1Nako koge'ena de 'okia ngone pongose ma ngale 'o Abraham, to ngone 'o Yahudioka nanga edete de nanga dotumu gu'una? Kokia so 'una 'idadi yomarimoioli de ma Jo'oungu ma Dutu?
2Nako ma sababu 'okia sonaa wadi-diai ge'ena so ma Jo'oungu ma Dutu widawongo wodadi 'o nyawa gee ma Jo'oungu ma Dutu 'awi singina yasa-sanangi, ge'ena ma titi de ma 'ena 'awi singina 'iamoko. Ma koidadiwa 'awi singina 'iamoko ma Jo'oungu ma Dutu 'awi bionoka.
3'O Buku 'Itebi-tebinoka 'isilefoku, "'O Abraham wongaku ma Jo'oungu ma Dutuka, so de 'awi ngo-ngaku ge'ena ma Jo'oungu ma Dutu widawongo wodadi 'o nyawa gee ma Jo'oungu ma Dutu 'awi singina yasa-sanangi."
4'O nyawa gee yoma-manarama ge'ena yomadamake manga sewa, de manga sewa ge'ena koyadoimuwa 'ato kayakikula sababu ge'ena to 'ona manga hak.
5Ma naga 'o nyawa munuka 'ona koyomasiga-gaowa to 'ona ma sirete manga di-diaika, 'ona yomasidutuku ma Jo'oungu ma Dutuka gee wosinyata 'o nyawa yosowo-sowono yakisipidili 'o sowonoka. Ma titi 'o ngo-ngaku ge'ena, ma Jo'oungu ma Dutu wakidawongo yomarimoi de de 'una, so ko manga di-diaiwa.
6Koge'enali mita ma Koana 'o Dautu 'awi di-dibangi. Ge'enau so wongose 'ato yosanangioka 'o nyawa gee ma ngale ma Jo'oungu ma Dutu so yakidawongokau yomarimoi de de 'una ma titi ko manga di-diaiwa. 'O jaji ma siraka 'o Dautu wongose konee,
7"Yosanangioka 'o nyawa gee manga dolosori de manga sowono ma Jo'oungu ma Dutu kowosi-singinawau.
8Yosanangioka 'o nyawa gee manga sowono ma Jou kowongano-nganonuawau!"
9'O demo gee ma betongo yosanangioka, ge'ena done ma dumutu duga ka gee yamote-moteke 'o suna ma 'atorangi? Bolo de gee 'o nyawa koyamote-motekuwa 'o suna ma 'atorangi? Ngomi miosidemokau 'isira 'ato 'o Abraham ma Jo'oungu ma Dutu widawongo wodadi 'o nyawa gee 'awi singina yasa-sanangi, sababu 'o Abraham wongaku ma Jo'oungu ma Dutuka.
10Ma 'orasi kokia de ma Jo'oungu ma Dutu wongose 'ato 'o Abraham widawongo wodadi ma Jo'oungu ma Dutu 'awi singina yasa-sanangi? 'O Abraham wisuna 'iduanginou? bolo ko'uwasi? Ma goungu 'una kowisunawasi.
11De womasuna ge'ena duga ka 'o no-nako 'ato 'una widawongokau wodadi 'o nyawa gee ma Jo'oungu ma Dutu 'awi singina yasa-sanangi, sababu 'una wongaku ma Jo'oungu ma Dutuka. 'Una ma Jo'oungu ma Dutu widawongo ma 'orasi kowamotekuawasi 'o suna ma 'atorangi. De ge'enau so 'o Abraham wodadi 'o nyawa yongaku-ngaku ma Jo'oungu ma Dutuka manga dea, so ma Jo'oungu ma Dutu wakidawongokau yodadi 'o nyawa gee 'awi singina yasa-sanangi, ngaro 'ona koyamotekuwa 'o suna ma 'atorangi.
12Mita 'o Abraham ge'ena 'o suna ma 'atorangi yamote-moteke manga dea. 'Una wodadi to 'ona manga balusu, ge'ena ma sababu ka 'o sunawa duga ma 'atorangi yamoteke so 'ena manga ngo-ngaku ma Jo'oungu ma Dutuka, 'isoka 'o Abrahamuoli gee ma 'orasi kowamotekuawasi 'o suna ma 'atorangi.
13Ma Jo'oungu ma Dutu wojaji 'o Abrahamuka de 'awi waatuku 'ato 'o dunia ne'ena dua 'imadadi to 'una de 'awi waatuku. Ma Jo'oungu ma Dutu wojaji 'o Abrahamuka koge'ena, ge'ena ko ma ngalewa 'ato wosingounu 'o besesongo gee 'o Musa wositota-totara, ma 'ena sababu wongaku ma Jo'oungu ma Dutuka sigado ma Jo'oungu ma Dutu widawongo wodadi 'o nyawa gee 'awi singina yasa-sanangi.
14Sababu nako duga ka gee 'o nyawa yamote-moteke 'o besesongo gee 'o Musa wositota-totara 'asa yamake 'okia naga ma Jo'oungu ma Dutu wojajiokau, ge'ena 'o ngo-ngaku ma Jo'oungu ma Dutuka ka ma eta ma ma faedaa koi'iwa, de ma Jo'oungu ma Dutu 'awi jaji mita ka 'o somoa.
15Nako de ma 'ena 'o besesongo ma raiokau paparene de 'inahukumu. Ma nako 'o besesongo koi'iwa, ge'ena koi'iwa paparene.
16So ma Jo'oungu ma Dutu 'awi jaji ge'ena ma titi 'o nyawa manga ngo-ngaku ma Jo'oungu ma Dutuka. Ge'ena 'imadadi 'o singina nganono 'o Abraham 'awi waatuku 'iodumu. Ge'ena dau ge'ena 'o co-catu ma Jo'oungu ma Dutuno. Ma co-catu ge'ena duga ka 'o Yahudiwa ma nyawaka gee 'o besesongo ge'ena yakiparetano ma mita 'o nyawaka gee yongaku-ngaku ma Jo'oungu ma Dutuka 'isoka 'o Abrahamuoli. Sababu 'o Abraham ge'ena gee pongaku-ngaku poodumu nanga dea.
17Sababu 'o Buku 'Itebi-tebinoka 'isilefoku ma Jo'oungu ma Dutu wongose koneda 'o Abrahamuka, "Ngoi tonigorakokau nodadi 'o sagala nyawa 'iodumu manga dea." Koge'enau ma Jo'oungu ma Dutu wojaji 'o Abrahamuka. De 'o Abraham wongaku. 'Unau ge'ena ma Jo'oungu ma Dutu gee wosimomi-momiki 'o nyawa yosonge-songenuku, 'unau ge'ena wadiai 'okia naga koi'iwasi 'imadadi de ma 'ena ka de wobicara duga.
18'O Abraham tatapu wongano-nganonou 'o jaji ge'ena ngaro kawomanganonuawau ma. Ge'enau so 'una wodadi 'o sagala nyawa 'iodumu manga dea. 'Isoka 'isilefoku 'o Buku 'Itebi-tebinoka, "'Ani waatuku dua kaipiakorikau."
19Ma 'orasi ge'ena 'o Abraham wanakokau 'ato ma raiokau 'awi ngowaka koi'iwau, sababu woperekiokau, 'awi 'umuru rekeni 'o taunu ratusu moiou. De mita 'awi wekata 'o ngo Sara gumuna 'ami ngowaka koi'iwa. Ma 'o Abraham 'awi ngo-ngaku koikuranguwa.
20'Una tatapu wongaku de 'awi singina koikapulawa ma ngale ma Jo'oungu ma Dutu 'awi jaji. De 'awi ngo-ngaku ge'ena, 'una 'ifoloiosi wisikuata, so ma rai ma Jo'oungu ma Dutu wisiarene.
21'Una wongaku ma sala 'ato ma Jo'oungu ma Dutu wa'akunu wadiai 'okia naga gee wojajiokau.
22Ge'enau so 'o Abraham ma Jo'oungu ma Dutu widawongo wodadi 'o nyawa gee ma Jo'oungu ma Dutu 'awi singina yasa-sanangi.
23'O demo-demo gee 'ingose 'ato "widawongo wodadi 'o nyawa gee ma Jo'oungu ma Dutu 'awi singina yasa-sanangi" 'isilefo ma dumutu duga ka 'o Abrahamukawa,
24ma ngoneno mita. Ngone mita 'asa wonadawongo podadi 'o nyawa gee yasanangiokau ma Jo'oungu ma Dutu 'awi singina, sababu ngone powingaku ma Jo'oungu ma Dutuka gee wisiwango-wangokau 'o Yesus to ngone nanga Jou ngaro wosongenukou ma.
25'O Yesus 'una wisisarakaniokau ma ngale wito'oma sababu watuusu to ngone nanga sowono; ge'enaka de ma Jo'oungu ma Dutu wisiwangoli ma ngale ngone 'idadi pomarimoioli de ma Jo'oungu ma Dutu.
Download Audio MP3 (Roma 4):
Mobile (Low Quality) - CD (High Quality)
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel