Alkitab Mobile SABDA
[VER] : [TAA]     [PL]  [PB] 
 <<  Wahyu 11 >> 

1Wali yako etu aku rawaika balo to rapake mangansukat. Balo etu ewa toko napake ntau malinja. Wali i Pue manganto’oka aku, “Pambangu pei sukat banua i mPue Allah pasi palampa. Pasi bilang tau to mampue ri raya banua i mPue Allah etu.

2Ojo tongonata banua i mPue Allah ne’e rasukat, apa tongonata etu rawaika resi tau to si’a to Yahudi. Wali sira damangalombu-lombu mampakaja’a kota mapasing opo mpuyu pei dua mbuya kasaenya.

3Wali Aku re’e dua mba’a matamanasangKu. Pei ri tempo etu Aku damangawaika matamanasangKu etu kuasa damampakarebaka tau gombo to yako resi Aku. Sira damampakarebaka gombo etu sansowu dua atu pei ono mpuyu mbengi kasaenya. Tau dua etu pakenya kain karu.” Wali etu semo gombo to nato’oka i mPue aku.

4Wali matamanasa dua etu raporapaka ewa dua kaju saitun pasi dua tinja to darapamposaka pansona to makore ri tango i mPue Allah anu to Pue nu lino si’i.

5Wali ane re’e bali ntau dua etu to rani mampakaja’a sira, balinya etu danapakaja’a nu apu to masuwu yako ri nganga nsira dua. I sema to rani mampakaja’a sira dua, matantu kojo darapopate yau ewa wetu.

6Wali matamanasa to dua mba’a etu, sira re’e kuasa mangaba’a yangi see taa tudu uja ri rayanya sira mampakarebaka gombo i mPue Allah. Pasi sira re’e seja kuasa mangika ue see mawali yau raa. Pasi re’e seja kuasanya naka pei lino mangarata soba ponto ngaya. Wali ane temponya sira rani mangika palaong etu, sira maya mangika.

7Wali ojo karoonya sira mampakarebaka gombo i mPue Allah, ma’i samba’a binatang to maja’a to yako la’u wayau to taa ransani ungka ngkayombunya. Binatang to maja’a etu damangamusu matamanasa to dua etu. Wali binatang etu damanganangi pasi mangampopate yau sira dua samparia.

8Ojo karoonya sira dua rapopate yau sira taa rapongkeli. Lemba nsira dua ojo sakanduli ri jaya tikore nja’u kota to bae. Nja’u kota etu semo pangampaku Pue nsira ri kaju pasape tempo owi. Wali kota etu maya raporapaka ewa kota Sodom pasi tana Mesir to tempo owi apa maja’a kojo seja lengko ntau to maroo reria.

9Wali tau yako sambawo lino, etu semo ponto-ponto bansa, pasi pontoponto suku, pasi ponto-ponto basa pasi ponto-ponto paporenta, tau etu damangalo’aka lemba nu matamanasa to dua etu. Togo eo pei sampu’a eo kasaenya sira ojo mangalo’a-lo’aka. Pasi sira taa mangabiaka tau dua etu rapongkeli.

10Wali to lino masanang kojo rayanya saba kapate ntau dua etu. Sira mangika roa kandende ndaya pasi ri rayanya mangika roa etu, sira damangawaika sora resi yununya samba’a pei samba’a. Naka pei sira mangika ewa wetu apa ndende rayanya tau dua etu matem, apa ri tempo ruyu, ri katawanya mate yau, to pantuntu tuntu dua etu sira mangansesai kojo to lino.

11Pei ojo kagananya togo eo pei sampu’a eo etu, rata nosa to mangawai katuwu yako resi i Pue Allah. Nosa etu masua ri tau dua etu, wali sira tuwu muni panewa makore. Wali tau to mangkita palaong to etu sira meka kojo.

12Yako etu tau mangandonge loo to maroso yako ndate saruga. Loo etu mampokio tau dua etu pei manganto’o, “Papone mai!” Wali sira dua tiokotaka nto’u saruga ri raya limu, pasi tempo sira tiokotaka, balinya mangangkita palaong to etu.

13Wali ri tempo to etu mawali lengko tana to maroso kojo. Wali santila sampuyu banua ri kota etu to mapuka yau, pasi pitu nsowu tau to rapopate yau. Pei tau to taa rapopate yau, sira meka kojo rayanya resi i Pue Allah pasi sira manganto’o, “Bae kojo kuasa i mPue Allah anu to re’e ri saruga!”

14Wali kasesa to kadua naliumo, pei tamo masae kasesa to katogo darata wo’u.

15Wali yako etu pomakau to kapitu mangantawuis seja tarompet to si ia. Panewa aku mangandonge boros loo to maroso magombo ri saruga, loo etu manganto’o, “Ruyu samparia to lino naporentang makole, pei si’isi’i sira naporentang i mPue Allah pasi i ngKerisitu, Makole parajanji i mPue Allah. Wali sira semo makole rataka ri singkasaenya.”

16Wali ojo karoonya loo etu magombo, ketua to dua mpuyu pei opo mba’a to matunda ri gaderagadera to si sira ri tango i mPue Allah, sira madungku yau ri tana pei mampue mampakabae i Pue Allah.

17Sira manganto’o, “O Pue Allah anu Makuasa, kami manganto’o tarima matao resi Komi to re’e tempo si’i, pasi to re’emo ri tempo owi. Tarima matao apa Komi mangampake kuasaMu to bae kojo, Komi mula mangkuasang to lino.

18Tempo Komi mawali Makole, tau to si’a to Yahudi, sira maja’a kojo rayanya resi Komi. Pei ratamo temponya Komi mangahuku sira apa maja’a rayaMu resi sira. Ratamo temponya Komi mangabotus tau to matem, pasi mampakaja’a sira to mampakaja’a lino. Pasi ratamo seja temponya Komi mangawai ntanapa resi to papolaongiMu, pasi resi to pantuntu tuntuMu, pasi resi tau to Komi Puenya, pasi resi sira to manga’angga Komi. Tau to damayunuwa pasi tau to bosemo, samparia danuwaika ngKomi ntanapanya.”

19Wali ojo karoonya ketua to dua mpuyu pei opo etu magombo, panewa Banua i mPue Allah to ndate saruga tiloka. Wali tempo Banua i mPue Allah tiloka, mialamo peti to la’u parajanji i mPue Allah, peti etu nja’u raya Banua etu. Pasi kodi majoli re’emo bilak kreto, pasi re’e seja lengko tana pasi tudumo seja tiba matombo kojo.



Download Audio MP3 (Wahyu 11):
Mobile (Low Quality) - CD (High Quality)

 <<  Wahyu 11 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel