Pa’pasakka’ la umbangun Banua Kabusungan
1Nasuami Hiram, datu Tirus tu pesuanna lako Salomo, belanna narangi, kumua iatu Salomo ditokko mendadi datu la ussonda ambe’na, belanna iatu Hiram tontong sisangmane karra’ Daud.
2Nasuami Salomo tu tau lako Hiram, nakua:
3Miissan, kumua iatu ambe’ku Daud tae’ anna belai umpabendananni banua tu sanganNa PUANG, Kapenombanna, napobua’ mintu’ kasirarian tu napatingoanni tau tiku lao sae lako Napatunduk PUANG tu tau iato mai diong to’ lentekna.
4Apa totemo Nakamaseina’ PUANG, Kapenombangku, kamarampasan tiku lao, natae’ tau kusiualian sia tae’ kapangean sia tae’ kamandasan.
5Manassamo kusanga la kupabendanan banua tu sanganNa PUANG, Kapenombangku, susitu kadanNa PUANG lako ambe’ku Daud Nakua: Iatu anakmu tu la Kupaunnisung dao isungan kapayungammu ussondako, iamo la umpabendananni banua iato tu sangangKu.
6Iamoto suai tu mai tau lao ullellenganna’ kayu arasi’ dao Libanon, sia da’ito natundui taummi tu taungku, sia iatu sarona taummi la kubaya’ pada tu mipokadanna, belanna miissan kumua tae’i misa’ tu taungku manarang manglelleng kayu susito Sidon.
7Iatonna rangimi Hiram tu kadanna Salomo, sende tonganmi, nama’kada nakua: Mintu’na kadipudian lu lako PUANG te allo iate, tu mangka ungkamasean Daud misa’ pia muane kinaa la umparentai te bangsa kapua iate.
8Kurangimo tu apa misua tau umpokadanna’; la kupogau’ nasang tu pa’poraiammi diona tu kayu arasi’ sia kayu sendana.
9Mintu’ taungku la umbaai dao mai Libanon rokko tasik, angku a’ga raki’i lan tasik, sia kusombaranni lako inan tu la mipamanassanna’, anna dibukai inde to dio, ammi ma’din unnalai. Apa iatu kamu la minturu’ tu palakungku, iamotu la miben kande tu to lan tongkonan layukku.
10Susito nabenmi Hiram kayu arasi’ sia sendana tu Salomo sama tu naanga’na.
11Nabenmi Salomo duangpulo sa’bu koro’ gandung tu Hiram la napokande tau lan tongkonan layukna sia duangpulo koro’ minna’ saitun dilambuk; iate napa’bengan Salomo lako Hiram ke taunoi.
12Nakamaseimi PUANG kakinaan tu Salomo susitu Naallu’ lako kalena; denmi kasikaeloanna Hiram sola Salomo sia untanan duka misa’ basse sola duai.
13Mesuami tu datu Salomo unnarak tau dio mai mintu’ to Israel la ma’diama; iatu to diarak den tallungpulo sa’bunna.
14Nasuami datu tu tau iato mai male langngan Libanon, sisangsa’bu lan sangbulan sisonda-sonda; sangbulan dao Libanon, anna duang bulan dio banua. Adoniram ungkapalai tu pa’diaman iato.
15Ondongpito, den tu to mamullena datu pitungpulo sa’bu na karua pulona sa’bu to ma’pa’ batunna dao lu padang ma’buntunna.
16Senga’pi to tu pangulu mantari’na Salomo tu untiro pa’diaman, tallungsa’bu ntalluratu’, tu ungkapalai mintu’ to undiamai tu pa’diaman iato.
17Sia nasua datu tu tau umpa’ batu kapua, iamotu batu maballo, anna batu dipa’ dipoparandangan banua iato.
18Mintu’ pandena Salomo sia mintu’ pandena Hiram sia to Gibal untara kayu sia umpa’ batu sia napasirapa’ melo tu apa iato la umbangunni tu banua.
<< 1 Raja-raja 5 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel