1Sura si’i yako resi aku, i Paulus. Aku semo to papolaong i mPue Allah pasi pomakau i Yesu Kerisitu. Wali palaong to nawaika i mPue Allah aku etu semo mampakaroso pangaya ntau to napilis i mPue Allah, pasi mampotundeka tau see sira manasanya mangkonong anu to monso. Apa yako anu to monso etu see naka sira damangansani ewa wimba raika mampolengkoka lengko to singkonong pei i Pue Allah.
2Pasi ane sira mangansani anu to monso etu, sira damasanang kojo damampobuuka katuwu to singkasaenya. Katuwu to singkasaenya etu naparajanjika i mPue Allah tempo owi, tempo Ia tawa mampapowali lino si’i. Wali damawali kojo parajanji etu apa kita tansani i Pue Allah Ia taa mawuti.
3Wali rata temponya to napilis i mPue Allah, to Pansompo ngkita, Ia mampakarebaka kareba matao to mampaponsanika tau mangkonong katuwu to singkasaenya etu. Wali aku semo to nasarumakaka i mPue Allah mangika palaong to etu.
4Wali aku mangantulis sura si’i resi korom, i Titus. Aku mangepe korom ewa ana ngkorongku apa korom mangaya seja i Pue Allah sewaju pei aku. Wali aku makai-kai see i Pue Allah, Pa’a, pasi i Pue Yesu Kerisitu, to Pansompo ngkita, damampaponsanika korom kanotoNya pasi pamporayangiNya pasi mangawaika korom karodo ndaya.
5Wali aku mangansombo korom nja’u tana Kreta. Naka pei mangansombo korom nja’u ria apa re’e palaong to korom damangika nja’u ria. Etu semo mampasilonga samparia to tawa rapasilonga pasi mangampilis tau to mawali ketuaketua ntau to mangaya ri ponto-ponto kota to re’e tau to mangaya. Pasi tempo korom mangika palaong etu, ika singkonong ewa to kuto’oka korom seore.
6Wali anu to kuto’o seore etu, etu semo tempo korom mangampilis tau to mawali ketua ntau to mangaya, pilis tau to ewa si’i lengkonya. Tau etu tau to tare lengkonya to maya napakasala nsa’e. Ia samba’aja rongonya, pasi ananya mangaya seja i Pue. Pasi ananya etu ane ri pangkita nsa’e ia si’a tau to ojo mangalulu pamporani ndayanya pasi si’a tau to mangewa tau tu’anya.
7Apa ketua ntau to mangaya nawaika i mPue Allah palaong, wali ia taa maya ane re’e lengkonya to maya napakasala nsa’e. Ia taa maya mangei pasi ia taa maya majoli maja’a rayanya. Pasi ia si’a to panginu, si’a to batingka, pasi si’a tau to ojo rani sugi.
8Pei ketua ntau to mangaya ewa si’i lengkonya. Ia masanang mampalinggona tau. Pasi ia mamporayang kasamparianya anu to matao. Ia tau to pande mampasisala to matao pasi to maja’a, pasi lengkonya pei pampobuukanya singkonong pei i Pue Allah. Ia nakurang manganta’amaka rayanya re’e palaong to maja’a.
9Pasi ketua ntau to mangaya taa maya taa mangkongko kojo anu to monso to roomo rapotundeka resi ia, etu semo tuntu i mPue Allah. Apa ane ia mangangkongko kojo tuntu i mPue etu, ane ewa see ia maya mampotundeka sa’e anu to damampakaroso raya nsira. Pasi ia maya seja mangampake tuntu i mPue etu mampakanasa sala ntau to manganto’o taa monso anu to rapotundeka etu.
10Wali bae batuanginya korom mangika palaong etu apa boros tau to mangewa anu to rapotundeka, pei tau to mangewa etu kaborosinya tau to mangkongko ada nto Yahudi. Sira mampotunde tau pei kamonsonya gombonya tare kojo batuanginya, sira ojo mangantipu tau.
11Wali tau to ewa wetu ne’e rabiaka mampotundeka tau to mangaya, apa sira mampotundeka tau anu to taa masipato rapotundeka. Wali anu to napotunde nsira etu ojo mampakasusa tau. Apa ane ri oyo ntau santina pei samba’a mangaya gombo ntau etu, damawali kasusa ri oyo nsira. Wali tau to mampotunde anu to taa monso etu, naka pei sira mangika palaong etu apa sira ojo rani sugi.
12Wali lengko nsira etu singkonong kojo ewa to room nato’o nsamba’a to pantuntu tuntu to yako nja’u lipu nsira tempo owi. To pantuntu tuntu etu ia tau Kreta seja pei ia semo to manganto’o, “Tau ri Kreta mawuti pasi maja’a kojo lengkonya. Sira bo’onya mapalaong, ojo rani mangkoni.”
13Etu semo gombo nto pantuntu tuntu to yako ri lipu nsira. Gombonya etu monso pu’u. Wali see naka seko kojo tau to mampotunde anu to taa monso etu see pangayanya darapakanoto
14Pasi ane ewa see, sira tamo damangalulu sarita-sarita to taa monso to nato’o nto tu’angi nto Yahudi, bara mangalulu porenta ntau to mampobo’o anu to monso.
15Kamonsonya ane tau to roomo napakayongongika i mPue Allah rayanya, ane tau etu tare bara kesaa to maya mampakarikasika rayanya. Pei ane tau to taa napakayongongika i mPue Allah rayanya, etu semo tau to taa mangaya, ane tau to etu samparia paka makarika resi ia apa pampobuukanya pasi rayanya makarika.
16Wali tau to ewa wetu, sira mampongakung mangalulu i Pue Allah, pei lengkonya taa kojo singkonong pei gombonya etu. Lengkonya etu maja’a kojo ri pangkita i mPue Allah. Sira bo’onya mampalaika i Pue Allah pasi sira taa kojo nakoto mangika palaong to matao.
Download Audio MP3 (Titus 1):
Mobile (Low Quality) - CD (High Quality)
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel