Saul umpellambi’i baine pakita-kita dio En-Dor
1Attu iato narampunmi to Filistin tu mintu’ surodadunna la parari ullaoi to Israel. Nakuami Akhis lako Daud: La muissan kumua inang la tassu’ki’ sola surodadu iato la iko, la iatu taummu.
2Mebalimi Daud lako Akhis, nakua: Nanassa la mitiro sia tu apa la kupogau’. Nakuami Akhis lako Daud: Iamoto angku angka’ko ammu tontong umpenniroi kaleku.
3Iatu Samuel matemo namintu’ to Israel ma’pote dibolong, anna lamunni dio Rama, tondokna. Naali’mi Saul lan mai tondok tu mintu’ to sola-sola bombo sia mintu’ to pakita-kita.
4Saemi tu to Filistin sirampun anna pabendanni tu tendana dio Sunem. Narampunmi Saul tu mintu’ to Israel, anna pabendanni tu tendana dao Gilboa.
5Iatonna tiromi Saul tu surodadu to Filistin, mataku’mi sia lendu’ ma’parondona penaanna.
6Mekutanami tu Saul lako PUANG, apa tang Napebalii PUANG, la tete dio pangimpi, ba’tu Urim, ba’tu nabi.
7Ma’kadami Saul lako taunna, nakua: Dakaranna’ misa’ baine pakita bombo, angku nii lao umpalaku pa’timbangan. Nakuami tu taunna lako: Dio En-Dor den misa’ baine pakita bombo.
8Umbalilimi kalena tu Saul sia nasondai tu pakeanna, anna male sola tau da’dua, anna rampo sola tallui lako baine iato tonna bongi; anna ma’kada Saul, nakua: Tiro-tiroanna’ lalan tete dio bombo to mate, sia pamalimbangunanna’ tu to kupokadangko.
9Mebalimi tu baine iato lako, nakua: Inang miissanmo tu penggauranna Saul, umba nakua ussabu’i tu to pakita bombo sia to pakita-kita lan tondok iate. Totemo ma’apai ammi tananni poya tu penaangku la umpateina’?
10Umpalaomi sumpa tu Saul lako tete dio sanganNa PUANG, nakua: La lelukraka tuoNa PUANG, nala urrampoiko kamasussan belanna apa iate.
11Ma’kadami tu baine iato nakua: Mindara tu la kupamalimbangunangkomi? Mebalimi nakua: Pamalimbangunanna’ Samuel.
12Iatonna tiromi baine iato tu Samuel, melallakmi umpekapuai gamaranna, nakua lako Saul: Ma’apai ammi pakenana’, belanna kamu te Saul bangsiamo.
13Ma’kadami datu lako, nakua: Da mumataku’. Apa tu mutiro? Ma’kadami tu baine lako Saul, nakua: Kutiro den tu apa susi deata kendek diong mai padang.
14Nakuami lako: Matumbai rupanna? Mebalimi tu baine iato: Iatu to kendek diong mai, misa’ to matua muane umpennammu’ paramba’. Iatonna issanmi Saul kumua iamo Samuel to, tukkumi sae rokko padang anna menomba.
15Nakuami Samuel lako Saul: Ma’apai mirosona’ sia mipamalimbangunna’? Nakuami Saul: Pussak maro’mo’, belanna sirarimo’ to Filistin na iatu Puang Matua toyangmo dio mai kaleku, tae’mo Napebaliina’, la tete dio pudukna nabi ba’tu tindo; iamoto angku tambaikomi, ammi pokadanna’ apa tu sipatu la kupogau’.
16Nakuami Samuel: Ma’apai mikutanaina’, Natoyangmo tu PUANG dio mai kalemi sia siualimokomi?
17Napogau’mo PUANG tu apa Napokada tete dio pudukku pirambongi’, anNa sintakki tu kadatuan dio mai kalemi, Nasoronganni to mase’ponmi, iamotu Daud.
18Belanna tae’ mituru’i tu kadanNa PUANG sia tae’ mipalaloi tu kasengkean maparrangna lako to Amalek, iamoto Naparampoikomi PUANG allo totemo, te iannate.
19Sia PUANG la ussorongkomi sola to Israel lako to Filistin sia masiang iatu kamu sola tu mai anakmi muane la indemo te inan kunii, sia la Nasorong PUANG tu surodadu to Israel lako to Filistin.
20Pakalan songkami tu Saul sumpandan diong padang, belanna iatu kadanna Samuel napotiramban tongan. Sia tae’mo tu kamatotoranna, belanna sangallo sangbongimo tae’ apa nakande.
21Saemi tu baine iato urreke’ Saul; tonna tiroi tu datu lendu’ tirambanna, nakuami: Aku te, kaunanmi, kuturu’mo tu kadanna puangku; kupopa’elo’na tu penaangku, angku turu’i tu kadammi tu mipokadanna’.
22Melo duka ke naturu’i puangku tu kadanna kaunanmi; iamoto la kupalennarangkomi roti sidi’; la mikande ammi matoto’ sule lumingka.
23Apa manoka, nakuami: Tae’ angku la kumande. Nanaran-naranmi taunna sola baine iato tu datu, pakalan naturu’mi, anna malimbangun diong mai padang anna unno’ko’ dao inan mamma’.
24Denmi dio to’ banuanna tu baine iato misa’ anak sapi malompo madomi’mi narere’ sia naala tu ta’pung; nalemun-lemun anna tunui dadi pa’ranggina tang diragii.
25Napalennaranni Saul sola taunna; kumandemi tu tau iato. Mangkato ke’de’mi sola tallui anna male to bongi ia dukato.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel