Pa’pudi-pudianna Hana
1Massambayangmi tu Hana, nakua: Iatu penaangku sende-sende angku kumalasi diona PUANG, sia dipataranggamo tu tandukku tete dio PUANG, sia tibungka’mo tu pudukku umbali mintu’ ualingku, belanna kupoparannumo tu kasalamaran lu dio mai Kalemi.
2Moi misa’ tau tae’ namasero susi PUANG, sia tae’ misa’ tu kapenomban senga’ sangadinna Kamu manna, sia tae’ tu buntu batu susi Kapenombangki.
3Da mitarru’ ma’kada layuk, dan nasun tu kada matampo dio pudukmi. Belanna iatu PUANG mandu paissan sia mintu’ penggauran Nasudi.
4Iatu panana to lalong dile’to-le’to, apa iatu to tilende’ umpotambeke’ kamatotoran.
5Iatu to dia’ undaka’ saroan kande unnappa’ kande, anna iatu to tangdia’ ma’din melayo. Iatu to tamanang la kianak sae lako pempitu, anna iatu to makianakan la madodong bangmo.
6PUANG tu ma’pamate sia ma’patuo; Puang tu ma’parokko lino to mate sia ma’pakendek sule.
7PUANG tu ma’pabongko sia ma’pasugi’. Puang tu ma’pamadiongan sia Ia duka tu ma’pamatande.
8Iatu mai to bongko Naendekan diong mai to’ barra’-barra’, sia iatu mai to mase-mase Naangka’ diong mai to’ pullan, kumua anNa pasangisunganni mintu’ arung, sia Napatongkon dao o’koran mala’bi’. Belanna mintu’ tu parandangan lino PUANG umpoissanni; sia Ia umbangunni dao te lino.
9Ia ungkaritutui tu lentekna mintu’ pa’kaboro’Na, apa mintu’ to tang mekaaluk la sabu’ lan kamalillinan, belanna tae’ natete dio kamatotoranna tu misa’ muane pasau’.
10Minda-minda sigaga PUANG, la disanggang; la gumaluntu’ tu Puang lako kalena dao mai langi’. PUANG umpaolai salu tu mintu’ randan langi’, Ia la ungkamaseanni kamawatangan tu datunNa, sia la umpataranggai tandukna tu to Natokko.
Diona gau’ kadakena anakna Eli
11Mangkato, sulemi tu Elkana lako banuanna dio Rama, apa iatu pia iato torro umpogau’ toena lako PUANG napatudu to minaa Eli.
12Iatu mai anakna muane Eli sala’ kedo, tae’ nadampangi tu PUANG sia iatu katongananna sia taana to minaa, ke to buda sae memala’.
13Iake denni tau la sae memala’, iamoto ke marassanpi tu duku’ ditollo’, saemi tu to mengkarangna to minaa untangke petossok tallu matanna.
14Natossok-tossokmi lan kurin ba’tu panti ba’tu pamuntu ba’tu kurin pantolloran; umbanna tu kendek naala petossok, iamo naalan kalena to minaa. Susimo gau’na to lako mintu’ to Israel tu sae dio Silo.
15Ia duka ke tae’pi naditunu tu lompo dipemalaran, saemi tu to mengkarangna to minaa anna ma’kada lako tu mai to memala’, nakua: Benni to minaa te duku’ iate anna digorengan, belanna manoka untarimai dio mai kalemi tu duku’ manasu, sangadinna duku’ mamatapi.
16Ianna bali tau, kumua: Da’ito anna ditunupa dolo tu lompona, mumane unnalai tu muporainna, mebalimi tu to mengkarang, nakua: Tae’ nasusi to, ben bangsiami totemo, iake tae’i, manassa kuala toro.
17Susimoto namandu kapua kasalanna tu to mangura da’dua dio oloNa PUANG, belanna tae’mo nadampangi tau tu kapemalaran lako PUANG.
18Apa iatu Samuel tontong umpogau’ toena dio oloNa PUANG; mangurapa ia sia ma’sambu’ lenang.
19Nagaragammi indo’na bayu lamba’bitti’, nabanni ke taunoi, ke malei sola muanena rekke la umpemalaran pemala’ pentaunan.
20Napassakkemi Eli tu Elkana sola duai ma’baine, nakua: Nakamaseimoroko PUANG bati’ dio mai baine iate la ussondai tu mangkanna disorong lako PUANG. Mangkato sulemi lako tondokna.
21Natontongi rupami PUANG tu Hana, anna ma’tambuk pole’, nadadian pia muane tallu anna baine da’dua. Iatu Samuel, pia iato, sakapua-puana torro dio oloNa PUANG.
22Iatu Eli tarru’ matuamo. Iatonna rangimi karebanna tu penggauranna anakna sola duai lako mintu’ to Israel sia kumua sangampa’i tu mintu’ baine mengkarang dio to’ ba’ba Tenda Kasitammuan,
23ma’kadami Eli lako, nakua: Ma’apari ammi pogau’ri tu apa susito, kuurunganni urrangi dio mai mintu’ tau te penggauran kadake iate?
24Da misusito, e anakku, belanna tae’ nakareba melo tu kurangi napatale’ taunNa PUANG.
25Iake misa’ tolino sala lako padanna tolino, manassa Napaolai salunna Puang Matua, apa iake tolino kasalan lako PUANG, mindapa la umpengkamoyanni? Apa tae’ naperangii tu kadanna ambe’na, belanna inang la Napateimo PUANG sola duai.
26Iatu Samuel, to mangura iato, sakapua-puana, sanaala-alanna penaanNa PUANG sia tolino.
Pa’nubua’ diona Eli sia to lan banuanna
27Saemi misa’ taunNa Puang Matua lako Eli anna ma’kada, nakua: Susite tu kadanNa PUANG: Tae’raka nalako to lan banuanna ambe’mu Kunii umpaombo’ Kaleku, tonna diopa lu Mesir tu tau iato mai mengkanorong lako Firaun?
28Kutonnorammo Kaleku dio lu mintu’ suku to Israel la dadi to minaa, kumua anna kendek langngan inan pemalarangKu, sia la untunu dupa sia umpake epo’ dio oloKu, sia lako to lan banuanna ambe’mu Kubenmo tu mintu’ pemala’ ditununna to Israel.
29Ma’apai natae’ mudampangi tu pemala’ sia kande dipemalaran lako Kaleku, tu Kupepasanan la dipaden lan banuangKu, sia mupakala’bi’i tu anakmu losong na Aku, sia mipemalompoan kalemi tu mammi’na mintu’ kande napemalaran to Israel, taungKu.
30Iamoto Nama’kada tu PUANG, Kapenombanna to Israel. Nakua: Iatu kadangKu dolona masero, kumua iatu bati’mu sia bati’na ambe’mu la lolang dio oloKu sae lakona, apa totemo Nakua kadanNa PUANG: Mambelamo tu iannato dio mai Kaleku, belanna minda-minda umpakala’bi’Na’, la Kupakala’bi’ duka, apa minda-minda tu ussayuNa’, la dipamatuna.
31Tonganna la sae tu allona angKu sembangi tu takia’mu sia takia’na to lan banuanna ambe’mu, naurungan moi misa’ to matua tae’mo lan banuammu.
32Launtiroko kamaparrisan dio banuangKu moi anNa padenanni Puang ma’rupa-rupa karongkosan tu to Israel, sia iatu mai to matua la tae’ lan banuammu sae lakona.
33Iake denpi dio mai bati’mu tu tae’ Kusabu’i dio to’ inan pemalarangKu, iamo la umpamaru’gun matammu sia umpabuyu’ penaanmu sia mintu’ tu to umpopemba’ka’ bati’mu la mate malolle’.
34Iamote tu la dadi tanda lako kalemu, iamotu la urrampoi anakmu sola duai, Hofni na Pinehas: la sangallori mate sola duai.
35La Kupadenan Kaleku tu misa’ to minaa manappa’ sia iamo la umpogau’i tu apa lan penaangKu sia lan tangnga’Ku; Aku la umpabendananni misa’ banua matontongan sia tontong la lolang dio olona to Kutokko.
36La dadi undinna kumua minda-minda tu torronapa lan banuammu, la sae anna tukku menomba lako kalena umpalaku doi’ sangbatu salaka ba’tu roti sangbatu, anna ma’kada nakua: Popengkarangna’ dikka’ lan misa’ pengkarangan katominaan, angku ma’din ungkande roti sangsuakan.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel