Saul urrapanan to Yabesy dio mai to Amon
1Ta’kala saemi tu Nahas to Amon umpatama limbu tondok Yabesy dio lili’na Gilead. Ma’kadami tu mintu’ to Yabesy lako Nahas, nakua: La untananki’ misa’ basse, angki lumbang baka direngnge’ sola nasang lako kalemi.
2Apa ma’kada tu Nahas, to Amon lako, nakua: Misa’ri kutuntun ke la sibasseki’, iamotu mata kananmi la kusu’be’i nasang; susimoto la kunii untodingi siri’ tu mintu’ to Israel.
3Ma’kadami tu mintu’ pekaamberan Yabes lako, nakua: Popa’elo’nakan pitung allo, angki sua tau lako mintu’ lili’na tondok Israel. Iake tae’i misa’ tau sae untunduikanni, la tassu’kan ussorong kaleki lako kalemi.
4Iatonna rampo tu pesua iato lako Gibea-Saul, napokadami tu mintu’ kada iato lako to buda, anna siurrukan tumangi’.
5Ta’kala saemi tu Saul dio mai boko’ sapinna lan mai pa’lak, anna ma’kada, nakua: Apara napomasussa tu to buda anna siurrukan tumangi’? Nauleleammi tau lako kalena tu mintu’ apa napokada to Yabes.
6Tonna rangimi Saul tu kada iato, narampoimi PenaanNa Puang Matua sia re’dek tu ara’na.
7Naalami tu sapi sangayoka, nata’tak-ta’takki, nasuai tu pesua iato umbaai tu panta’tak iato lako mintu’ lili’na tondok Israel, anna ma’kada nakua: Minda-minda tu tae’ natassu’ umbumbun boko’na Saul sia Samuel, manassa iatu sapinna la dipasusi dukato. Attu iato saemi tu kamatakuran lu dio mai PUANG lako mintu’ tau, anna sangtiangkaran tassu’.
8Nabilangmi tu tau iato dio Bezek, naden tallu ratu’ sa’bu tu to Israel, na to Yehuda tallungpulo sa’bu.
9Nakuami lako to disua sae: Susite tu la mipokadan to Yabesy dio Gilead, kumua: masiang la sae tu kadirampanammi, ke kulla’i allo. Tonna rampomo tu to disua napokadammi to Yabesy tu iannato, anna parannu tu tau iato mai.
10Ma’kadami tu to Yabesy, nakua: Masiang angki tassu’ ussorong kaleki lako kalemi, ammi pogau’i lako kaleki tu misanganna melo.
11Iatonna masiangmo napatallung tuntunammi Saul tu tau iato mai, anna tama to’tendana uali tonna dannari sia nasabu’imi tu to Amon tonna tae’pa nakulla’ allo; anna sisarak-sarak tu mintu’ to torropa, naurunganni tae’mo torro sibaa sida’dua tu tau.
12Attu iato ma’kadami tu to buda lako Samuel, nakua: Mindara ia, tu ma’kada dolona kumua: Umbani apa tu Saul la umparentaki’? Baai mai tu tau iato, angki patei.
13Apa nakua Saul: Allo iate tae’ nama’din misa’ tau dipatei, belanna allo iate Napaden PUANG tu kadirampanan lako to Israel.
14Sia nakuapa Samuel lako to buda: Maikomi, melo ke maleki’ lako Gilgal, anta ba’rui tu kadatuan dio.
15Male nasangmi tu bangsa iato lako Gilgal unnangka’ Saul dadi datu dio oloNa PUANG dio Gilgal sia napemalaran inde to tu pemala’ kasalamaran dio oloNa PUANG; parannu-rannumi tu Saul inde to dio sola mintu’ to Israel lendu’ marua’na.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel