Alkitab Mobile SABDA
[VER] : [TAA]     [PL]  [PB] 
 <<  Yohanes 20 >> 

1Wali yako etu, ojo kamosueonya ri eo Minggu, i Maria to yako kampu Magadan yau ri dayo i Yesu. Tempo etu tiroowa mawuri. Ojo karatanya nja’u ria ia mangkita watu ba’a nu dayo etu roomo rawewoka yau yako ri wombonya.

2Wali ia maripo mangampago i Simon Petrus sira dua anaguru i Yesu to yusa to Naporayang kojo. Rata resi sira dua ia manganto’o, “Lemba mPue roomo nakeni yau ntau yako ri dayo pasi kami taa mangansani bara imbare pamposaka nsira Ia.”

3Wali i Petrus pasi anaguru i Yesu to yusa etu, sira dua yau mangampago dayo.

4Sira dua paka maripo, pei anaguruNya to yusa, ia semo to gasi-gasi pei i Petrus, see naka ia matiruyu rata nja’u dayo.

5Ia madungka pei mangalo’a nja’u raya mbayau etu pasi ia mangangkita kain lena to napake ntau mangawungusika lemba i Yesu, pei ia taa masua ri raya mbayau etu.

6Wali yako etu rata seja i Simon Petrus to mangalulu ri payunya. Ojo karata i mPetrus nja’u dayo etu, ia mansaka masua ri rayanya. Ia mangkita kain lena tiroowa re’e ri wakanya, pei tamore lemba i Yesu.

7Pasi ia mangkita seja lenso to napake ntau mangawungus wo’o i Yesu. Lenso etu taa siwaka pei kain lena. Lenso etu roomo rayuyu pei raposaka nja’u tampa to yusa.

8Wali yako etu anaguru to uyunya rata nja’u dayo etu, ia masua seja ri rayanya. Wali ia mangkita seja kain lena pasi lenso etu, panewa ia mangaya i Yesu roomo mambangu muni yako ri kapateNya.

9Apa ri katawanya sira mangkita palaong to etu sira tawa manasanya tuntu i mPue Allah to manganto’o i Yesu taa maya taa mambangu muni yako ri kapateNya.

10Wali yako etu anaguru i Yesu dua mba’a etu mawolili muni njo’u banuanya.

11Pei i Maria ia re’e muni ri dayo pei ia tiroowa makore ri sambalinya pei tumangi. Tongo ngkatumanginya etu ia madungka pei mangalo’a nja’u raya nu dayo.

12Tempo etu ia mangkita dua mba’a pomakau i mPue Allah yako ndate saruga. Sira dua buya pakenya, pasi sira dua matunda nja’u waka i Yesu rapoduli. Samba’a sira matunda ri tondo wo’oNya, pasi samba’a matunda ri tondo witiNya.

13Wali sira manganto’oka i Maria, “Indo, maka pei korom tumangi?” I Maria mangansono, “Lemba mPuengku roomo nakeni yau ntau, pasi aku taa kunsani bara imbare napamposaka yau nsira Ia.”

14Wali ojo karoonya ia manganto’o gombo etu, ia mangalekoka tangonya pei mangkita i Yesu makore nja’u ria. Pei ia taa mangansani bara i Yesu etu.

15Wali i Yesu manganto’oka ia, to’oNya, “Indo, maka pei korom tumangi? I sema to nuliwu ngkorom?” Pei i Maria mampobuuka Ia tau to mampasilonga nawu etu, wali see naka ia manganto’o, “Pa’a, ane pa’a semo to nangkeni yau tau mate etu, to’oka aku bara imbare pamposaka yau ngkomi see aku dayau damangoko.”

16Wali i Yesu manganto’o, “Maria!” Wali i Maria mangalekoka muni tangonya resi Ia panewa mansaka mangansanika i Yesu semo. Ia magombo ri raya basa Ibrani, to’onya, “O Rabuni!” Batuanginya Rabuni, etu semo “Pa’a Guru”. Wali i Maria yau mambokotu ri tango i Yesu pei mangkongko witiNya apa manga’angga Ia.

17Wali i Yesu manganto’oka ia, “Ne’e kongko Aku, apa Aku tawa mawolili muni resi Pa’angKu. Pei inta resi anagurungKu pei porata resi sira gombongKu si’i, manganto’o, ‘Tempo si’i Aku damawolili muni resi Pa’angKu, AllahngKu semo. Ia seja Pa’a ngkomi pasi Allah ngkomi.’ Wali etu semo gombo to danuporata ngkorom resi anagurungKu.”

18Wali ojo karoonya i Yesu mampogomboka ia, i Maria ma’i mangampago kami to anaguru i Yesu. Rata resi kami ia manganto’o, “Aku owo roo mangkita i Pue!” Roo see ia mamporata resi kami gombo to nato’oka i Yesu ia etu.

19Wali ojo kawurinya rao eo Minggu etu, kami to anaguru i Yesu re’e sindara-ndara ri raya banua. Pasi kami roomo mampakainti ba’a mbombo banua etu apa kami meka resi kepala-kepala nto Yahudi. Pei nempo mainti ba’a mbombo etu, pei kodi majoli re’e i Yesu makore ri oyo mami. Ia manganto’o, “Pakarodo rayamu!”

20Ojo karoonya Ia manganto’o gombo etu, Ia rani mampakanasaka kami Ia semo to rata resi kami, see naka Ia mampaporaoka kami waka mpaku to re’e ri paleNya pasi waka nu yu’a to re’e ri usuNya. Wali ndende kojo raya mami mangangkita i Pue.

21Wali i Yesu manganto’oka wo’u kami, “Pakarodo rayamu! Ewa naika mPa’angKu nampokau Aku ma’i mangika palaong to iwaikaNya Aku, ewa wetu seja Aku mampokau komi dayau mangika palaong to Kuwaika komi.”

22Wali ojo karoonya Ia manganto’o gombo etu, Ia mantawuis kami pei manganto’o, “Tima i Nosa Mapasing.”

23I Nosa Mapasing etu damangawaika komi kuasa. Wali see naka ane tau mangandonge kareba matao to nupakarebaka ngkomi pei majea, ane ewa see komi re’e kuasa manganto’oka tau etu, ‘Dosamu roomo nalapa i mPue Allah’. Pei ane tau to taa majea, komi re’e kuasa manganto’oka tau etu, ‘Dosamu taa kojo nalapa i mPue Allah’.

24Wali tempo i Yesu rata resi kami to anaguruNya etu, tempo etu tare i Tomas to rato’oka seja Tau Api. I Tomas etu ia seja samba’a kami to anaguru i Yesu to sampuyu pei dua.

25Wali tempo i Tomas rata muni, kami to yununya mangansaritaka resi ia, kami manganto’o, “Kami roomo mangkita i Pue!” Pei i Tomas manganto’oka kami, “Gete, ane aku tawa mangkita waka mpaku ri paleNya pasi manganjoloka tanujungku ri waka mpaku etu, pasi ane aku tawa manganjoloka palengku ri usuNya to ratujaka yu’a, ane ewa see aku tawa seja damangaya gombo ngkomi etu.”

26Wali yako etu, ojo kagananya wayu mbengi, kami to anaguru i Yesu nja’u wo’u ri raya banua etu, pasi tempo etu nja’u seja i Tomas. Wali ba’a mbombonya roomo rapakainti, pei nempo mainti ba’a mbombo etu, pei kodi majoli re’e i Yesu makore ri oyo mami. Ia manganto’o, “Pakarodo rayamu!”

27Roo see Ia manganto’oka i Tomas, “Lo’a palengKu si’i, pei posaka tanujumu ri waka mpaku. Pasi tonjuka palemu pei joloka ri usungKu. Ne’emo bata-bata rayamu, pei ayamo!”

28Wali i Tomas manganto’oka i Yesu, “Monso pu’u Komi Puengku pasi Allahngku!”

29Wali i Yesu manganto’oka ia, “Naka pei korom mangaya, apa saba korom roomo mangkita Aku. Pei to sana-sanang wo’u tau to tawa mangkita Aku pei sira mangayam.”

30Wali kamonsonya boros wo’u palaong to taa rapobiasa to mawali tondong resi tau, to naika i Yesu ri pangkita mami to anaguruNya. Pei palaong to etu taa ratulis ri raya nu buku si’i.

31Pei palaong to re’e ratulis, naka pei ratulis see komi maya mangaya i Yesu Ia Ana i mPue Allah, pasi Ia semo i Kerisitu, Makole parajanji i mPue Allah. Panewa yako pangayamu etu, see naka komi maya mangarata katuwu apa saba komi Ia puenya.



Download Audio MP3 (Yohanes 20):
Mobile (Low Quality) - CD (High Quality)

 <<  Yohanes 20 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel