1Wali i Melkisedek etu, ia makole ri kota Salem tempo owi. Pasi ia to pampue to mangika palaong i mPue Allah to mangkuasang samparia. Wali tempo i Abraham mawolili muni yako mamusu manganangi makole-makole, tempo etu ma’i i Melkisedek mangantomu ia. Panewa i Melkisedek mamporapika resi i Pue Allah see Ia damangawaika i Abraham rasi.
2Wali i Abraham mangawaika i Melkisedek santila sampuyu yako samparia ngaya-ngaya to inokonya tempo mamusu etu. (Wali batuanginya sanga i Melkisedek, to uyunya etu semo, “Makole to mangika lengko to singkonong pei i Pue Allah.” Pasi to kadua, ia rato’oka seja, “Makole ri Salem,” batuanginya, “Makole to mangkeni kasingkatao.”)
3Wali ane mangkonong i Melkisedek etu, tare ratulis mangkonong pa’anya pei indonya pei wiyaanya. Pasi taa seja re’e bara kesaa ratulis mangkonong kare’enya bara kapatenya. Pei ia ewa Ana i mPue Allah, apa ia tiroowa to pampue rataka singkasaenya.
4Wali pobuuka ruyu mangkonong kabaenya angga i Melkisedek. Ia bae kojo angganya. Apa i Abraham, bue ngkita to napilis i mPue Allah tempo owi, ia bae angganya. Pei nempo ewa see ia tiroo mangawaika i Melkisedek santila sampuyu yako samparia ngaya-ngaya to i nokonya tempo mamusu.
5Wali ane rapanya i Melkisedek samba’a wiyaa i Lewi, ane ewa see manasa resi kita naka pei ia rawaika santila sampuyu etu saba ia wiyaa i Lewi semo. Apa wiyaa i Lewi semo to napilis i mPue Allah mawali to pampueNya. See naka sira nato’oka mporenta i Musa mangantima santila sampuyu yako samparia anu to narata nto Israel, etu semo pua’i nsira. Nempo samparia sira paka wiyaa i Abraham, pei wiyaa i Lewi to mangantima santila sampuyu etu.
6Pei i Melkisedek si’a wiyaa i Lewi. Pei nempo ewa see, ia tiroo mangantima santila sampuyu yako ngaya-ngaya to narata i Abraham. Apa ia to pampue to bae wo’u angganya pei wiyaa i Lewi. Pasi ewa see seja ane mangkonong rasi. Apa i Abraham semo to re’e parajanji i mPue Allah, wali ia bae kojo angganya. Pei nempo ewa see, i Melkisidek tiroo mamporapika resi i Pue Allah mangawaika i Abraham rasi.
7Wali manasa kojo tau to mampakarasi sa’e, tau etu semo to bae-bae angganya pei tau to mangarata rasi etu. Wali miyala i Melkisedek semo to bae-bae angganya pei i Abraham.
8Pasi re’e wo’u pasisalanya, apa ane to pampue to wiyaa i Lewi to mangantima santila sampuyu, sira ojo tau to damate seja. Pei ane i Melkisedek to mangantima santila sampuyu yako resi i Abraham etu, tare ratulis mangkonong kapatenya, wali ane ewa ratulis ri Tuntu i mPue Allah, ia tuwu.
9Wali i Lewi, bue nto pampue to mangantima santila sampuyu yako resi yunu nsira, pasiwa ia seja mangawaika i Melkisedek santila sampuyu tempo i Abraham mangawaika ia etu
10Apa tempo i Melkisedek mangantomu i Abraham i Lewi tawa re’e. Pei tempo i Abraham mangawaika i Melkisedek pampuenya etu, i Lewi maya rapobuuka ewa ia seja mangawaika, apa ia re’e ri raya ngkoro i Abraham apa ia wiyaa i Abraham. Wali manasa kojo i Melkisedek semo to bae-bae angganya pei i Abraham sira dua i Lewi.
11Wali porenta i Musa to rawaika resi to Yahudi, porenta etu taa maya maga’a yako ri palaong ntau to wiyaa i Lewi. Pei palaong nto pampue etu taa gana damangika see tau mawali masilonga ri pangkita i mPue Allah. Apa ane gana palaong nsira, tamo re’e batuanginya pasuwu nto pampue to yusa. Pei taa kojo gana palaong nsira, see naka masuwu to pampue to mangabolos sira. Wali ane to pampue to wiyaa i Lewi rabolosika to pampue to yusa, ane ewa see, taa maya taa porenta i Musa rabolosika seja porenta to yusa. Apa to pampue to mangabolos wiyaa i Lewi, ia taa sewaju pangkaNya pei pangka i Harun to nato’o mporenta i Musa. Ia sewaju pei i Melkisedek semo.
12(7:11)
13Wali manasa to pampue to tempo ruyu etu roomo rabolos, apa to pampue to bou, to napilis i mPue Allah, Ia samba’a wiyaa i Yehuda, si’a wiyaa i Lewi. To pampue etu, etu semo Pue ngkita. Pei ri katawanya etu tawa re’e tau to wiyaa i Yehuda to mangika palaong nto pampue nja’u palampa. Apa tempo i Musa magombo mangkonong to pampue, ia tare pasi sangkani manganto’o wiyaa i Yehuda damangika palaong to etu.
14(7:13)
15Wali manasa wo’u resi kita to pampue to tempo ruyu roomo rabolosika to pampue to yusa apa i Pue Allah mangampilis wo’u to pampue to yako ri wiyaa to yusa. Wali apa saba i Pue Allah mangampilis tau yako ri wiyaa to yusa, manasa resi kita tau to wiyaa i Lewi tamo rapake. To pampue to napilis i mPue Allah etu sewaju ewa i Melkisedek.
16Tau etu raokotaka mawali to pampue si’a yako kuasa mporenta to manganto’o ojo wiyaa i Lewi to maya mawali to pampue. Ia raokotaka mawali to pampue yako kuasa ngkatuwuNya to tare kapuranya.
17Kita mangansani etu apa re’e gombo i mPue Allah to ratulis ri raya ntuntuNya, Ia mampogomboka AnaNya, to’oNya, “Komi mawalimo to pampue rataka ri singkasaenya, sewaju ewa i Melkisedek tempo owi.” Etu semo gombo to ratulis ri raya ntuntu i mPue Allah.
18Wali porenta to ruyu room raposaka yau apa mayu’u pasi tare batuanginya.
19Apa ane porenta i Musa, taa nakurang mampasilonga bara kesaa. Wali porenta etu rabolosika anu to matao wo’u to kita maya mansarumaka, see kita maya mosu resi i Pue Allah.
20Pasi re’e wo’u to mampakanasaka kita jaya to bou etu to tao-tao pei jaya to masae. Apa tempo i Pue Allah mangokotaka i Yesu mawali to pampue, Ia mamparajanjika kojo Ia.
21Ane tau to yusa mawali to pampue, i Pue Allah tare mangika parajanji resi sira. Pei tempo i Yesu mawali to pampue, tempo etu i Pue Allah mamparajanjika kojo Ia, to’oNya, “Aku, i Pue, room mamparajanjika kojo pasi Aku taa damambali pampobuukangKu, Aku manganto’o, ‘Komi mawali to pampue rataka ri singkasaenya.’” Etu semo parajanji i mPue Allah.
22Wali apa saba parajanji etu, see naka i Yesu semo roomo mawali to mampansaruka to mangabanang parajanji to naika i mPue Allah resi kita. Parajanji to nikaNya resi kita etu to tao-tao wo’u pei parajanji to nikaNya resi to Israel tempo owi.
23Wali ane to pampue to wiyaa i Lewi, sira malagi apa sira ojo to lino to mate yau. Wali sira taa singkasaenya palaong nsira samba’a pei samba’a.
24Pei i Yesu tuwu singkasaenya, wali Ia to pampue to taa darabolosika yau tau to yusa.
25Wali see naka Ia nakurang mangampalaes samparia kita to mangampago i Pue Allah apa saba pansarumakanta resi Ia. Ia nakurang mangampalaes kita rataka ri singkasaenya apa Ia tuwu singkasaenya damamponsaruka kita ri tango i mPue Allah.
26Wali to pampue to bae anggaNya to ewa wetu semo to naparluu ngkita. Apa Ia mapasing, pasi tare lengkoNya to masipato napakasala nsa’e pasi tare lengkoNya to makarika. Pasi Ia raga’a yako resi tau to madosa. Pasi Ia raokotaka nto’u tampa to bae kojo angganya, ri wawonya samparia yangi.
27Ia si’a ewa to pampue to bae angganya to yusa. Apa ane sira, sira tau madosa see naka sira taa maya taa ponto eo mangangkeni pampue pei mampampueka see i Pue Allah tamo damangkitanaka dosa nsira, panewa roo see mampampueka wo’u pampue to nakeni nsa’e see dosa ntau etu tamo seja darakitanaka. Pei i Yesu tare dosaNya see naka Ia ojo mangkeni samba’a pampue, etu semo koroNya. Pasi Ia ojo sangkani mampampueka pampue etu mangansompo dosa nto lino samparia. Pasi pampue to etu ganamo rataka ri singkasaenya.
28Wali porenta i Musa mampakatantu tau damawali to pampue to bae angganya. Pei tau to rapakatantuka etu, tau to mayu’u. Pei karoonya i Pue Allah mangawaika i Musa porenta etu, roo see ratamo temponya Ia mangika parajanji to maroso kojo. Wali parajanjiNya etu mampakatantu Ananya mawali to pampue to bae anggaNya. Wali AnaNya etu mawali to pampue to masilonga kojo rataka ri singkasaenya.
Download Audio MP3 (Ibrani 7):
Mobile (Low Quality) - CD (High Quality)
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel