Kamabirisanna Saul lako Daud
1Iatonna mangkamo tu Daud ma’kada lako Saul, la’ka’mi penaanna Yonatan lako Daud sia nakamasei Yonatan susi kalena.
2Allo ia dukato natambaimi Saul, sia tae’mo natangga’i sule lako banuanna ambe’na.
3Sibassemi Yonatan tu Daud, belanna nakamasei susi kalena.
4Nalossokammi Yonatan tu bayu lamba’na nabenni Daud, susi dukato tu mintu’ pakeanna, sae lako pa’dangna sia panana sia salipi’na.
5Ianna tassu’ male tu Daud, ke nasuaoi Saul, tontong bang patalo; iamoto anna angka’i Saul pangulu surodadu. Na iatu iannato naala penaanna to buda sia mintu’ to naala parea Saul.
6Iatonna sulemo tu tau iato mai sola Daud, tonna mangka tu Daud untalo to Filistin iato, tassu’mi tu mintu’ baine lan mai mintu’ tondok to Israel, anna marran-marran menani untammui datu Saul, umpannoni ganda’-ganda’ sia ma’dandan sia unnarrak-arrak umpannoni giring-giring.
7Iatu mintu’ baine ma’dandan sisonda-sonda menani, nakua: Napatei Saul massa’bu-sa’bu! Apa Daud ma’lampa-lampa!
8Re’dekmi ara’na Saul sia tang naporai, anna tangnga’i lan penaanna: Daud naben tau iato mai ma’lampa-lampa, apa aku ma’sa’bu-sa’buri. Manassa ia duka tu kadatuan ia umpotaai undinna.
9Randuk allo iato mangimburu bang tu Saul untiroi tu Daud.
10Iatonna masiangmo dio mai ta’pa natamaimi penaa kadake lu dio mai Puang Matua tu Saul, naurunganni susito bomboan lan tongkonan layukna; nadedekmi Daud tu katapinna susi biasanna kiallo-kiallo. Iatu Saul untoe dokena.
11Naayakammi Saul tu dokena anna ma’tangnga’ lan penaanna: Melo ke kurokki tu Daud natipentana’ lako rinding. Apa napasala Daud tu pangrokna sae lako ma’penduanna.
12Nakataku’mi Saul tu Daud, belanna Narondong ia PUANG, natoyangmo tu Puang dio mai Saul.
13Iamoto napatoyangi Saul tu Daud, naangka’i pangulunna to sangsa’bu, naurunganni lu tama lu lan mai dio tingayona surodadu iato mai.
14Iatu Daud maupa’ dio lu mintu’ lalanna, belanna Narondong PUANG.
15Iatonna tiromi Saul, kumua maupa’ tongan tu Daud, samataku’- taku’nami,
16apa mintu’ to Israel sia to Yehuda ungkamali’ Daud, belanna lu lako lu dio mai dio tingayona tau iato mai.
17Nakuami Saul lako Daud: Iatu anak pa’bunga’ku, disanga Merab, la kupasirampanangko kapa’, ke dadi dukako pia lalong dio kaleku sia ammu pogau’i tu rarinNa PUANG. Apa ma’tangnga’ Saul kumua: Da nalimangku umpata’pai, sangadinna limanna to Filistin.
18Nakuami Daud lako Saul: Mindaora’ aku te sia to apara tu sangdadiangku sia pa’rapuanna ambe’ku dio lu to Israel, angku la dadira manintunna datu?
19Tonna lambi’mi attunna tu Merab, anakna Saul, la diben Daud, nabenmi Adriel, to Meholati la napobaine.
20Apa iatu Mikhal, anakna Saul ungkabudai Daud. Iatonna parampoi tau lako Saul tu iannato, nakalo’mi penaanna.
21Ma’tangnga’mi tu Saul, nakua: Melo ke kubenni nabutung ia umpoyai, anna limanna to Filistin umpata’pai. Ma’kadami Saul lako Daud, nakua: Attu iate ma’penduannamoko la kupomanintu, ke mupasiolai.
22Ma’kadami Saul lako tu mai to mase’ponna, nakua: Pokadan bunii Daud, kumua: Nakalo’moko penaanna datu sia mintu’ to mase’ponna umporaiko; melo ke mupasituru’mi tu la napomanintu datu.
23Nabisikkimi mintu’ to mase’ponna Saul tu Daud umparampoi tu mintu’ kada iato; apa mebali tu Daud nakua: Misangaraka maraa tu napomanintu datu, anna aku te to makario-rio sia to bitti’?
24Naparampomi to mase’ponna tu kada iato lako kalena, nakua: Iatu kada susito napebaliimo Daud.
25Ma’kadami Saul nakua: Pokadanni Daud te kada iate: Tae’ nakabarii bangi datu tu somba, podo ke kuli’ salepe’ kamuaneanna dukato Filistin saratu’ kumua anna papakkanni tu mai ualinna datu. Belanna natangnga’ Saul, kumua anna sanggangi to Filistin tu Daud.
26Naparampomi to mase’ponna datu tu kada iate lako Daud; napasituru’mi Daud tu la napomanintu datu.
27Iatonna tae’pa nalambi’i atunna, ke’de’mi tu Daud sola taunna, anna patei tu muane to Filistin dua ratu’, anna baai Daud tu mai kuli’ salepe’ kamuaneanna tau iato mai, namale tau umpennoloanni lako datu ganna’ bilanganna, kumua anna pomanintui datu. Naelorammi Saul tu Mikhal, anakna napobaine Daud.
28Susimoto nanii Saul ungkanassai sia unnissanni, kumua Narondong PUANG tu Daud. Iatu Mikhal, anakna Saul ungkamali’ Daud.
29Iamoto nasamataku’-taku’na pissan tu Saul lako Daud. Naurungan napouali Saul tu Daud lan mintu’ katuoanna.
30Ianna tassu’ tu mintu’ datu to Filistin, ke tassu’oi tu tau iato mai, inang Daud tu mandu maupa’ na iatu mintu’ taunna Saul, naurungan mandu dipakala’bi’ tu sanganna.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel