1Wali yako etu re’e seore, ri Eo Rapandoo, i Yesu pasi kami to anaguruNya kami malinja. Kami mangalulu jaya to liu ri raya nawu ntau. Wali tempo kami ri raya mpalinja etu, kami to anaguru i Yesu mawali moro kompo mami wali kami mangkisu-kisu wua nu labu gando pei mangkoni ri raya nawu ntau etu.
2Wali tempo etu re’e to Yahudi to aliran Parisi sira mangkita kami to anaguru i Yesu mangkisu-kisu wua nu labu gando etu. Wali sira manganto’oka i Yesu, “Lo’aja! AnaguruMu mangkisu-ngkisu wua nu labu gando. Etu sewaju ewa tau mapalaong. Pei ane ewa porenta i Musa, tau taa maya mangika palaong ri Eo Rapandoo.”
3Wali tempo i Yesu mangandonge sira manto’o maja’a kami, Ia manganto’oka sira, to’oNya, “Wimba, komi bara tare mangabasa ri tuntu i mPue Allah mangkonong kesaa to naika i Makole Daud tempo owi, tempo ia pasi joanya moro kompo nsira?
4Tempo etu i Daud masua ri raya banua i mPue Allah panewa ia pasi joanya mangkoni roti to roomo rapampueka resi i Pue Allah. Roti etu ane ewa porenta i Musa ojo patanya to pampue maya mangkoni. Ane tau to yusa taa maya. Pei tempo i Daud pasi joanya mangkoni, sira taa rato’oka sala.
5Pasi si’i wo’u mangkonong to pampue. Wimba, komi bara tare mangabasa to ratulis ri raya mporenta i Musa mangkonong palaong nto pampue etu? Re’e ratulis manganto’o nempo Eo Rapandoo, to pampue tiroo mangika palaong nsira ri raya banua i mPue Allah, pei sira taa rato’oka sala.
6Wali Aku manganto’oka komi, Aku re’imo si’isi’i. Wali Aku semo to bae wo’u batuanginya pei banua i mPue Allah.
7Pei komi tawa manasa batuanginya gombo i mPue Allah to ratulis ri raya ntuntuNya see naka komi manto’o maja’a anagurungKu. Gombo to ratulis etu manganto’o, ‘Si’a pampue to mampakasanang rayangKu. Pamporayang semo.’ Komi taa manasa batuanginya gombo etu, apa ane manasa ngkomi komi taa damampakasala tau to tare salanya. Kasimbalinya yako etu, komi damamporayang tau etu.
8Apa Aku, Wiyaa nto Lino, Aku semo to re’e kuasa manganto’o kesaa to masipato daraika ri Eo Rapandoo.”
9Wali yako etu i Yesu polas yako ri nawu etu dayau njo’u banua to napampotunde nto Yahudi. Rata nja’u ria Ia masua ri raya banua etu.
10Wali nja’u raya banua etu re’e samba’a tau to mapongko palenya sambali. Pasi re’e seja nja’u ria bara sawei mba’a tau to rani mampakasala i Yesu, see naka sira mampotanaka resi Ia, manganto’o, “Wimba ane ewa porenta ngkita, bara maya tau mampakatao muni sa’e ane ri Eo Rapandoo?”
11Wali i Yesu mangansono sira, to’oNya, “Rapanya re’e samba’a komi to re’e domba to masou lo’u raya mbayau ri Eo Rapandoo. Wimba, komi bara taa damangokotaka muni domba etu yako la’u raya mbayau etu? Matantu komi damangokotaka muni!
12Pei taa manto’o ane tau, ia semo to bae-bae batuanginya pei domba. Wali singkonong kojo pei porenta i Musa ane kita mangika palaong to matao resi sa’e ri Eo Rapandoo.”
13Wali roo see i Yesu manganto’oka ngkai to mapongko palenya, to’oNya, “Tonjuka palemu.” Wali ngkai etu mangantonjuka palenya panewa palenya etu rapakatao muni sewaju ewa palenya to sambali.
14Pei to Yahudi to aliran Parisi sira masuwu muni yako ri banua etu. Sira mansongka mangaliwu jaya see sira maya mampopate yau i Yesu.
15Wali i Yesu mangandonge mangkonong songka nto Yahudi to aliran Parisi etu, see naka Ia mayoko yako ri lipu etu. Tempo Ia mayoko boros tau mangalulu Ia. Pasi samparia sira to masaki, Ia mampakatao muni,
16pei Ia mampatiendoka sira, to’oNya, “Ne’e mampakarebaka resi sa’e mangkonong Aku.”
17Wali palaongiNya etu mangabanang gombo to ratulis mangkonong i Yesu ri raya ntuntu i mPue Allah. Gombo etu natulis nto pantuntu tuntu i mPue Allah, i Yesaya, tempo owi. Tempo etu i Yesaya mangantulis gombo i mPue Allah, to’oNya,
18“Si’i semo to papolaongingKu to Aku roomo mangampilis. Ia semo to kuporayang pasi to mampakasanang kojo rayangKu. Wali Aku damangawaika Ia Nosa Mapasing yako resi Aku, pasi Ia damampakarebaka resi tau to si’a to Yahudi mangkonong songka to singkonong pei Aku.
19Ia taa damatingka bara kaboo-boo, pasi Ia taa damaroso looNya magombo nja’u jaya-jaya tikore.
20Pasi Ia taa damampoja’a tau to taa maroso pangayanya, to raporapaka ewa loe ntibu to damapukamo, pasi to raporapaka seja ewa suyu to kamboka-mboka remenya. Ia taa damandoo mangika palaongingKu sampe rata temponya Ia manganangi baliNya.
21Pasi Ia semo to danasarumaka ntau to si’a to Yahudi.” Etu semo gombo i mPue Allah to natulis i Yesaya tempo owi mangkonong i Yesu.
22Wali yako etu ma’i tau mangkenika i Yesu samba’a tau to buta pasi bea naika measa to mamposuak ia. Wali i Yesu mampakatao muni ngkai etu see naka ia maya muni magombo pasi mangkita muni rao.
23Wali samparia tau boros to mangkita palaong to etu paka ipu raya nsira. Sira manganto’o, “Bara si’i semo nsa tau to rato’oka wiyaa i Daud Makole parajanji i mPue Allah?”
24Pei tempo to Yahudi to aliran Parisi mangandonge to nato’o ntau boros etu, sira manganto’o samba’a pei samba’a, “Ojo yako kuasa i ngKepala Measa to rato’oka seja i Beelsebul, yako kuasa to si ia semo naka pei ngkai si’i nakurang mangarubak measa yako resi tau.”
25Wali i Yesu mangansani pampobuuka nto Yahudi to aliran Parisi etu, pasi Ia manganto’oka sira rapa, to’oNya, “Rapanya makole pasi joanya. Ane joa nu makole etu pei masimusu yau, taa masae tau etu darapakaja’aka yau. Pasi ewa see seja ane tau sangkota bara tau santina. Ane sira matingka samba’a pei samba’a, taa masae sira datiga’as yau.
26Wali ewa see seja resi Kepala Measa. Ane Kepala Measa mangarubak joanya, taa masae sira samparia damasimusu yau panewa Kepala Measa tamo re’e joanya to ia mangkuasang. Wali manasa si’a kuasa i ngKepala Measa to mangarubak measa.”
27Wali yako etu i Yesu manganto’oka wo’u tau to aliran Parisi etu, Ia manganto’o, “Pobuuka joa to si komi. Apa sira mangarubak seja measa resi tau, pei komi taa mampobuuka sira mangampake kuasa i Beelsebul mangika palaong to etu. Wali ane ewa see, sira semo to mampakanasa sala ngkomi tempo komi manganto’o Aku mangarubak measa mangampake kuasa i Beelsebul.
28Pei Aku mangarubak measa mangampake kuasa i Nosa i mPue Allah, wali palaong etu mampakanasaka komi i Pue Allah, Makole, naratamo ri oyo ngkomi.”
29Wali roo see i Yesu rani mampakanasaka sira Ia semo to rosoroso pei i Kepala Measa, see naka Ia manganto’o wo’u rapa, to’oNya, “Rapanya re’e tau to maroso kojo, tau taa maya masua ri raya banuanya pei mangoko yau ngaya-ngayanya apa ia maroso mangamparambang. Pei ane rata tau to roso-roso wo’u pei ia, tau etu maya mangampungu yau ia panewa mangoko yau ngayangayanya. Wali Aku roomo manganangi i Kepala Measa see naka Aku maya mangarubak joanya pei mangoko yau tau to ia puenya.
30“Wali re’e tau to taa mampasimbalika Aku, wali batuanginya tau etu mangewa Aku. Kamonsonya Aku rani mampasiromunaka wo’u tau to damangalulu seja Aku, tau to raporapaka ewa dombangKu. Wali tau to taa mangansawang Aku mangika palaong to etu, tau etu ojo mangantalas palaongingKu raporapaka ewa tau to mangaga’aga’a yau dombangKu etu.
31“Wali see naka Kuto’oka komi ewa si’i. Samparia dosa to naika nto lino pasi samparia gombo nsira to manto’o maja’a sa’e, samparia to etu maya nalapas i mPue Allah. Pei ane tau to manto’o maja’a i Nosa Mapasing, dosa etu taa daralapas.
32Pasi tau to magombo mangewa Aku, Wiyaa nto Lino, tau etu tiroo ralapas dosanya etu. Pei ane tau to magombo mangewa i Nosa Mapasing, tau etu taa daralapas dosanya etu ri tempo si’i, pasi taa seja daralapas ri tempo to darata.” Wali ewa wetu gombo i Yesu manganseko tau to aliran Parisi apa sira manganto’o Ia mangampake kuasa i ngKepala Measa mangarubak measa.
33Wali yako etu i Yesu manganto’oka wo’u to Yahudi to aliran Parisi rapa, Ia manganto’o, “Wali mangkonong kaju to mawua, kita mangansani ane kaju matao, matao seja wuanya. Pasi ane kaju maja’a, maja’a seja wuanya. Wali yako ri wua ngkaju semo naka pei kita mangansani kaju etu bara matao bara taa.
34Gete, komi sewaju kaja’anya pei ule to kayangu ngisinya apa komi sangkani mampoja’a tau! Komi taa kojo nukoto manganto’o gombo to matao. Apa raya ngkomi maja’a, pasi ewa wimba raya ntau, etu semo mawali pu’u nu gombo to masuwu yako ri nganganya.
35Wali tau to matao, ia mampobuuka anu to matao, see naka matao seja gombo ntau etu. Pei ane tau to maja’a, ia mampobuuka anu to maja’a, wali see naka maja’a seja gombo ntau etu.
36Pei Aku manganto’oka komi, ane ratamo temponya i Pue Allah damangabotus samparia gombo nto lino, tempo etu tau samba’a pei samba’a damangansono pampotanaka i mPue Allah mangkonong samparia gombo to tare batuanginya to roomo nato’o nsira.
37Apa ewa wua ngkaju mampakanasa kaju etu bara matao bara maja’a, ewa see seja gombo to nuto’o ngkomi samba’a pei samba’a ri tempo si’i, gombo etu semo to damampakanasa ri tempo to darata komi bara re’e sala to masipato rahuku bara tare.”
38Wali ojo karoonya i Yesu manganto’o gombo etu, re’e bara sawei mba’a tau to mampoguru porenta i Musa, pasi to Yahudi to aliran Parisi, sira mamporapika resi i Yesu, to’onya, “Guru, kami rani mangkita Korom mangika palaong to taa rapobiasa to maya mawali tondong resi kami see kami mangansani kuasaMu monso pu’u yako resi i Pue Allah.”
39Wali i Yesu manganto’oka sira, “Gete, tau to tuwu ri tempo si’i maja’a kojo pasi roomo mampiyaika yau i Pue Allah. Wali etu semo sabanya naka pei komi mamporapi palaong to damawali tondong resi komi. Pei ojo samba’a tondong to darapapokitaka resi komi. Tondong etu damawali ewa palaong to mawali resi to pantuntu tuntu i mPue Allah, i Yunus, tempo owi.
40Apa i Yunus etu, ia togo mbengi kasaenya maroo ri raya ngkompo nu bau to bae kojo, roo see ia ralua yau munimo. Wali ewa see seja Aku, Wiyaa nto Lino damaroo ri raya ntana togo mbengi kasaenya panewa Aku darawangu muni yako ri kapatengKu. Wali palaong to etu semo to damawali tondong to damampakanasaka komi kuasangKu monso pu’u yako resi i Pue Allah. Pei Aku taa damangikaka komi tondong to yusa.
41Wali ane ratamo temponya i Pue Allah damangabotus to lino, tempo etu komi to tuwu ri tempo si’i, komi damampotango Ia. Pasi tau Niniwe to napakarebaka i Yunus tuntu i mPue Allah tempo owi etu, sira damampotango seja i Pue Allah sindara-ndara pei komi. Wali tau Niniwe etu damanganto’o komi sala apa tempo owi, tempo sira mangandonge anu to napakarebaka i Yunus resi sira, tempo etu sira majea. Pei tempo si’i naratamo tau to bae wo’u anggaNya pei i Yunus, Aku semo, pei komi taa mampodongeka gombongKu.
42Pasi tempo darapangabotus to lino etu, dare’e seja i makole to we’a to tuwu ri tempo i Makole Salomo tempo owi. To we’a etu maporenta ri tana to nja’u tondo selatan. Pasi tempo etu nempo longko kojo lipunya, pei ia ma’i mangampago i Makole Salomo. Naka pei ia ma’i resi i Salomo apa ia rani mampodongeka gombo i nSalomo to pande kojo. Ia mampobuuka gombo etu bae kojo batuanginya resi ia. Wali ri tempo to darata makole to we’a etu damampotango seja i Pue Allah sindara-ndara pei komi to tuwu ri tempo si’i. Pasi ia damanganto’o seja komi sala, apa ri tempo si’i naratamo tau to bae wo’u anggaNya pei i Makole Salomo etu, Aku semo, pei komi taa mampodongeka gombongKu. Wali see naka masipato to we’a etu manto’o sala komi tempo to darata. Apa gombo to si Aku to nupobo’o ngkomi, gombo etu to baebae batuanginya pei gombo i Makole Salomo to na’angga tau we’a etu.”
43Wali yako etu i Yesu manganto’o wo’u rapa. Ia mamporapaka tau to owo mula damajea yako lengkonya to maja’a, sira ewa tau to owo napiyaika measa to mamposuak ia. Wali Ia manganto’o, “Tau to tuwu ri tempo si’i maya raporapaka ewa tau to tempo ruyu naposuak measa pei roo see measa etu mampiyaika ia. Wali measa etu ane roomo mampiyaika tau, ia mangalinjak pada bone mangaliwu tampa danakaroos, pei ia taa mangarata.
44Wali ia manganto’o, ‘Aku damawolili muni resi tau to banuangku seore etu.’ Wali ia mawolili muni resi tau etu pei mangkita tau etu masilonga muni ewa banua to taa nja’u tau mangkaroos. Banua etu roomo rasai nakayongo pasi roomo rapasilonga.
45Wali apa saba tau etu ewa banua to tare tau mangkaroos, see naka measa etu mamposuak muni tau etu pasi ia mangansale seja pitu yununya to ja’aja’a wo’u pei ia. Wali sira wayu to masua damaroo ri raya ntau etu. Wali tau to raposuak etu, katuwunya to purinya, etu semo to ja’a-ja’a pei katuwunya to tempo ruyu. Wali ewa see seja tau to maja’a to tuwu ri tempo si’i, nempo mula damajea, pei ane sira taa mangaya kareba yako resi i Pue Allah, sira raporapaka ewa banua to soa. Wali ane ewa see, kanjo’u-njo’u kapari-pari kaja’a nsira.”
46Wali tongo-tongonya i Yesu mampogomboka tau boros etu, ratamo indoNya pasi tua’iNya bara sawei mba’a nja’u sambali banua nakare’e i Yesu. Sira makore ri sambali banua etu, sira rani magombo resi i Yesu.
47Wali re’e tau to yau manganto’oka i Yesu, to’onya, “Re’e indoMu pasi a’iMu ri sambali banua. Sira rani magombo resi Komi.”
48Wali i Yesu mangansono gombo ntau etu, Ia manganto’o, “I sema kamonsonya indongKu pei a’ingKu?”
49Panewa Ia mangansudu resi kami to anaguruNya pei manganto’o, “Tau si’i seja indongKu pasi a’ingKu.”
50Apa i sema tau to mangika pamporani mPa’angKu to ndate saruga, tau etu seja to rato’oka a’ingKu to langkai pasi a’ingKu to we’a pasi indongKu.”
Download Audio MP3 (Matius 12):
Mobile (Low Quality) - CD (High Quality)
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel