Alkitab Mobile SABDA
[VER] : [TORAJA]     [PL]  [PB] 
 <<  1 Raja-raja 16 >> 

1Iatonna attu iato saemi tu kadanNa PUANG lako Yehu, anakna Hanani, tu diona kamandasanna Baesa, nakua:

2Tu belanna Kuangka’moko diong mai to’ barra’-barra’ angKu padadiko arungna taungKu to Israel, apa urrundu’moko bate lalanna Yerobeam sia ussua taungKu to Israel umpogau’ kasalan sia umpa’dikki penaangKu napobua’ mintu’ kasalanna,

3iamoto angKu la ummangsanni tu Baesa sola bati’na sia la Kupasusi bati’na Yerobeam, anakna Nebat, tu bati’mu.

4Minda-minda tu bati’na Baesa mate lan lu kota, iamo la nakande asu, na minda-minda mate dio lu padang, iamo la nasialai manuk-manuk dao lu langi’.

5Iatu tang dipokadannapa tu mintu’ tuna’na Baesa, sia mintu’ apa napogau’ sia kalalonganna, tang tisura’moraka lan sura’ ossoranna mintu’ datu Israel?

6Mangkato malemi tama batu dilobang tu Baesa sola nene’ to dolona, anna dipeliang dio Tirza na Ela, anakna muane, ussondai dadi datu.

7Sae dukami tu kadanNa PUANG lako Baesa sia mintu’ bati’na, tu nalopian nabi Yehu, anakna Hanani, belanna mintu’ kakadakean napogau’ dio pentiroNa PUANG sia belanna penggauranna tu umpa’dikki penaanNa Puang, naurunganni iatu kedona susi bati’na Yerobeam, sia belanna ia dukamo mangka umpatei tau iato mai.

Diona Ela, datu to Israel

8Iatonna taun ma’penduangpulo nnannan tu Asa umparenta to Yehuda, dadimi datu tu Ela, anakna Baesa, umparenta to Israel dio Tirza duang taun.

9Iatu Zimri, tu taunna, iamo umpangului sangsesena kareta parari, umpaden kasiturusan la unneai. Iatonna marassan mangiru’ dio Tirza lan banuanna Arza, pangulu sandan uai datu dio Tirza, namalango,

10tamami tu Zimri, naba’tai anna mate, tonna taun ma’penduangpulo mpitu tu Asa umparenta to Yehuda, na Zimri ussondai dadi datu.

11Iatonna ma’parentamo anna unnisung dao isungan kapayungan, napatei nasangmi tu mintu’ bati’na Baesa, moi misa’ muane tae’ napatuoi, la iatu mai sangdadianna la iatu mai sangmanena.

12Susimoto tu Zimri ummangsanni mintu’ bati’na Baesa, susitu kadanNa PUANG, tu Napokada diona Baesa, nalopian nabi Yehu,

13buntu tumangna mintu’ kasalan napogau’ Baesa sola Ela, anakna, sia kasalan napa’pesuan lako to Israel umpogau’i, naurunganni iatu penggauranna tu tae’ bang gai’na umpa’dikki penaanNa PUANG, Kapenombanna to Israel.

14Iatu tang dipokadannapa tu mintu’ tuna’na Ela sia mintu’ apa napogau’, tang tisura’moraka lan sura’ ossoranna mintu’ datu Israel?

Diona Zimri, datu to Israel

15Iatonna taun ma’penduangpulo mpitu tu Asa umparenta to Yehuda, dadimi datu tu Zimri dio Tirza pitung allo; tonna marassan tu to buda umpatama limbu Gibeton, lili’ to Filistin.

16Iatonna rangimi to buda tu umpatama limbu kota iato, kumua: iatu Zimri umpaden kasiturusan, sia mangka dukamo umpatei datu, naangka’mi mintu’ to Israel tu Omri, kamandang surodadunna to Israel dadi datu lan allo iato dio to’ inan nanii ma’tenda.

17Ke’de’mi tu Omri sola mintu’ to Israel dio mai Gibeton, anna patama limbui tu Tirza.

18Iatonna tiroi Zimri kumua ditalomo tu kota, malemi tama benteng tongkonan layuk, anna ballai tu tongkonan layuk daona lu, namate,

19buntu tumangna mintu’ kasalan napogau’, belanna napogau’ tu apa kadake dio pentiroNa PUANG sia urrundu’ bate lalanna Yerobeam sia unturu’ kasalan mangka napogau’ tonna pa’pesuanni lako to Israel umpogau’ kasalan.

20Iatu tang dipokadanna tu mintu’ tuna’na Zimri sia iatu kasiturusan natampa tang tisura’moraka lan sura’ ossoranna mintu’ datu Israel?

Diona Omri, datu to Israel

21Attu iato tipa’duami tu to Israel; sangsese malang lako Tibni, anakna Ginat, la unnangka’i datu, na iatu sesena malang lako Omri.

22Apa nasau’ buda to malang lako Omri na iatu to malang lako Tibni, anakna Ginat. Iatonna matemo tu Tibni, iamotu Omri ma’parenta.

23Iatonna taun ma’pentallungpulo mmisa tu Asa umparenta to Yehuda, dadimi datu tu Omri umparenta to Israel, sangpulo dua taunna. Annan taunna ma’parenta dio Tirza.

24Naallimi tu tanete Samaria da’dua talenta salaka dio mai Semer, nabangunni tu kota dao tanete iato, nasangai Samaria, napasikona sanganna Semer, puangna tanete iato.

25Iatu Omri umpogau’ apa kadake dio pentiroNa PUANG, mandu kadake anna iatu napogau’na mintu’ to dolona.

26Urrundu’ mintu’ bate lalanna Yerobeam, anakna Nebat, sia unturu’ kasalan, napa’pesuan lako to Israel umpogau’i, naurunganni iatu penggauranna tu tae’ bang gai’na umpa’dikki penaanNa PUANG, Kapenombanna to Israel.

27Iatu tang dipokadannapa tu mintu’ tuna’na Omri sia mintu’ apa napogau’ sia kalalonganna, tang tisura’moraka lan sura’ ossoranna mintu’ datu Israel?

28Mangkato tamami batu dilobang tu Omri dipasola nene’ to dolona, anna dipeliang dio Samaria, na Ahab, anakna muane, ussondai dadi datu.

Iatu Ahab umpenombai Baal

29Iatonna taun ma’tallungpulo ngkarua tu Asa umparenta to Yehuda, dadimi datu tu Ahab, anakna Omri, umparenta to Israel. Iatu Ahab, anakna Omri, duangpulo ndua taunna umparenta to Israel dio Samaria.

30Iatu Ahab, anakna Omri, umpogau’ apa kadake dio pentiroNa PUANG, mandu kadake anna iatu mintu’ to dolona.

31Iatu unturu’ kasalanna Yerobeam, anakna Nebat, maringnganpa, apa natompoi pole, belanna umpobaine Izebel, anakna Etbaal, datu to Sidon, sia male umpengkaolai Baal sia tukku umpenombai.

32Napabendanammi Baal tu misa’ inan pemalaran lan banua Baal, tu nagaragai dio Samaria.

33Sia nagaraga siapa Ahab tu lentong kayu dipodeata; napatarru’ bangmi Ahab tu penggauran susito, naurunganni umpa’dikki penaanNa PUANG, Kapenombanna to Israel, mandu pole’ na iatu mintu’ datu to Israel dolona.

34Iatonna linona Ahab nabangun pole’mi Hiel, to Betel, tu kota Yerikho. Sisayurammi anak pa’bunga’na, iamo tu Abiram tonna parandanganni; sia sisayuran anak tampakna, iamotu Segub tonna pabendanni tu babangan – susi kadanNa PUANG tu mangka Napokada nalopian Yosua, anakna Nun.



 <<  1 Raja-raja 16 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2020
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran