Alkitab Mobile SABDA
[VER] : [TAA]     [PL]  [PB] 
 <<  Galatia 2 >> 

1Wali ojo kaliunya sampuyu pei opo nto’u wo’u aku nayau muni ndeku Yerusalem sindara-ndara pei i Barnabas. Pasi aku mangkeni seja i Titus.

2Naka pei aku nayau ndeku Yerusalem etu apa i Pue Allah roomo nampaponsanika aku Ia rani aku yau. Wali ojo karata mami nda’a ria, kami mampasiromunaka ojo tau to napobuuka nsa’e penatua ntau to mangaya. Panewa aku mampakanasaka sira mangkonong kareba matao to kupakarebaka resi tau to si’a to Yahudi. Naka pei aku mampakanasaka resi sira mangkonong palaong etu see sira damangansani monso pu’u anu to aku mampotundeka. Apa aku moru sangkodi sira bara mampobuuka palaongingku etu tare batuanginya, nempo palaong to aku roomo mangika pasi nempo palaong to dakuika wo’u.

3Pei sira singkonong pei palaong to inikangku etu. Manasa sira singkonong apa i Titus, yunungku to sinjaya-njaya pei aku rata nda’a Yerusalem, ia si’a to Yahudi, pei nempo ewa see sira taa mampakasaaka ia darasui mangalulu porenta i Musa.

4Pei tempo etu re’e seja bara sawei mba’a to panipu to siromu sindara-ndara pei kami. Tau etu mampoanika pua’i to samba’a pangaya, pei kamonsonya taa. Naka pei sira siromu sindara-ndara pei kami apa rani mangansani ane kita to samba’a pei i Kerisitu Yesu wimba bara tiroowa mangalulu porenta i Musa, bara tamo. Kamonsonya sira rani mampakasaaka kita mangalulu muni porenta i Musa see kita damawali ewa watua mporenta etu. Pasi sira rani mampakasaaka i Titus darasui.

5Pei kami taa kojo mampalaika songka nsira etu naka ne’e darawali yau kareba matao to monso to room rapotundeka resi komi.

6Wali tempo aku magombo resi penatua mampakanasaka sira ewa wimba aku mangika mampotundeka tau to si’a to Yahudi kareba matao, tempo etu sira singkonong pasi tare to yusa nato’o nsira radugangika wo’u anu to kupotundeka etu. Wali penatua etu ane ri pangkita ntau sira bae kojo angganya. Pei si’a angga nsira to bae batuanginya resi aku, apa i Pue Allah taa mampasisala tau.

7Pei to bae batuanginya resi aku penatua etu taa mangawali kareba to aku mampotundeka tau. Kasimbalinya yako etu sira manasa aku semo to nasarumakaka i mPue Allah mampakarebaka kareba matao resi tau to si’a to Yahudi, sewaju ewa i Petrus nasarumakaka i mPue Allah mampakarebaka kareba matao resi to Yahudi.

8Apa yako kuasa i mPue Allah semo naka pei i Petrus mawali pomakau i mPue Yesu resi to Yahudi. Pasi ewa see seja yako kuasa i mPue Allah naka pei aku mawali pomakau i mPue Yesu resi tau to si’a to Yahudi.

9Wali yako etu penatua to rato’oka tinja to mampakaroso tau to mangaya, etu semo i Yakobus sira togo i Petrus pasi i Yohanes, sira manasanya aku monso pu’u nawaika i mPue Allah sora yako ri kanotoNya. Etu semo palaong to bae kojo batuanginya etu. Wali see naka sira mangaranga pale mami dua i Barnabas mangika tondong kami samba’a palaong pei sira. Sira manganto’o, “Kami singkonong komi yau resi tau to si’a to Yahudi pasi kami yau resi to Yahudi.”

10Pei re’e samba’a paposia to nato’oka nsira kami, etu semo, ne’e mangkalingan mangansawang to Yahudi to masiasi. Pei ewa wetu yami pampobuuka to si aku, apa aku rani kojo mangika ewa wetu.

11Wali ane tau to mampakasaaka sa’e mangalulu porenta i Musa pasi ada nto Yahudi, aku taa meka mangewa sira, apa palaong nsira etu sala. Ewa seore, tempo aku nja’u nja’u kota Antiokhia, yako see rata seja i Petrus nja’u ria. Tempo ia owo rata etu, ia masanang mangkoni sindara-ndara pei tau to mangaya to si’a to Yahudi. Pei yako see rata seja bara sawei mba’a to Yahudi to mangaya to ma’i napokau i Yakobus. Wali ojo karata ntau etu, i Petrus mampakalongko yako resi tau to si’a to Yahudi pasi bo’onyamo mangkoni sindara-ndara pei sira apa mangalulu muni ada nto Yahudi. Wali aku manganseko ia apa saba palaonginya etu sala kojo. Naka pei ia mangika palaong to etu apa ia meka danapakasala nto Yahudi to manganto’o tau to mangaya to si’a to Yahudi taa maya taa rasui damawali seja to Yahudi.

12(2:11)

13Pasi si’a ojo i Petrus to mawuni yau lengkonya etu. Samparia pua’i ngkita to Yahudi paka mangaluluka yau seja lengko i mPetrus etu. Apa lo’a, sakowa i Barnabas mangika seja lengko to etu.

14Wali aku mangkita palaong to naika nsira etu taa singkonong pei batuanginya kareba matao to monso, wali tempo aku mangkita palaong to etu aku manganseko i Petrus ri tango mata nsira samparia. Aku manganto’o, “Korom to Yahudi, pei korom tamo mangalulu ada nto Yahudi. Korom mangalulu ada ntau to si’a to Yahudi. Wali gete, ane ewa see, maka pei korom mangika lengko to mampakasaaka tau to si’a to Yahudi see sira taa maya taa mangaluluka ada nto Yahudi?” Wali ewa wetu gombongku manganseko i Petrus ri tango mata ntau boros.

15Pasi aku manganto’oka wo’u, “Kita to Yahudi yako ri kare’enta, kita si’a tau to si’a to Yahudi. Ane tau to si’a to Yahudi, korom mangansani tempo ruyu kita mampobuuka sira tau madosa apa sira taa mangalulu porenta i Musa.

16Pei si’i-si’i kita tansani si’a yako tau mangalulu porenta i Musa naka pei ia nato’o i mPue Allah tare dosanya. Yako pangayanya resi i Yesu Kerisitu naka pei tau nato’o i mPue Allah tare dosanya. Wali kita mangansani etu, see naka ewa see seja to naika ngkita. Kita roomo mangaya i Kerisitu Yesu see yako pangayanta resi i Kerisitu Yesu etu kita maya nato’o i mPue Allah tare dosanta. Si’a yako kita mangalulu porenta i Musa, apa tare pasi samba’a tau to danato’o i mPue Allah tare dosanya ane ojo mangalulu porenta i Musa.

17Wali kita mansarumaka gombo i mPue Allah to manganto’o kita tare dosanta apa saba kita mangaya i Kerisitu. Wali kita tamo mansarumaka porenta i Musa, see naka kita nato’o nsa’e tau madosa seja sewaju ewa tau to si’a to Yahudi. Wali ane monso pu’u to nato’o nsira etu, batuanginya yako pangayanta resi i Kerisitu semo naka pei kita madosa. Pei taa monso ewa wetu. Taa kojo dosa ane kita mamposaka yau pansarumakanta ri porenta i Musa see jamo i Kerisitu to isarumakanta.

18Pei ane aku mangandolika muni tangongku damangalulu muni porenta i Musa to aku roomo mamposaka yau seore, ane ewa see manasa aku mangewa porenta to monso.

19Pei aku taa mangika ewa wetu, apa si’isi’i aku mangansani naka pei aku nato’oka i mPue Allah tare dosangku, si’a saba aku mangalulu porenta i Musa, apa aku taa kojo kukurang mangalulu porenta etu. See naka aku mangandolika tangongku yako ri porenta etu see aku maya mangalulu kojo pamporani i mPue Allah. Wali saba yako pangayangku resi i Kerisitu, see naka aku raporapaka ewa rapaku ri kaju pasape sindara-ndara pei Ia.

20Wali aku raporapaka ewa matemo, see naka si’amo aku to tuwu si’i, i Kerisitu semo to tuwu ri rayangku. Pasi ri raya ngkatuwungku ri lino si’i aku mangika lengko ngkatuwu to singkonong pei pangayangku resi Ana i mPue Allah. Apa Ia mamporayang aku pasi nangkapateka aku.

21Pei ane yako mangalulu porenta i Musa semo naka pei tau maya nato’o i mPue Allah tare dosanya, ane ewa see tare batuanginya kapate i ngKerisitu etu. Wali tau to manganto’o ewa wetu, tau etu sewaju ewa manganto’o tare batuanginya kanoto i mPue Allah mangawai AnaNya etu. Wali gete, aku bo’ongku manganto’o ewa wetu.” Wali etu semo gombongku resi tau to nja’u Antiokhia seore.



Download Audio MP3 (Galatia 2):
Mobile (Low Quality) - CD (High Quality)

 <<  Galatia 2 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2020
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran