Alkitab Mobile SABDA
[VER] : [TAA]     [PL]  [PB] 
 <<  Efesus 4 >> 

1Wali apa saba etu, si’i paposia to si aku to ratarungku apa saba palaongingku resi i Pue. Aku manganto’oka komi ika lengko ngkatuwu to masipato naika ntau to napokio i mPue Allah apa monso pu’u Ia room mampokio komi.

2Wali lengko to masipato, etu semo ne’e mabae-bae raya ngkomi pasi ne’e seja makasar resi sa’e. Pakabae sabara ngkomi resi sa’e, pasi porayang sa’e naka ne’e majoli masusa resi sira.

3Komi roomo napasimba’a i Nosa Mapasing. Wali tuwu masingkatao imba pata mpangkurang ngkomi apa ewa wetu raika mangajagai kasimba’a ngkomi etu.

4Apa kita to mangaya raporapaka ewa samba’a koro, pasi i Nosa Mapasing anu to re’e ri raya ngkita, Ia seja samba’aja. Pasi ewa see seja pansarumaka to narata ngkita tempo napokio i mPue Allah. Apa kita to rapokio, samba’aja seja pansarumaka ngkita etu.

5Wali kita samba’aja Puenta, pasi samba’aja pangayanta, pasi samba’aja seja batuanginya naka pei kita samparia rabaptis.

6Pasi samba’aja seja i Pue Allah, Pa’a ngkita samparia. Ia mangkuasang kita samparia, pasi Ia mangampake kita samparia mangika songkaNya, pasi Ia maroo ri raya ngkita samparia. Pei ane sora to nawaika i ngKerisitu kita yako ri kanotoNya, taa samparia sewaju. Apa Ia mangantilaka kita sora singkonong pei pamporani to si Ia.

7(4:6)

8Wali palaong etu singkonong pei gombo to ratulis ri raya nTuntu i mPue Allah, to manganto’o, “Tempo Ia nayau nto’u saruga, tempo etu Ia mangkeni seja malagi tau to rata’amaka. Pasi Ia mangansora to lino.” Etu semo gombo to ratulis tempo owi.

9Wali kesaa batuanginya gombo to manganto’o Ia “nayau nto’u saruga” etu? Batuanginya, tempo Ia tawa yau nto’u saruga, Ia yau ruyu lo’u raya nu lino.

10Wali i Kerisitu to yau loure etu, Ia semo to nayau nto’u saruga anu to langa-langan pei samparia yangi. Naka pei Ia mangika ewa wetu see Ia maya mampakagana samparia anu to re’e.

11Wali Ia semo to mangawaika kita to rato’oka tauNya sora see kita damaroso. Ia mangawaika kita pomakauNya, pasi to pantuntu tuntuNya, pasi tau to mampakarebaka kareba matao. Pasi Ia mangawaika kita tau to mangangkampang pasi mampotundeka kita. Wali naka pei i Kerisitu mangawaika kita sora to etu see samparia kita to i Pue Allah Puenya darapasilonga see gana karosonta damangika palaong to si Ia. Apa ane ewa see, kita to mangaya, to raporapaka ewa koro i ngKerisitu, kanjo’u-njo’u tiduga-dugang karosonta.

12(4:11)

13Wali palaong etu mawali sampe rata temponya kita samparia mawali samba’a pampobuuka apa saba kita mangaya pasi mangansani Ana i mPue Allah. Tempo si’i kita raporapaka ewa ngana mayunu pei tempo kita mawali samba’a pampobuuka etu, kita damawali ewa tau bose tu’a. Pasi tempo etu kita damasilonga kojo sewaju pei i Kerisitu.

14Apa pamporani i mPue kita tamo ewa ngana mayunu to maya ratipu. Ane tau to ewa wetu, sira maya raporapaka ewa duangan to kanggoli-nggoli naika nu bombang pasi to nakeni nu ngoyu marimbo njo’u-ma’i njo’u-ma’i. Apa sira ojo mangaluluka yau gombo ntau to mampoguru ojo mpangkewanya. Pasi sira naakal ntau to pande mangika songka to manipu. Wali ne’emo kita ewa wetu.

15Pei kasimbalinya yako etu, kita damanganto’oka sa’e anu to monso apa saba mamporayang sira. Wali ane ewa see, samparia pampobuuka ngkita kanjo’u-njo’u kamosu-mosu pampobuuka ntau to bose tu’a to ewa i Kerisitu, Kepala ngkita.

16Apa kita to mangaya rato’oka saga ngkoro i ngKerisitu. Wali ane rapanya koro ngkita to lino, samparia saganya napasingkenta nu yotus pasi ua see saga etu mawali mangika palaonginya samba’a pei samba’a. Pasi yako ri wo’onya semo see naka koro etu maya tuwu pasi maroso. Wali ewa see seja kita. Apa kita roomo rapasimba’a mawali koro i ngKerisitu, pasi Ia semo wo’o ngkita to mangawaika katuwu pasi karoso. Wali ane kita to saga ngkoroNya samparia paka mangika palaong ngkita samba’a pei samba’a, pasi ane kita sangkani singkenta, ane ewa see kita maya mangarata karoso yako ri Wo’onta. See naka kanjo’u-njo’u tiduga-dugang kaboros ntau to rato’oka koro i ngKerisitu. Pasi kanjo’u-njo’u tiduga-dugang kita masiporayang.

17Wali aku samba’a pampobuuka pei i Pue, see naka aku mampatiendoka pasi mampaposiaka komi manganto’o ne’emo mangika lengko ngkatuwu to naika ntau to taa mangansani i Pue Allah. Apa pampobuuka ntau etu tare batuanginya.

18Sira taa nakoto mangansani bara kesaa apa pampobuuka nsira ewa mawuri. Sira longko yako ri katuwu to nawaika i mPue Allah apa sira bo’onya kojo mangansani Ia apa mako’o wo’onya.

19Wali sira taa mangepe sala ane mangika palaong to maja’a. Sira raporapaka ewa tau to re’e royo to makumba pasi male yau. Wali see naka sira ojo mangaluluka yau pamporani ndaya nsira to maja’a pei mangika palaong to masipato rapokea. Mapari kojo naika nsira mangika palaong to makarika apa nempo wimba kalagi ngkaninya sira mangika, sira tawa mangepe gana.

20Pei si’a ewa wetu lengko ngkatuwu to napotundeka i ngKerisitu komi.

21Kamonsonya komi room mangandonge gombo i Yesu pasi Ia room mampotundeka komi singkonong pei anu to monso to nakita ntau ri raya ngkatuwu to si Ia.

22Wali posaka yaumo tau ngkomi to masae. Tau ngkomi to masae etu semo to komi mangaluluka yau tempo ruyu. Apa tau ngkomi to masae etu kanjo’u-njo’u tiduga-dugang kaja’anya apa anu to naporani etu mangantipu yau. Wali see naka posaka yau tau ngkomi to masae etu ewa naika ntau mangawonsu yau baju to masae.

23Pei biakamo i Pue Allah mangawali raya ngkomi pasi pampobuuka ngkomi see mawali bou.

24Pasi lulu tau ngkomi to bou etu ewa naika ntau mamposunsuka baju to bou. Tau ngkomi to bou etu napapowali i mPue Allah see sewaju pei Ia. Wali ane mangalulu tau to bou etu, komi damangika lengko to masipato naika ntau to i Pue Allah Puenya, pasi to singkonong kojo pei Ia.

25Wali posaka yau lengko ngkomi to tempo ruyu. Ne’emo mawuti, pei to’o anu to monso resi yunu ngkomi samba’a pei samba’a. Apa kita samparia paka saga ngkoro i ngKerisitu.

26Wali ane maja’a raya ngkomi, ne’e rabiaka kaja’a ndaya ngkomi etu mawali yau dosa. Pasi ne’e masae kojo maja’a raya. To taotao pakasanang raya ngkomi re’e katawanya eo soyo.

27Apa ane kita maja’a rayanta, gampa kojo i Maja’a mangagoda yau kita.

28Pasi ane tau to malima, ne’emo malima. Pei kasimbalinya yako etu to tao-tao ia mapalaong. Tempo ruyu ia mangampake palenya malima, pei si’i-si’i to tao-tao ia mangampake palenya etu mangika palaong to matao. Wali ane ia mangika ewa wetu ia damangarata gana anu to rapake wali ia maya mangawaika seja santila resi tau to masiasi.

29Wali ne’e rabiaka nganga ngkomi manganto’o gombo to maja’a. Pei ojo to’o gombo to mangansawang pasi to mampakaroso raya nsa’e ewa to masipato. Apa gombo to ewa wetu manoto kojo wali gombo etu mangansawang tau to mangandonge.

30Wali ne’e mangika lengko pasi gombo to mampakamawo i Nosa Mapasing to i Pue Allah Puenya. Apa i Nosa Mapasing maroo ri raya ngkita to mangaya damawali tondong to mampakatantuka palaong to damawali resi kita. Etu semo kita danalapa i mPue Allah yako ri lino madosa si’i.

31Wali posaka yau samparia palaong to mampakamawo i Nosa Mapasing. Palaong to etu ewamo makodi raya, mapoi raya, maja’a raya, matingka, pasi manto’o maja’a sa’e. Posaka yau palaong to etu sindara-ndara pei samparia ngaya nu lengko to maja’a.

32Pei ika anu to manoto resi yunu ngkomi samba’a pei samba’a, pasi masiporayang. Pasi ewa naika i mPue Allah mangalapa sala ngkomi apa saba komi seja samba’a pei i Kerisitu, ewa wetu seja danuika ngkomi mangalapa sala nu yunu ngkomi samba’a pei samba’a.



Download Audio MP3 (Efesus 4):
Mobile (Low Quality) - CD (High Quality)

 <<  Efesus 4 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel