PattinNa Puang Matua dio tondok Filistin
1Naalami to Filistin tu pattinNa Puang Matua, nabaai dio mai Eben-Haezer lako Asdod.
2Naalami to Filistin tu pattinNa Puang Matua, nabaai tama banuanna Dagon, napatorroi dio sa’dena Dagon.
3Apa iatonna melambi’ dio mai namillik tu to Asdod, natiromi tu Dagon songkamo tipessussuk tu lindona rokko padang dio olona pattinNa PUANG. Naangka’mi tu Dagon, napabendan pole’i dio inanna.
4Iatonna melambi’ dio mai millikmi tu tau iato mai, oo!, songka pole’omo tu Dagon tipessussuk tu lindona rokko padang dio olona pattinNa PUANG, apa iatu ulunna sia limanna patomali tantang tipelleba’ lako to’ ampang ba’ba, nakalena mannamo Dagon torro siapa.
5Iamo bannangnato anna mintu’ to minaanna Dagon sia mintu’ tau, tu mentama banua kamenombanna Dagon, tang ullesemo ampang ba’ba banuanna Dagon dio Asdod sae lako allo iate.
6Napamatana’ PUANG tu limanNa unti’tin to Asdod Napatirambanmi tu tau iato mai anNa pasitutu’i bundang, la to Asdod la iatu mintu’ lili’na.
7Iatonna tiromi to Asdod diona apa urrampoi, nakuami: Iatu pattinNa Puang Matua to Israel da’imi to tapatorroi, belanna Napamatana’mo Puang tu limanNa unti’tinki’ sola Dagon deatanta.
8Iamoto anna ditambai ma’kombongan tu mintu’ arung kota to Filistin, anna ma’kada nakua: La tapatumbai tu pattinNa Kapenombanna to Israel? Mebalimi tu mintu’ arung nakua: Melo ke dipalelei tu pattinNa Kapenombanna to Israel, lako tondok Gat. Napalelemi tu pattinNa Kapenombanna to Israel.
9Iatonna dipalelemo inde to lako, Napata’paimi lima PUANG tu pa’tondokan iato naurunganni marukka. Napa’dikkimi tu mai muane randuk dio mai bitti’na sae lako kapuanna, anna karupui kele tu kalena.
10Napalelemi tau iato mai tu pattinNa Puang Matua lako Ekron, apa iatonna rampo tu pattinNa Puang Matua lako Ekron silallakan tu pa’tondokan dio Ekron, nakua: Nabaamo tu pattinNa Kapenombanna to Israel lako kaleta, la moraimo umpateiki’ sola sukunta.
11Ditambaimi ma’kombongan tu mintu’ arung kota to Filistin, anna ma’kada nakua: Pasuleammi tu pattinNa Kapenombanna to Israel lako inanna, da napa’pepateangki’ sola tu mai bangsata, belanna dadimo tu ra’ba biang dio lu tondok iato sia kamarukkan kapua, belanna Napamatana’mo Puang Matua to limanNa unti’tinni tu tau iato mai.
12Minda-minda tu tae’ namate, sileleo kelean, naurungan iatu sarrona pa’tondokan kendek langngan langi’.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel