palaong to maja’a. Apa ane ewa see, tempo aku rata resi komi tamore sala ngkomi to tawa rapakakonoka. Wali ane ewa see aku tamo damangampake kuasa to nawaika i mPue aku damangabotus komi. Apa kuasa to nawaika i mPue aku etu, kamonsonya darapake mampakaroso pangaya ngkomi, si’a manganseko komi.

11Wali a’i-a’i, gombo to kapuranya to aku rani manganto’oka komi ewa si’i. Pakasanang raya ngkomi. Pasi pasilonga lengko ngkatuwu ngkomi. Pasi biakamo paposiangku mampakaroso raya ngkomi. Pasi matao komi mawali samba’a pampobuuka pasi tuwu masingkatao. Apa ane ewa see i Pue Allah, anu rato’oka pu’u mpamporayang pasi karodo ndaya, Ia dasiwaka pei komi.

12Wali tempo komi simparata samba’a pei samba’a, masinengu apa kita sintua’i ri raya mpangaya.

13Wali samparia tau to i Pue Allah Puenya to re’e rire, sira paka taa mangkalingan komi.

14Pasi aku makai-kai see kanoto i mPue Yesu Kerisitu, pasi pamporayang i mPue Allah, pasi kasingkatao to nawai i Nosa Mapasing dare’e resi komi samparia. Ungkanyamo ruyu gombongku si’i.



Download Audio MP3 (2 Korintus 13):
Mobile (Low Quality) - CD (High Quality)

 <<  2 Korintus 13 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel