Alkitab Mobile SABDA
[VER] : [TAA]     [PL]  [PB] 
 <<  Wahyu 13 >> 

1(12-18) Wali ule naga etu ia makore ri wawo bone ri wii ntasi. (13-1) Panewa aku mangkita samba’a binatang to maja’a masuwu yako ri raya ntasi. Binatang to maja’a etu sampuyu seja tondunya pasi pitu seja wo’onya. Wali ndate tondunya sampuyu etu, ndate songko makole. Ponto-ponto tondunya etu paka ndate songko makole. Pasi ponto ri wo’onya re’e sanga ratulis, sanga etu manganto’o maja’a i Pue Allah.

2Wali binatang to maja’a etu ta’anya ewa binatang to rato’oka macan tutul. Pei witinya ewa witi beruang pasi ngujunya ewa nguju nsinga. Wali ule naga mangawaika binatang etu karoso ewa karoso to si ia. Pasi ule naga etu mangawaika ia mamporentang tau to re’e ri paporentanya pasi mangawaika ia seja kuasanya to bae kojo.

3Wali aku mangkita samba’a wo’o nu binatang yako ri oyonya pitu wo’onya etu, wo’o etu ewa rapopate yau, pei welanya etu rapakatao muni wali tamo mate wo’o etu. Wali samparia to lino ipu kojo rayanya mangalulu binatang etu.

4Pasi sira mampue resi ule naga apa ia semo to mangawaika binatang kuasanya. Pasi sira seja mampue resi binatang etu. Sira manganto’o, “Tare to sewaju ewa binatang to si’i! Pasi tare to maya mangamusu pasi manganangi ia!”

5Wali binatang to maja’a etu ojo rabiaka magombo mangei pasi manganto’o maja’a i Pue Allah. Pasi ia rabiaka seja mangkuasang to lino opo mpuyu pei dua mbuya kasaenya.

6Wali ia mulamo manganto’o maja’a i Pue Allah pasi sangaNya pasi lipuNya. Pasi ia manganto’o maja’a seja tau to maroo ndate saruga.

7Panewa binatang etu rabiaka seja mangamusu pasi manganangi tau to i Pue Allah Puenya. Pasi ia rawaika kuasa mangkuasang samparia tau ri lino, etu semo ponto-ponto suku, pasi ponto-ponto bansa, pasi ponto-ponto basa, pasi ponto-ponto paporenta.

8Wali samparia to lino damampue resi binatang to maja’a etu, kasimbalinya yako tau to sanganya room ratulis ri raya buku ngkatuwu. Buku ngkatuwu etu buku nu Ana Domba to rasimbale yau yako ri tempo i Pue Allah mampapowali lino. Wali tau to sanganya ratulis nja’u raya buku etu, sira taa mampue resi binatang.

9I sema to nadonge ntalinganya, padongeka.

10Ane i Pue Allah manganto’o tau danasoko nsa’e, ia danasoko pu’u nsa’e. Pasi ane i Pue Allah manganto’o tau darataroto, ia darataroto pu’u. Wali ane ewa see, see naka tau to i Pue Allah Puenya, matao ane mampakabae sabara pasi ne’e mandoo mangaya i Pue.

11Wali yako etu aku mangkita wo’u samba’a binatang maja’a to yusa, ia masuwu yako ri oyo nto lino. Binatang to maja’a etu dua tondunya. Tondunya etu ewa tondu nu ana domba. Pasi loonya ewa loo nu ule naga.

12Binatang to kadua etu mawali wakil nu binatang to uyunya, wali samparia kuasa nu binatang to uyunya napake seja nu binatang to kadua etu. Wali binatang to kadua etu mampakasaaka lino pasi samparia to maroo ri lino see mampue resi binatang to uyunya, to room rapakatao muni welanya to mapari kojo etu.

13Pasi binatang to kadua etu ia mangika palaong to taa rapobiasa. Ia mangika apu to yako ndate yangi tudu ri wawo lino ri pangkita nto lino.

14Wali binatang to kadua etu ia rawaika kuasa mangika palaong to taa rapobiasa etu mangawakil binatang to uyunya. Panewa yako palaong etu ia mangantipu to lino. Ia manganto’oka sira mangika tau-tau to ta’anya ewa binatang to uyunya to roomo nawelangi mpanai etu pei tuwu muni.

15Pasi binatang maja’a to kadua etu rawaika seja kuasa mangampaponosa tau-tau to ewa binatang to uyunya see tau-tau etu nansani magombo. Wali tau-tau etu manganto’o, “Pate yau samparia tau to taa mampue resi aku.”

16Pasi binatang to kadua etu ia mampakasaaka samparia to lino ratondong ri palenya tondo ngkana bara ri kirenya. Tau to mangurawa pasi tau to bose tu’a, tau to sugi pasi tau to masiasi, tau to si’a watua pasi tau to watua, samparia rapakasaaka ratondong.

17Wali ane tau tare tondong etu, ia taa maya mangoli bara kesaa pasi mampobalu bara kesaa. Tondong etu semo sanga nu binatang to uyunya, bara nomor to tondong nsanganya etu.

18Wali tau to taa mampobuuka kojo, tau etu taa danansanika anu to si’i. Pei i sema to mampobuuka kojo ia maya mangarekeng pasi mangansani nomor nu binatang to maja’a etu. Apa nomor etu tondong nsamba’a to lino. Wali nomorinya etu semo ono atu pei ono mpuyu pei ono.



Download Audio MP3 (Wahyu 13):
Mobile (Low Quality) - CD (High Quality)

 <<  Wahyu 13 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel