Alkitab Mobile SABDA
[VER] : [TAA]     [PL]  [PB] 
 <<  Lukas 5 >> 

1Wali re’e seore i Yesu makore ri towo ndano Genesaret to rato’oka seja rano Galilea. Tempo Ia makore nja’u ria Ia mampakarebaka resi tau boros tuntu i mPue Allah. Wali tau to mampodongeka gomboNya etu boros kojo ri towo ndano see naka mangajuju Ia.

2Wali tempo etu i Yesu mangkita dua bangka nto panjala to re’e ri towo ndano etu. Tau pue nu bangka etu tamo re’e ri rayanya apa sira tongonya mamposo’i jala-jalanya.

3Wali i Yesu mapone ri samba’a bangka etu to i Simon Petrus puenya. Panewa Ia mamporapika resi i Simon see ia mangantuko sangkodi bangka etu njo’u wawo ndano sangkodi. Wali ojo karoonya i Simon mangika palaong to etu, i Yesu matunda pei mampotunde tau boros yako ri raya nu bangka etu.

4Ojo karoonya Ia mampotunde sira, Ia manganto’oka i Simon, “Keni bangkamu njo’u ue to mayombu pei soumaka jalamu to bae damangajala bau.”

5Pei i Simon manganto’o, “Pa’a Guru, kami mandasai mapalaong mburi rataka eo pei kami tare mangarata bara kesaa. Pei nempo ewa see, ane Komi manganto’oka aku mansoumaka jalangku, dakuika.”

6Wali i Simon pasi yununya mapone ri bangkanya pei mangika ewa wimba nato’oka i Yesu i Simon etu. Sira mangkeni bangka etu njo’u ue to mayombu pei mansoumaka jala nsira lo’u ue. Ojo karoonya sira mangika palaong to etu, panewa sira mangarata bau boros kojo see naka jala etu damarapamo.

7Wali sira mampokio yunu nsira to nja’u bangka to yusa see sira dama’i mangansawang. Wali yunu nsira etu yau mangansawang. Sira mamporomung bau etu pei mamposaka ri raya bangka to dua etu naka buke kojo see naka datondumo.

8Wali tempo i Simon Petrus mangkita palaong to etu, ia mambokotu yau ri tango i Yesu pei manganto’o, “Piyaika aku, Pue, apa aku tau madosa! Taa masipato aku siwaka pei Komi!”

9Naka pei ia manganto’o ewa wetu apa ia pasi samparia yununya to samba’a bangka pei ia paka ipu raya nsira apa saba yako kuasa i Yesu see naka re’e bau to boros kojo to narata nsira etu.

10Pasi ewa see seja yunu i nSimon Petrus to re’e ri bangka to kadua. Etu semo i Yakobus sira dua i Yohanes, ana i nSebedeus. Wali i Yesu manganto’oka i Simon, Ia manganto’o, “Ne’e meka. Tempo si’i korom to panjala bau, pei Aku damangawaika korom palaong to bou. Wali si’amo bau to danuliwu ngkorom. Korom damangansale tau see sira damangalulu seja Aku.”

11Wali yako etu sira mangkeni muni bangka-bangka nsira njo’u towo ndano panewa sira mampiyaika yau bangka etu pasi samparia ngayangaya nsira to yusa pei mangalulu i Yesu.

12Wali re’e seore i Yesu nja’u samba’a kota. Nja’u ria re’e samba’a tau to masaki malobo mapari kojo. Wali ngkai etu re’e mangkita i Yesu, panewa yau resi Ia pei mamo’o yau ri wawo ntana ri tangoNya pei mampue mampakabae Ia. Ia mamporapi darasawang, to’onya, “Pue, ane nuporoe, Komi nukurang mampakatao muni aku.”

13Wali i Yesu mampotaka ia pei manganto’o, “Kuporoe. Korom matao munim si’i-si’i.” Wali ngkai etu mansaka matao muni. Tamo re’e saki malobo resi ia.

14Wali ojo karoonya tau to masaki malobo rapakatao muni, i Yesu mamporentangika ia, to’oNya, “Intamo, pei ne’e kojo mangansaritaka sa’e palaong to nawali resi korom etu. Pei intamo njo’u to pampue pei to’oka ia mamparesa korom see ia damangkita korom roo muni masaki. Panewa kenika ia dua mba’a tonsi to darapampueka resi i Pue Allah singkonong ewa porenta i Musa. Ika ewa wetu see korom damayongo muni ri pangkita i mPue Allah. Pasi tempo tau boros mangkita korom mangika pampue etu, palaong etu damawali tondong resi sira korom tamo re’e panyaki to malao.” Etu semo porenta i Yesu resi ngkai etu.

15Pei nempo Ia manganto’oka ngkai etu ne’e mangansaritaka sa’e mangkonong palaong etu, pei kareba to mangkonong i Yesu kanjo’u-njo’u natikareba-reba wo’u resi tau. See naka boros kojo tau to mangampago Ia damangandonge gomboNya pasi darapakatao muni yako ri panyaki.

16Pei i Yesu mananya mangampago tampa to tare tau mangkaroos, yau damakai-kai resi i Pue Allah.

17Wali re’e seore i Yesu mampotunde tau ri raya banua ntau. Tempo Ia mampotunde etu, re’e seja matunda nja’u ria bara sawei mba’a to Yahudi to aliran Parisi pasi sawei mba’a tau to mampoguru porenta i Musa. Tau etu yako ponto lipu ntau nja’u propinsi Galilea pasi yako propinsi Yudea pasi kota Yerusalem kama’inya. Pasi re’e kuasa to nawaika i mPue Allah i Yesu see naka Ia maya mampakatao muni tau to masaki.

18Wali see naka tongo-tongonya Ia mampotunde etu, ma’i sawei mba’a tau mangkenika Ia ngkai to malulu koronya. Ngkai etu nalempa nsira ri wawo lima-lima. Wali sira rani masua ri raya banua nakare’e i Yesu pei mamposaka tau masaki etu ri tango mbiti i Yesu.

19Pei tempo sira rata nja’u banua etu, sira taa mangarata jaya damasua ri rayanya apa tau boros kojo. Wali see naka sira mapone ri wawo banua panewa mangayali yau sangkodi ata. Panewa yako ri wayau ri ata to nayali nsira etu, sira mangayuyu tau to malulu koronya etu sigalo lima-limanya rata ri tango i Yesu ri oyo ntau boros.

20Wali tempo i Yesu mangkita anu to naika nsira etu, Ia mangansani sira mansarumaka kojo Ia. Wali see naka Ia manganto’oka tau to malulu koronya, Ia manganto’o, “A’ingKu, dosamu roomo ralapas yau.”

21Wali tempo i Yesu manganto’o gombo etu re’e bara sawei mba’a to Yahudi to aliran Parisi pasi tau to mampoguru porenta i Musa, sira mangandonge. Wali sira mampobuuka, “Gete tau si’i! Ia mampoanika i Pue Allah, apa ojo i Pue Allah semo to nakoto mangalapas dosa ntau.”

22Pei i Yesu mangansani pampobuuka nsira etu. See naka Ia manganto’oka sira, “Maka pei komi mampobuuka ewa wetu?”

23Panewa i Yesu manganto’oka wo’u sira, “Kamonsonya ane manganto’oka ngkai to malulu koronya si’i, ‘Dosamu roomo ralapas yau,’ sewaju kasulinya pei manganto’oka ia, ‘Pakore pei palinja.’ Naka pei sewaju kasulinya apa paka taa mawali ane tau to manganto’o gombo etu pei tare kuasanya damangika palaong to nato’o etu.

24Wali Aku semo to rapokau yako ndate saruga danapoanaka nto lino see maya rato’oka Wiyaa nto Lino. Wali monso pu’u Aku re’e kuasa ri lino damangalapas dosa ntau. Pasi palaong to maya mampakanasaka komi kuasangKu etu, etu semo Aku damampakatao muni ngkai si’i.” Wali yako etu i Yesu manganto’oka ngkai malulu koronya, “Pakore pei okotaka lima-limamu pei pawolili muni ri banuamu.”

25Wali ngkai etu mansaka makore ri tango nsira pei mangokotaka lima-limanya pei mawolili muni njo’u banuanya! Pasi ri rayanya ia mangika ewa wetu ia mangabarong kojo i Pue Allah.

26Wali ipu kojo raya ntau boros mangkita palaong to etu. Sira mangabarong i Pue Allah. Pasi sira meka seja rayanya pei manganto’o, “Gete! Taa kojo rapobiasa palaong to ikitanta seo si’i.”

27Wali yako etu i Yesu mako yau pei mangkita samba’a tau to pantagi asele sanganya i Lewi. I Lewi etu matunda mapalaong ri banua biasa napangabayar ntau asele. Wali i Yesu mangansale ia, to’oNya, “Yau lulu Aku damawali anagurungKu.”

28Wali i Lewi makore pei mampiyaika samparia to nja’u banua etu pei mangalulu i Yesu.

29Yako etu i Lewi mangikaka i Yesu roa bae ri banuanya. Wali tempo sira mangkoni etu, ma’i boros kojo tau to pantagi asele seja sewaju ewa i Lewi, pasi boros tau to yusa, sira ma’i mangkoni sindara-ndara pei sira ri roa etu.

30Pei tempo sira mangkoni etu, re’e to Yahudi to aliran Parisi pasi tau to mampoguru porenta i Musa to joa nto Parisi etu, sira mangkita palaong to etu yako ri sambali banua. Wali sira sakambumbu, sira manganto’oka anaguru i Yesu, “Maka pei komi mangkoni pasi manginu sindara-ndara pei to pantagi asele pasi tau to yusa to nato’oka seja ntau ‘tau madosa’ etu?”

31Wali ojo pangandonge i Yesu gombo nsira manto’o maja’a tau etu, Ia mangaligi sira, Ia manganto’o, “Si’a tau to taa masaki mamporani dokter, pei tau to mangansani ia masaki, tau etu semo to rani nasawang ndokter.

32Wali Aku ma’i si’a ma’i mangansale tau to mampobuuka taa sala. Aku ma’i mangansale tau to madosa see sira damajea. See naka Aku mangkoni sindara-ndara pei tau madosa etu.” Etu semo gombo i Yesu mangansono tau etu.

33Wali re’e tau to manganto’oka i Yesu, “Anaguru i Yohanes to Pombaptis mandudu mangorop pasi makai-kai, pasi ewa see seja anaguru nto Yahudi to aliran Parisi. Wali maka pei anaguru to si Komi taa mangorop? Sira ponto-ponto eo mangkoni pasi manginu.”

34Wali i Yesu mangansono gombo etu, Ia rani sira mangansani taa masipato anaguruNya mangorop tempo Ia tiroowa re’e resi sira, wali Ia manganto’o rapa mangkonong to langkai to darapaporongo pasi mangkonong galung ngkai etu. Ia mangamporapaka anaguruNya ewa galung nto langkai to darapaporongo etu. Ia manganto’o, “Wimba, ane re’e roa mpaporongo, ane galung nto langkai to darapaporongo sira tiroowa mampakasanang sindara-ndara pei ia ri roa etu, wimba galunginya etu bara mangorop, bara taa? Taa kojo saba masanang!

35Pei ane tongotongonya sira mampakasanang etu, panewa kodi majoli rata bali ngkai to darapaporongo etu pei mangkeni yau ia, tempo etu semo panewa galunginya damangorop saba masusa raya nsira. Wali ewa see seja anagurungKu. Apa darata temponya Aku danakeni yau nu balingKu yako ri oyo nu anagurungKu etu, wali tempo etu semo sira damangorop.”

36Wali yako etu i Yesu rani sira mangansani taa matao ane ada nto Yahudi to masae pei ojo radugangika wo’u anu to bou to Ia mampotundeka. See naka Ia mamporapaka wo’u, Ia manganto’o, “Ane re’e pake to masae pei masia yau, pake etu kita taa mangantampolika kain to yako ri pake to bou. Apa ane kita mangoko kain yako ri pake to bou, kita ojo mampakaja’aka yau pake to bou etu, pasi panampol etu taa sewaju ta’anya pei pake to masae. See naka taa matao mampake kain yako ri pake to bou ane mantampol pake to masae.

37Pasi kita seja ane re’e tule to bou, kita ne’e mampoyali la’u raya mpela binatang to masaem, apa ane la’u raya mpela binatang to masaem, tamo maya mone apa mako’om pelanya etu. Wali tempo tule etu mawali yua, senoanya mawali tipunto, wali maputu, masia yau pela binatang etu. Wali tule etu roo manja’at yau pasi pela binatang seja mawali maja’a yau.

38See naka matao ane tule to bou kita mampoyali la’u raya mpela binatang to bou seja see taa manja’at yau tule pasi taa seja maja’a yau pela etu.

39Pasi monso seja ane tau to mananya manginu tule to masaem, tau etu taa rani manginu tule to bou, apa ia manganto’o, ‘Tule to masaem semo to manami kojo.’” Wali etu wo’u rapa to nato’o i Yesu mampaponsanika sira ane tau to mananya mangalulu ada to masae, tau etu taa rani mangalulu wo’u anu to bou to Ia mampotundeka.



Download Audio MP3 (Lukas 5):
Mobile (Low Quality) - CD (High Quality)

 <<  Lukas 5 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel