Alkitab Mobile SABDA
[VER] : [TAA]     [PL]  [PB] 
 <<  Ibrani 6 >> 

1Wali anu kita kanjo’u-njo’u kadota-dota maguru Tuntu i mPue Allah to masuli wo’u rapangansani see kita damawali ewa tau bose tu’a, si’amo ewa ana kodi. Ne’e kita ojo maguru-guru anu to uyunya rapotundeka resi kita mangkonong i Kerisitu, apa anu to etu raporapaka ewa pondasi banua. Pasi ane pondasi roomo raika, tare batuanginya raika wo’u kadua ngkaninya. Wali tamore batuanginya kita sangkani maguru ojo anu to rapotundeka ruyu to raporapaka ewa pondasi etu. Ewamo kita roomo maguru mangkonong ewa wimba naika ntau mangandolika tangonya yako palaong to tare batuanginya pei mangaya i Pue Allah.

2Pasi kita roomo maguru mangkonong pambaptis to mpangaya-ngaya, pasi mangkonong ada mamposaka pale ri wawo mbo’o ntau, pasi mangkonong pambangu muni ntau mate yako ri kapatenya, pasi mangkonong huku to singkasaenya.

3Wali tuwu-tuwuja i Pue Allah damangansawang kita, see kita kanjo’u-njo’u kadota-dota damangaguru anu to masuli wo’u yako to etu.

4Wali re’e tau to roomo rapakanasaka mangkonong kareba matao, pasi sira manasamo mangkonong sora to yako ndate saruga. Pasi sira room seja mangarata pansawang i Nosa Mapasing.

5Pasi tau etu roomo mangepe Tuntu i mPue Allah matao kojo, pasi room seja mangepe kuasa to danapaporaoka i mPue Allah tau ri tempo to daratamo.

6Wali tau to ewa wetu, ane mampiyaika yau samparia to etu, taa kojo re’e jaya mangkeni muni sira damajea. Apa yako palaong etu sira mawali ewa tau to nangampaku Ana i mPue Allah ri kaju pasape pasi mangarunes Ia ri pangkita ntau boros.

7Wali tau raporapaka ewa tana to nawaika i mPue Allah rasi, etu semo uja. Wali re’e tana to mandudu masimisi ane tempo tudu uja etu, see naka yako ri tana etu tuwu pinamuya to bae batuanginya resi to pomuya.

8Pei re’e wo’u tana to nawaika seja i mPue Allah uja pei taa masimisi uja etu, see naka ojo kaya pasi rui to tuwu nja’u ria. Wali tana to etu tare batuanginya pasi mosu danatanaa yau ntau puenya. Pasi ri kapuranya tana etu danatunju yau ntau puenya, wali tare kalingaa yako ri tana etu.

9Wali a’i-a’i to kami mangamporayang, nempo kami magombo mangkonong tana to ratanaa yau etu, pei kami manasa si’isi’i lengko ngkomi taa sewaju pei lengko ntau to raporapaka ewa tana to maja’a etu. Apa komi mangika lengko to masipato naika ntau to rapalaes.

10Etu semo komi roomo mangansawang tau to i Pue Allah Puenya pasi tiroowa mangansawang sira, wali yako palaong to etu komi mampaporaoka pamporayang ngkomi resi i Pue Allah. See naka Ia taa damangkalingan palaong to nuika ngkomi pasi pamporayang ngkomi resi Ia. Naka pei kita mangansani Ia taa mangkalingan, apa i Pue Allah sangkani mangika ewa wimba to masipato raika

11Wali komi madota kojo samba’a pei samba’a mangika palaong to etu, wali ewa wimba kabaenya kadota ngkomi etu, ane ewa pamporani mami, ewa see seja kadota ngkomi rataka ri tempo ngkapate ngkomi, see komi damangarata anu to rasarumaka i Pue damangawaika komi.

12Pasi kami taa rani komi meyoko. Kami rani komi mampasiwajuka lengko ntau to maroso pangaya nsira pasi bae sabara nsira, see naka sira mangarata anu to naparajanjika i mPue Allah sira.

13Wali pobuuka i Abraham. I Pue Allah mangika parajanji resi i Abraham tempo owi. Pasi tempo Ia mangika parajanji etu, Ia mampakatantu kojo parajanjiNya, wali Ia mangampake sanga to si Ia damampakatantu kojo parajanji etu. Apa tare yusa to bae wo’u kuasanya pei i Pue Allah.

14Wali Ia manganto’o, “Monso pu’u Aku damangawaika korom rasi pei damangawaika korom malagi wiyaamu.”

15Wali yako etu i Abraham bae sabaranya mangampeas panewa ia mangarata anu to naparajanjika i mPue Allah ia etu.

16Wali ane to lino rani mampakatantu parajanji to naika nsira, sira mangampake sanga ntau to bae wo’u kuasanya pei sira. Pasi ane sira mampakatantu parajanji nsira ewa wetu, tamore tau to damangabanta wo’u gombo nsira etu.

17Wali ewa see seja to naika i mPue Allah. Tempo Ia mangika parajanjiNya resi i Abraham etu, Ia rani mampakanasaka kojo tau to damangarata parajanji etu Ia taa damangawali songkaNya. Wali see naka Ia mangampake sangaNya mampakatantu parajanjinya etu.

18Wali i Pue Allah taa maya mawuti, wali see naka manasa Ia taa mawuti tempo Ia mangika parajanjiNya. Pasi Ia taa seja mawuti tempo Ia mangampake sangaNya mampakatantu parajanjiNya etu. Pasi samparia gombo to ito’okaNya tempo mangika parajanji pasi tempo mampakatantu parajanjiNya etu taa kojo damambali. Wali see naka kita to roomo mampago i Pue Allah darapalaes, kita rapakaroso rayanta see tare pandoonya mansarumaka i Pue Allah pasi mangampeas anu to Ia roomo mamparajanjika, to kita damangarata.

19Wali paranjanji to kita mansarumaka etu, parajanji etu raporapaka ewa watu balango to mampakainti pasi mampakarodo bangka ri wawo nue. Apa yako parajanji etu see naka raya ngkita maroso pasi rodo apa kita masingkatao pei i Pue Allah. Wali kita ewa roomo masua ri songi to mapasing kojo liu ri rindi ronto pei mampotango i Pue Allah.

20I Yesu roomo mampatiruyu pei kita masua ri raya songi etu. Pasi Ia mamponsaruka kita apa Ia mawalimo to pampue to bae anggaNya, sewaju ewa i Melkisedek tempo owi.



Download Audio MP3 (Ibrani 6):
Mobile (Low Quality) - CD (High Quality)

 <<  Ibrani 6 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel