1Pakalan saemi misa’ taunNa Puang Matua tete dio kadanNa PUANG dio mai Yehuda lako Betel, tonna marassan bendan tu Yerobeam dio olo inan pemalaran la untunu pemala’.
2Ma’kadami tete dio kadanNa PUANG lako inan pemalaran, nakua: E, inan pemalaran, e inan pemalaran, nakua kadanNa PUANG: Lan tongkonan layukna Daud la dipadadian misa’ pia muane, disanga Yosia, iamo la urrere’i dao kalemu tu mintu’ to minaa biasa memala’ dao inan madao, tu untunu pemala’ dao kalemu, sia dao kalemu to, la nanii tau untunu buku tolino.
3Allo ia dukato napa’peissananni misa’ tanda mangnga, sia nakua: Inde sia tu tanda mangnga, tu umpamanassai kumua mangkamo ma’kada tu PUANG, Nakua: Manassa iate inan pemalaran iate la tesse, anna iatu au dao tisambo’-sambo’.
4Iatonna rangii datu tu kadanna taunNa Puang Matua umpa’kadai inan pemalaran dio Betel, nae’te’mi Yerobeam tu limanna dao mai inan pemalaran iato, anna ma’kada nakua: Tingkanni! Apa iatu limanna tu nae’te’ lako matoromo, naurungan tang tikambemo sule.
5Tessemi tu inan pemalaran, anna tisambo’ tu au dao mai, iamotu tanda mangnga napa’peissanan taunNa Puang Matua tete dio kadanNa PUANG.
6Mebalimi tu datu lako taunNa Puang Matua, nakua: Pengkamoyanna’ pa’kamaseanNa PUANG, Kapenombammi, sia passambayanganna’, anna tibokkok sule tu limangku. Napengkamoyammi taunNa Puang Matua pa’kamaseanNa PUANG tu datu anna tibokkok sule tu limanna datu susito dolona.
7Nakuami tu datu lako te taunNa Puang Matua: Maikomi anta lao lako banuangku, pabatta’i tu kalemi, angku benkomi misa’ pamengan.
8Apa nakua te taunNa Puang Matua lako datu: Moi ammi benna’ sangsese tu tongkonan layukmi, tae’ duka tala tama sola, sia tae’ angku la kumande sia mangiru’ lan inan iate.
9Belanna susimoto dipepasanan lako kaleku tete dio kadanNa PUANG, nakua: Tae’ muma’din kumande ba’tu mangiru’ dio, sia da musule umpolalanni tu lalan pura muolai.
10Malemi umpolalan lalan senga’, tae’ nasule unnola lalan mangka naola tonna sae lako Betel.
11Den duka dio Betel tu misa’ nabi matua; saemi tu anakna, anna uleleanni lako tu mintu’ apa mangka napogau’ tinde taunNa Puang Matua allo iato dio Betel, na mintu’ kada napokada lako datu, naparampo duka lako ambe’na.
12Nakuami tu ambe’na lako tinde mai anakna: Lalan umbara tu naola? Napadulluammi anakna tu lalan naolai taunNa Puang Matua, tu sae dio mai Yehuda.
13Nakuami lako anakna: Lapikanna’ tu keledai. Nalapikammi tu keledai, anna sakei.
14Narundu’imi tu taunNa Puang Matua, nalambiranni unno’ko’ diong garonto’ tarpin; anna kuai lako: Kamumoraka tu taunNa Puang Matua, tu sae dio mai Yehuda? Nabalimi, nakua: Akumo.
15Nakuami lako: Maikomi talao sola lako banuangku ammi kumande.
16Apa nakua: Tae’ kuma’din sule mati’ ussisolangkomi sia tae’ kula lendu’ dio banuammi, sia tae’ duka anta la kumande sola sia mangiru’ lan inan iate.
17Belanna mangka dipepasanan lako kaleku tete dio kadanNa PUANG, Nakua: Tae’ muma’din kumande sia mangiru’ dio; sia da musule umpolalanni tu lalan mangka muolai.
18Nakuami te tau lako: Misa’ dukana’ nabi, susi kamu, sia nakuamo malaeka’ lako kaleku tete dio kadanNa PUANG: Solanni sule tama banuammu anna kumande sia mangiru’. Apa iatu iannato napakena.
19Sulemi sola, nakumande sia mangiru’ lan banuanna.
20Iatonna marassan unno’ko’ sola duai dio to’ meda, saemi tu kadanNa PUANG lako nabi ussolanni sule.
21Metambami lako taunNa Puang Matua, tu lu dio mai Yehuda, nakua: Inde sia tu kadanNa PUANG: Belanna ullendaiko parentaNa PUANG sia tae’ muturu’i tu apa Napepasanan PUANG, Kapenombammu, lako kalemu,
22sangadinna suleko, ammu kumande sia mangiru’ indete inan tu Nakuangko Puang: tae’ muma’din kumande sia mangiru’ dio – iamoto iatu batang rabukmu tae’mo nala ullambi’ lamunanna nene’ to dolomu.
23Iatonna mangkamo kumande sia mangiru’, nalapikammi keledai tu nabi mangka nasolan sule.
24Apa iatonna ke’de’mo male, siappa’mi singa dio lu lalan, napatei. Nasumpandan bang tu batang rabukna dio lalan; na iatu keledai bendan dio la’pekna, na iatu singa bendan duka dio la’pekna batang rabuk iato.
25Denmi tau lendu’ dio, anna tiroi tu batang rabuk sumpandan dio lalan, na iatu singa bendan bang dio la’pek batang rabuk. Saemi napokada tau iato tama kota tu nanii nabi matua torro.
26Iatonna rangimi tinde nabi ussolanni sule, nakuami: Iamotu tu taunNa Puang Matua, tu mangka ullendai parentaNa PUANG; iamoto Naeloranni PUANG nadammak singa anna patei, susi tu kadanNa PUANG tu mangka Napokadanni.
27Nakuami lako anakna: Lapikanna’ keledai. Nalapikammi.
28Ke’de’mi male, anna lambi’i tu batang rabuk sumpandan dio lalan; na iatu keledai sola singa bendan bang dio la’pek batang rabuk iato; iatu batang rabuk tae’ anna kande lenni singa, sia tae’ anna dammakki tu keledai.
29Naangkarammi tinde nabi tu batang rabukna tu taunNa Puang Matua, anna palangnganni keledai, anna baai sule. Sulemi tama kotana tu nabi matua la umbatingi sia la ullamunni.
30Naparokkomi lamunanna, anna batingi tau nakua: Oo dikka’ siulu’ku!
31Iatonna mangkamo ullamunni, ma’kadami lako tu mai anakna nakua: Iangku mate, la milamunna’ dio lamunan dinii ullamunni tu taunNa Puang Matua; na iatu bukungku pasirondongi bukunna.
32Belanna tae’ nasalai tang la dadi tu apa mangka napetamban tete dio kadanNa PUANG diona tu inan pemalaran dio Betel sia diona mintu’ banua pemalaran dao lu inan madao lan lu tondok Samaria.
33Iatonna mangkamo tu iannato, tae’ duka anna mengkatoba’ tu Yerobeam untampe gau’ kadakena, sangadinna naangka’ pole’o tu ba’tu pira-pira to minaa la memala’ dao inan madao. Minda-minda morai, ia dukamo natokko dadi to minaa la memala’ dao inan madao.
34Iatu penggauran tontongnato napokasalan bati’na Yerobeam, naurunganni disanggang sia disabu’i dao mai kuli’na padang.
<< 1 Raja-raja 13 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel