Mazmur 103 (TOBA)

[VER] : [TOBA] [PL] [PB]

<< Mazmur 103 >>

Pujipujian tu Debata na asi roha i 1-22

1Ende sian si Daud. Puji ma Jahowa, ale tondingku, jala nasa rohangku di bagasan mamuji goarna na badia i.

2Puji ma Jahowa, ale tondingku, jala unang tung halupahon denggan ni basana sudena.

3Ibana do manesa dosam sudena, Ibana pamalum angka sahitmu sudena.

4Ibana paluahon ngolum sian hamagoan, Ibana martumpalhon tu ho denggan basa dohot asi ni roha.

5Ibana pamahap roham marhitehite denggan basa, asa mulak poso ho, songon pidong raja wali.

6Jahowa do patupahon angka pambahenan hatigoran, jala dipatingkos uhum tu sude angka na nirupa.

7Ibana do pabotohon angka dalanna tu si Musa, tu angka anak ni Israel angka pambahenna i.

8Parasi roha jala pardengganbasa do Jahowa, lambat tarrimas jala parasi roha godang.

9Ndang tongtong Ibana manorui, jala ndang gotos rohana saleleng ni lelengna.

10Ndang dibahen tu hita hombar tu angka dosanta, jala ndang dibaloshon tu hita hombar tu angka hajahatonta.

11Ai songon dao ni langit sian tano on do gogo ni asi ni rohana di angka na mangkabiari Ibana.

12Songon dao ni habinsaran sian hasundutan dipadao Ibana sian hita angka pangalaosintai.

13Songon asi ni amaama tu angka anakna asi ni roha ni Jahowa di angka na mangkabiari Ibana.

14Ai diboto Ibana do tompanta, diingot do orbuk hita.

15Songon duhutduhut do ariari ni jolma na gale i, marbunga ibana songon bunga di ladang.

16Ai dibolus alogo ibana, jadi ndang disi be, jala ndang tartanda be ingananna i.

17Alai anggo asi ni roha ni Jahowa sian salelenglelengna do ro di salelenglelengna di angka na mangkabiari Ibana, jala hatigoranna marnini marnono.

18Di angka na mangaradoti padan binahenna i dohot patupahon angka patikna i.

19Nunga dipaojak Jahowa habangsana di banua ginjang, jala harajaonna sasudena.

20Puji ma Jahowa, hamu ale angka surusuruanna, hamu ale angka ulubalang na gogo, angka na patupahon hatana, di na tinangihonmuna soara ni hatana i!

21Puji ma Jahowa, hamu ale angka paranganna i sudena, hamu angka parhaladona, angka sipasaut lomo ni rohana!

22Puji ma Jahowa, hamu ale angka jadijadianna sudena, di sude inganan ni harajaonna i, puji ma Jahowa, ale tondingku!

<< Mazmur 103 >>

Bahan Renungan: SH - RH - ROC