Alkitab Mobile SABDA
[VER] : [TOBA]     [PL]  [PB] 
 <<  1 Tawarikh 26 >> 

I. Pargansion di halak sijaga pintu 1-19. II. Di halak siramoti ugasan na badia 20-28. III. Di halak panuturi dohot panguhum 29-32.

1(I.) Taringot tu pargansion di halak sijaga pintu: Sian pinompar ni si Kora: Si Meselemya, anak ni si Kora, sian pinompar ni si Asap.

2Ia angka anak ni si Meselemya on do: Si Sakaria buhabajuna, si Jediael paidua, si Sebadia paitolu, si Jatniel paiopat.

3Si Elam pailima, si Johanan paionom, si Eleonai paipitu.

4Ia angka anak ni si Obed-Edom on do: Si Semaya buhabajuna. Si Josabad paidua, si Joa paitolu, si Sahar paiopat, si Netaneel pailima.

5Si Ammiel paionom, si Isasar paipitu, si Peuletai paiualu, ai ditumpak Debata do ibana gabe.

6Anakna si Semaya pe tubuan anak do, angka na mangarajai di pinompar ni ompuna, ai angka ulubalang na marhuaso do nasida.

7Angka anak ni si Semaya on do: Si Otni, si Repael, si Obed dohot si Eljabat, ro di angka anggina i: Si Elihu dohot si Semaya, angka na marhuaso.

8Luhutna i pinompar ni si Obed-Edom do; nasida tahe ro di anaknasida dohot anggina, angka jolma na gogo be mangaradoti tohonanna, onompulu dua halak sian pinompar ni si Obed-Edom.

9Ia pinompar ni si Meselemya ro di anggina, angka jolma na marhuaso do, sampulu ualu halak toropna.

10Ia angka anak ni si Hosa, sian pinompar ni si Merari, on do: Si Simri i ma indukna: Atik pe so ibana nian buhabajuna, dipabangkit amana do ibana gabe induk.

11Si Hilkia paidua, si Tebalia paitolu, si Sakaria paiopat. Sude angka anak dohot anggi ni si Hosa sampulu tolu halak do.

12On ma angka pargansion ni halak sijaga pintu mangihuthon induk ni angka baoa, panahatan ni parhalan, rap dohot angka anggina, marhalado di bagasan joro ni Jahowa.

13Jadi didabu nasida ma rujiruji, dos tahe di na metmet dohot di na balga marompuompu, mangganupi angka pintu i.

14Ia rujiruji ni pintu na dingkan habinsaran, hona do tu si Selemia; taringot tu si Sakaria anakna i, panuturi na marroha, didabu rujiruji, gabe hona tu ibana sambola tungkan utara.

15Alai anggo di si Obed-Edom hona do tungkan dangsina dohot tu anakna di lambung bagas parugasanan.

16Ia di si Suppim dohot di si Hosa tungkan hasundutan, di lambung bahal Salehet, di dalan tungkan julu; patondong be angka parhalan i.

17Tungkan habinsaran onom do halak Lepi; tungkan utara opat halak ganup ari; tungkan dangsina pe opat halak ganup ari; alai anggo di lambung bagas parugasanan duadua halak do.

18Tole di bahal Parbar tungkan hasundutan, opat halak do tondong ni dalan na bolon jala dua halak di Parbar.

19I ma angka pargansion di halak sijaga pintu sian pinompar ni si Kora dohot sian pinompar ni si Merari.

20(II.) Ia sian halak Lepi si Ahia do panahatan ni ugasan di joro ni Debata ro di ugasan angka na pinarbadiaan.

21Ia angka anak ni si Ladan, pinompar ni si Gerson: Si Jeiel i do indukna sian si Ladan pinompar ni si Gerson.

22Ia angka anak ni si Jeiel i i ma: Si Jetam dohot si Joel, anggina i, i ma panahatan ni ugasan di joro ni Jahowa.

23Ia sian pinompar ni si Amram dohot si Jisehari dohot si Hebron dohot si Usiel:

24Si Sebuel, anak ni si Gerson, tubu ni si Musa, induk ni nasa panahatan ni ugasan.

25Ia angka anggina, i ma pinompar ni si Elieser: Si Rehabia apala anakna, anak ni muse si Jesia, anak ni muse si Joram, anak ni muse si Sikri, anak ni muse si Selomit.

26Ia si Selomit i rap dohot angka anggina panahatan ni nasa ugasan na badia, angka na pinarbadiaan ni raja Daud dohot angka induk marompuompu ro di angka induk ni sisaribu halak dohot sisaratus halak ro di angka induk ni parangan.

27Ugasan angka na dapot sian hamusuon ro di tabantaban nunga diparbadiai nasida hian, asa pabalgahon joro ni Jahowa.

28Tole muse saluhut na pinarbadiaan ni panurirang Samuel dohot si Saul, anak ni si Kis dohot si Abner, anak ni si Ner dohot si Joab, anak ni Nai Seruia. Luhut tahe ugasan na pinarbadiaan sahat tu si Selomit do dohot tu angka anggina i.

29(III.) Sian pinompar ni si Jisehari: Si Kenania dohot angka anggina mangaradoti ulaon ruar di halak Israel bahen panuturi dohot panguhum.

30Sian pinompar ni si Hebron: Si Hasabya dohot angka anggina i, jolma angka na marhuaso, saribu pitu ratus halak toropna, angka na parentarenta tohonan di Israel sambola tungkan hasundutan ni Jordan, mangaradoti huhut sandok ulaon tu Jahowa dohot ulaon tu rajai.

31Sian pinompar ni si Hebron: Si Jeria indukna marompuompu di pinompar ni si Hebron marsundutsundut. Paopatpulutaonhon dung harajaon ni si Daud tarjou nasida marpungu tu Jaser di Gilead, gabe jumpang di tongatonganasida angka ulubalang na marhuaso.

32Jala angka anggina i, halak na marhuaso, dua ribu pitu ratus toropna, angka induk marompuompu; nasida ma dipabangkit raja Daud parentarenta halak Ruben, Gad dohot satonga marga Manasse, mangaradoti nasa ulaon tu Debata dohot tu rajai.



 <<  1 Tawarikh 26 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel