1Wali yako etu re’e santanda roa nto Yahudi ndate Yerusalem, see naka i Yesu yau ndeku ria.
2Wali nda’a Yerusalem etu re’e samba’a wombo ngkota to mananya napake ntau mampaposua dombanya. Pasi ri awe mbombo etu, re’e samba’a limbo. Limbo etu ane ri raya basa Ibrani rato’oka Betesda. Pasi ri wii nu limbo etu re’e lima kandepe.
3Wali boros tau to masaki to maturu-turu ri raya ngkandepe ri wii nu limbo etu. Tau etu re’e to buta pasi re’e to sampungku pasi re’e seja to malulu koronya. (Naka pei sira maturu-turu nja’u ria apa mangampeas ue nu limbo etu dakanjempi.
4Apa matempo-tempo ma’i pomakau i mPue Allah yako ndate saruga ma’i manganjempika ue nu limbo etu. Pasi tempo ue kanjempi-njempi etu, tempo etu tau to masaki to siromu nja’u ria, sira paka mangampago damasua ri raya nue etu. Apa tau to uyunya masua, nempo panyaki kesaa to re’e resi ia, ia mansaka matao muni.)
5Wali tempo i Yesu rata ri Yerusalem tempo roa etu, tempo etu re’e samba’a tau to togo mpuyu pei wayu nto’u kasaenya masaki. Wali ngkai etu ia maturu-turu seja nja’u wii nu limbo Betesda.
6Wali i Yesu yau ri awe nu limbo etu pei mangkita ngkai etu maturu-turu nja’u ria. I Yesu Ia mangansani ngkai etu masaemo ia masaki wali see naka Ia mampotanaka resi ngkai etu, Ia manganto’o, “Wimba, korom bara rani rapakatao muni?”
7Ngkai to masaki etu mangansono, ia manganto’o, “Rani kojo, Pa’a, pei taa mawali apa tare yunungku to maya mangkeni aku damasua ri raya nue etu tempo kanjempi-njempi. Pasi aku mayona kojo, see naka tempo aku yau mampago limbo tempo kanjempinjempi, tau to yusa roomo mampatiruyu yau masua ri ue etu tempo aku tawa rata, wali ia semo to rapakatao muni.”
8Wali i Yesu manganto’oka ia, “Pambangumo! Pei oko alimu pei palinja.”
9Wali ngkai etu mansaka rapakatao muni. Ia mambangu pei mangoko alinya pei malinja. Wali palaong to etu mawali kono ri Eo Rapandoo.
10See naka re’e kepala-kepala nto Yahudi to manganto’oka ngkai to owo roomo rapakatao muni, sira manganto’o, “Seo si’i Eo Rapandoo, wali ane ewa porenta i Musa korom taa maya mangkeni alimu etu, apa sewaju pei mapalaong.”
11Pei ngkai etu manganto’oka sira, to’onya, “Tau to mampakatao muni aku, Ia semo to manganto’oka aku, ‘Oko alimu pei palinja.’”
12Wali sira mampotanaka resi ia, “Sema tau to manganto’oka korom mangoko alimu pei palinja?”
13Pei tau to rapakatao muni etu ia taa nansani i sema tau to mampakatao muni ia, pasi ia taa maya mangansuduka sira i Yesu apa boros kojo tau nja’u ria pasi i Yesu roomo masuwu muni yako ri limbo masua ri oyo ntau boros. Ia leru naika ntau boros etu.
14Pei taa masae yako etu i Yesu yau njo’u banua i mPue Allah pei mangarata ngkai to rapakatao muni etu nja’u seja nja’u ria. Wali Ia manganto’oka ngkai etu, to’oNya, “Padongeka gombongKu! Korom matao muni si’i-si’i. Wali pandooka mangika dosa naka ne’e korom mangarata kasesa to mapari wo’u.”
15Wali ngkai etu yau muni resi kepala-kepala nto Yahudi to roomo mampotanaka resi ia, “Tau to imba manganto’oka korom mangoko alimu pei palinja?” Rata resi sira ia mampaponsanika sira, to’onya, “I Yesu semo to nampakatao muni aku.”
16See naka to kepala-kepala etu mula mampakasusa i Yesu pasi mangaliwu jaya damampopate yau Ia saba Ia nampakatao muni tau ri Eo Rapandoo.
17Pei i Yesu manganto’oka sira, “I Pue Allah, Pa’angKu, tare pandooNya mangansawang tau nempo ri Eo Rapandoo pasi Aku ewa see seja.”
18Wali ojo pangandonge nto Yahudi etu gombo i Yesu, sira maja’a kojo rayanya see naka mapari wo’u naika mangaliwu jaya damampopate yau Ia. Naka pei sira rani mampopate yau Ia apa sira mampobuuka Ia mangewa porenta nu agama nsira mangkonong Eo Rapandoo. Pei si’a ojo etu sabanya naka pei sira rani mampopate yau Ia. Sira rani seja mampopate yau Ia apa saba Ia re’e manganto’o i Pue Allah semo Pa’aNya, wali ane ewa see Ia mampoanika sewaju anggaNya pei i Pue Allah.
19Wali i Yesu manganto’oka to Yahudi etu, “Aku manganto’oka komi, monso pu’u Aku, Ana i mPue Allah, taa maya mangika bara kesaa ane ojo yako pamporani to si Aku. Pei ewa naika nu ana kodi mangalo’a pa’anya mangika palaonginya roo see ana etu mangika seja palaong sewaju ewa pa’anya etu, ewa see seja Aku. Wali ojo palaong to Aku mangangkita Pa’angKu mangika, palaong to etu semo to Aku maya mangika.
20Apa Pa’angKu mamporayang Aku, pei Ia mampapokitaka Aku samparia to inikaNya. Pasi Ia damampapokitaka resi Aku palaong to bae wo’u batuanginya pei palaong to roomo nukita ngkomi etu. Wali Aku damangika wo’u palaong to etu see naka komi daipu kojo rayamu mangkita.
21Apa ewa naika mPa’angKu mangawangu muni tau to matem pei mangawaika muni sira katuwu, ewa see seja Aku to AnaNya, damangawaika katuwu resi tau to Aku rani mangawaika.
22Pasi ane Pa’angKu, si’a Ia to mangabotus tau, apa samparia palaong to etu Ia roomo mansarumakaka resi Aku to AnaNya.
23Naka pei Ia mangika ewa wetu see samparia tau damanga’angga Aku to AnaNya, ewa naika nsira manga’angga Ia to Pa’angKu. Wali tau to taa manga’angga Aku to AnaNya, tau etu taa seja manga’angga Pa’angKu to nampokau Aku etu.
24“Aku manganto’oka komi, monso pu’u i sema tau to mampodongeka gombongKu pasi mangaya Ia to nampokau Aku, tau etu re’e katuwu to singkasaenya, wali ia tamo darahuku. Apa ia tamo re’e ri jaya to mangarata kapate pei ia re’emo ri jaya to mangarata katuwu.
25Wali samparia tau to tawa mangaya, sira maya raporapaka ewa tau mate, apa sira raga’a yako resi i Pue Allah. Pei Aku manganto’oka komi, monso pu’u darata temponya tau to tawa mangaya etu, sira damangandonge gombo nu Ana i mPue Allah, wali sira to mampodongeka pasi mangaya gombongKu etu, sira darawaika katuwu. Wali kamonsonya si’i semo temponya komi damampodongeka gombongKu etu.
26Apa Pa’angKu, Ia semo pu’u ngkatuwu pasi ewa see seja Aku, apa Ia mangawaika seja Aku to AnaNya kuasa damangawaika resi tau katuwu.
27Pasi apa saba Aku semo Wiyaa nto Lino, see naka Ia mangawaika seja Aku kuasa damangabotus to lino.
28“Wali ne’e ipu raya ngkomi mangandonge gombongKu etu, apa darata seja temponya samparia tau to matem paka damangandonge loongKu mampokio sira.
29Tempo sira mangandonge loongKu etu, tempo etu sira darawangu muni yako ri kapatenya pei damasuwu muni yako ri dayo nsira. Wali sira to mangaya Aku see naka matao lengkonya tempo sira tuwu seore, sira darawangu muni yako ri kapatenya pei damangarata katuwu to singkasaenya. Pei sira to taa mangaya Aku see naka maja’a lengkonya tempo sira tuwu seore, sira darawangu muni yako ri kapatenya pei darahuku.
30“Wali Aku taa maya mangika bara kesaa ane ojo yako pamporani to si Aku. Tempo Aku mangabotus tau Aku mangika singkonong pei to nato’oka mPa’angKu Aku. Wali tempo Aku mangabotus tau etu, samparia to to’ongKu paka kono kojo pasi masipato rato’o, apa Aku taa rani mangalulu pamporani ndayangKu. Aku ojo rani mangalulu pamporani mPa’angKu to nampokau Aku etu.” Etu semo gombo i Yesu resi to Yahudi etu.
31Wali yako etu i Yesu manganto’oka wo’u to Yahudi etu, to’oNya, “Ane ojo Aku semo to mawali matamanasa mangkonong korongKu, manganto’o Aku Ana i mPue Allah, ane ewa see taa manasa resi sa’e bara monso gombongKu etu, bara taa.
32Pei Pa’angKu seja mawali matamanasa mangkonong Aku. Ia seja manganto’o Aku AnaNya, pasi Aku kunsani monso pu’u gombo to ito’oNya mangkonong Aku etu.”
33Panewa i Yesu manganto’o wo’u, “Komi re’e mampokau tau yau resi i Yohanes seore damangandonge gombo to si ia mangkonong i sema kamonsonya Aku. Pasi gombo to to’onya mangkonong Aku etu monso pu’u.
34Pei kamonsonya nempo tare to lino to mawali matamanasa mangkonong Aku, taa mawei apa Pa’angKu ndate saruga, Ia matamanasa mangkonong Aku. Naka pei Aku mampatiendoka komi mangkonong gombo i Yohanes etu see komi maya rapalaes apa saba mangaya gombonya mangkonong Aku.
35Apa i Yohanes etu mampaponsanika tau kareba yako resi i Pue Allah, see naka ia raporapaka ewa pansona to mawea to mampakareme tau to ri raya ngkawuri. Wali tempo ia owo mamula mampakarebaka komi kareba to raporapaka ewa reme etu, tempo etu komi masanang mampodongeka gombonya to raporapaka ewa reme etu pei si’i-si’i komi tamo rani mangaya gombonya etu.
36“Wali i Yohanes mawali matamanasa mangkonong i sema kamonsonya Aku. Pei rapanya nempo ia taa mawali matamanasangKu, taa mawei apa re’e to bae wo’u batuanginya pei gombo to nato’o i Yohanes etu to mampakanasa mangkonong Aku. Etu semo palaong to Aku mangika. Palaong etu nawaika mPa’angKu Aku damampakaroo, wali palaong etu semo mampakanasaka resi tau monso pu’u Pa’angKu nampokau Aku.
37“Pasi re’e wo’u to mawali matamanasa mangkonong Aku. Etu semo Pa’angKu, to nampokau Aku. Pei komi taware mampodongeka gomboNya, pasi tawa seja re’e mangangkita ewa wimba ta’aNya.
38Pasi Aku kunsani komi taa seja mangaya tuntuNya, apa Ia semo to nampokau Aku pei nempo ewa see, komi taa mangaya Aku.
39“Wali komi madota kojo maguru tuntu i mPue Allah, apa komi mampobuuka ane maguru tuntu i mPue Allah komi damangarata katuwu to singkasaenya. Wali tuntu i mPue Allah to nupoguru ngkomi etu, tuntu etu mampakanasa mangkonong Aku.
40Pei komi taa mangaya gombo to ratulis mangkonong Aku etu. Komi bo’omu mangalulu Aku, see naka komi taa mangarata katuwu to singkasaenya.”
41Wali i Yesu manganto’o wo’u, “Aku nempo taa nabarong nto lino, taa mawei resi Aku.
42Pei komi si’a ewa wetu. Komi rani kojo nabarong nto lino. Aku mangansani kojo raya ngkomi, wali Aku kunsani komi taa mamporayang Pue Allah. Apa ane komi mamporayang Ia, ane ewa see komi damangantima Aku.
43Pei nempo Aku ma’i napokau mPa’angKu, komi bo’omu mangantima Aku. Pei ane tau to yusa dama’i si’a napokau mPa’angKu, ojo mangaluluka pamporani ngkalionya, ane ewa see komi masanang mangantima ia.
44Wali manasa resi Aku to bae batuanginya resi komi si’a danabarong i mPue Allah to samba’aja. To bae batuanginya resi komi, etu semo danabarong nu yunu ngkomi to lino. Wali gete, ane ewa see komi taa kojo damangaya Aku!
45Pei nempo ewa see, ne’e mampobuuka Aku semo to damanganto’oka Pa’angKu mangkonong sala ngkomi. Anu to damampakanasa sala ngkomi, etu semo anu to natulis i Musa tempo owi. Wali komi mansarumaka komi darapalaes ane mangalulu anu to natulis i Musa etu. Pei kamonsonya komi taa mangaya to itulisinya.
46Apa ane komi monso pu’u mangaya to natulis i Musa etu, ane ewa see komi damangaya seja Aku, apa i Musa nangantulis mangkonong Aku semo.
47Pei komi taa mangaya anu to natulis i Musa etu, see naka matantu kojo komi taa seja damangaya gombo to si Aku.” Wali ewa wetu naika i Yesu mampakanasaka to Yahudi etu mangkonong koroNya.
Download Audio MP3 (Yohanes 5):
Mobile (Low Quality) - CD (High Quality)
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel