Alkitab Mobile SABDA
[VER] : [TOBA]     [PL]  [PB] 
 <<  Hosea 9 >> 

I. Ro do tingki partubolan tu Israel 1-9. II. Sahat tu tangan ni angka parbegu do Epraim 10-17

1(I.) Unang marlas ni roha ho ale Israel pola marolopolop songon angka parbegu, ai nunga marmainan ho marbalik sian Debatam, nunga mangapian ho di upa parmainanon di atas ni saluhut angka pardegean eme.

2Dibahen i ndang be parmuduon ni pardegean dohot pangilangan anggur nasida jala ansion ni anggur na imbaru do nasida.

3Ndang be maringan nasida di tano ni Jahowa, ingkon mulak tu Misir do Epraim, jala panganonnasida do na ramun di Assur.

4Ndang tagamon usehononnasida anggur di Jahowa, jala ndang tagamon lomo rohana di angka peleannasida i, tudoshon sagusagu hinamago do i di nasida ramun do sude na manganhon. Ai marmudu hosanasida sandiri do sagusagunasida i, ndang tarbahen masuk tu joro ni Jahowa.

5Tung aha ma bahenonmuna di ari luhutan dohot di ari raya ni Jahowa?

6Ai ida ma, nunga laho nasida dibahen hasisiap; papungupunguon ni Misir do nasida, Mempis mananom nasida. Homitannasida sian perak teanon ni latong do, duriduri tubu di bagasan undungundungnasida.

7Nunga ro angka ari partubolan! Nunga ro angka ari pamalosan! Botoon ni Israel ma disi: Na bodo do panurirang, lalaen do baoa partondion dibahen hinadeak ni hajahatonmu dohot dibahen hinagodang ni pangiburuon.

8Epraim mangonggop umbajo bangso ni Debatangku; panurirang i do rambang ni halak sitaoni pidong di saluhut angka dalanna; masa do pangiburuon di bagasan bagas ni Debatana.

9Tung na bagas do halonongannasida, songon uju di Gibea; ingotonna ma hajahatonnasida, luluhononna ma dosanasida.

10(II.) Songon parbue ni anggur di halongonan Israel jumpang ahu, songon patumonaan ni antajau huida ompumuna di mulana; hape laho do nasida tu Baal-Peor pasahathon dirinasida tu haurahon, gabe biasbias nasida suang songon puangnasida.

11Dibahen i habang do songon pidong hamuliaon ni Epraim, ndang be mangintubu, ndang be marhangoluan jolma, manang olo gabegabean.

12Ai nang pe dipagodanggodang nasida angka anaknasida, punu do nasida bahenonku, langa soada jolma. Tongon do, marjea ma nasida molo manginsurut ahu sian nasida.

13Tudoshon Tirus jolo huida Epraim, sinuan di jampalan na lomak; alai ingkon togihonon ni Epraim sogot angka anakna laho pabunuhonsa.

14Lehon ma tu nasida, ale Jahowa! Aha tahe patut lehononmu? Lehon ma tu nasida bortian na hol dohot bagot na marsik.

15Nasa hajahatonnasida di Gilgal do, ai disi do hupungka mangkagigihon nasida. Ala ni roa ni pambahenannasida, onjarhononku ma nasida sian bagashu, ndang be datdatanku mangkaholongi nasida; panggunturi do saluhut induknasida.

16Nunga talu Epraim; nunga malos uratna, ndang be marparbue nasida; tung sura pe mangintubu nasida, bunuonku do angka na pinarsinta ni butuhanasida.

17Bolongkonon ni Debatangku do nasida, ai ndang ditangihon nasida ibana, jadi maotaot ma nasida di tongatonga ni halak parbegu.



 <<  Hosea 9 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2021
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran