Kamallaianna Daud, belanna la nasanggangi Saul
1Ma’kadami Saul lako Yonatan, anakna, sia lako mintu’ to mase’ponna, kumua la umpatei Daud, apa iatu Yonatan, anakna Saul, siala tongan penaanna Daud.
2Nakuami Yonatan lako Daud: Iatu ambe’ku Saul morai la umpongkoko; manikale’ kainga’i tu kalemu, maleko lako kabunianna, ammu membuni dio.
3Kutassu’mora, angku bendan dio sa’dena ambe’ku dio padang, tu muninna, angku sipa’kada-kadamora ambe’ku diona a’gammu, la untiroi tumbai tu apa dadi, angku pokadangko.
4Napokada melomi Yonatan tu diona Daud lako Saul, ambe’na, nakua: Da mipogau’ kakadakean lako Daud, kaunanmi, belanna tang umpogau’ kadake lako puangku, sangadinna iatu napogau’na kapua gai’na lako puangku.
5Belanna tae’ nadampangi tu sunga’na tonna patei tu to Filistin sia Napaden PUANG tu kadilendokan kapua lako mintu’ to Israel. Mitiromo tu iannato ammi poparannui. Apa bannangna ammi la umpogau’ra kasalan lako rara tang sala sia la umpatei Daud natae’ silalanna?
6Naperangiimi Saul tu kadanna Yonatan, anna umpalao sumpa, nakua: La lelukraka tuoNa PUANG, nala dipateira.
7Natambaimi Yonatan tu Daud, napokadanni mintu’ tu kada iato, anna solanni tu Daud lako Saul, anna pennoloi tu datu susi biasanna.
8Undinna pole’oto dadiomi kasirarian, natassu’ tu Daud sirari to Filistin, natalo kapuai tu tau iato mai, naurungan simallaian dio mai tingayona.
9Ta’kala natamaimi penaa kadake dio mai PUANG tu Saul tonna marassan unnisung lan tongkonan layukna sitoe doke na iatu Daud undedek katapinna.
10Natobami Saul urrokki dokena tu Daud, kumua napasilinda’i rinding, apa nalempean Daud tu pangrokna Saul, naurungan tipentana’ tu dokena lako rinding. Anna mallai tu Daud ullussuran kalena tonna bongi iato.
11Nasuami Saul tu ba’tu pira-pira tau lako banuanna Daud, la ungkampai anna patei, ke masiangi dio mai; napaissannimi Mikhal, bainena Daud, tu apa iato lako Daud, nakua: Iake tae’i nabongi ia bangsiamote mulussuran kalemu, manassa masiang ammu dipatei.
12Narorro’mi Mikhal tu Daud lan mai pentiroan banuanna, anna mallai ullussuran kalena.
13Naalami Mikhal tu balo’ tau, napatorroi dao inan mamma’na, nakulambui bulu bembe’ tu pennuluanna, anna samboi parramba’.
14Iatonna suai Saul tu tau male unnala Daud, nakuami Mikhal: Masaki.
15Nasua pole’omi Saul tu tau male untiro Daud, nakuami: Baai dio mai sola inan mamma’na, angku patei.
16Iatonna rampomo tu to disua, mangngami, belanna den balo’ tau lan inan mamma’na sia kulambu bulu bembe’ dao pennuluanna.
17Ma’kadami Saul lako Mikhal: Ma’apai ammu pakenana’ susite sia mueloran tu ualingku male, naurunganni lussu’? Nakuami Mikhal lako Saul: Nakua ungkuanna’: Eloranna’ male, iake tae’i kupateiko.
18Susito mallaimi lussu’ tu Daud anna rampo lako Samuel dio Rama, napokadanni tu mintu’ apa nagauranni Saul. Malemi sola Samuel natorro sola duai dio Nayot.
19Naparampomi tau lako Saul, kumua: Iatu Daud torromo dio Nayot sikandappi’ Rama.
20Nasuami Saul tu ba’tu pira-pira tau male unnala Daud dio mai. Iatonna rampomo tu tau iato mai, natiromi tu kasirampunan nabi, marassan tiakka’ penaanna ma’nubua’, na Samuel bendan umpangului. Narampoimi PenaanNa Puang Matua tu mintu’ pesuanna Saul, naurungan tau iato mai tiakka’ duka penaanna ma’nubua’.
21Naparampomi tau lako Saul tu iannato, anna suai ba’tu pira-pira to senga’, apa tiakka’ duka penaanna ma’nubua’. Nasua pole’omi tu ba’tu pira-pira tau tonna ma’pentallunnamo, apa tau iato mai tiakka’ duka penaanna ma’nubua’.
22Mangkato male kalenami tu Saul lako Rama; iatonna rampo lako bubun kapua dio Sekhu, mekutanami nakua: Umbara nanii tu Samuel sola Daud? Mebalimi tau nakua: Dio Nayot sikandappi’ Rama.
23Malemi tu Saul ma’palulako Nayot, sikandappi’ Rama, Narampoi dukami PenaanNa Puang Matua tu Saul naurunganni marassan lumingka, natiakka’mo penaanna ma’nubua’ sae lako rampona dio Nayot, sikandappi’ Rama.
24Nalossokan dukami tu pakeanna. Sia ia dukamo tiakka’ penaanna ma’nubua’ dio tingayona Samuel. Sia sangallo sangbongi bang tang ma’tamangkale. Iamoto nakuami tu tau: Naala dukaraka bilangan nabi tu Saul?
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel