Patti basse diala dio mai Kiryat-Yearim
1Sipa’kadami Daud tu mintu’ pangulu to sangsa’bu sia mintu’ pangulu to saratu’ sia mintu’ to la’bi’.
2Ma’kadami tu Daud lako mintu’ kombongan to Israel, nakua: Iake misangai melo nasituru’ pa’poraianNa PUANG, Kapenombanta, melo ke ussuaki’ pesua lako mintu’ inan, lako tu mai siulu’ tu torronapa lan mintu’ lili’na tondok Israel, sia lako to Lewi lan kota, tu nanii padang kariuanna, anna mintu’ tau iato sirampun lako kaleta.
3La tapalele tu pattinNa Kapenombanta lako tondokta, belanna tonna linona Saul tae’ tapoapa lenni.
4Nakuami tu mintu’ kombongan: Melo ke napogau’i tau susito, belanna nasanga melo mintu’ to buda.
5Narampunmi Daud tu mintu’ to Israel dio mai salu Sikhor dio Masir sae lako batatta lu lako Hamat, la unnalai tu pattinNa Puang Matua dio mai Kiryat-Yearim.
6Malemi tu Daud sola mintu’ to Israel lako Baala, iamotu Kiryat-Yearim, tu naala lili’na Yehuda, la umbaai inde to dio mai tu pattinNa Puang Matua, Iamo PUANG, tu unnisung dao karubion, iamotu patti, dinii ussa’bu’ Sanga iato.
7Nabaami tu pattinNa Puang Matua, napadao misa’ kareta ba’ru lan mai banuanna Abinadab, namale Uza sola Ahyo umbaai tu kareta iato.
8Iatu Daud sola mintu’ to Israel ma’marua’-rua’ tongan unnondo dio oloNa Puang Matua napasiala nanian sia to umpannoni katapi, dandi, ganda’-ganda’, taa’-taa’ sia tarompe’.
9Iatonna rampomo tu tau iato lako to’ panglulluranna Kidon nadoloammi Uza la untoei tu patti, belanna tilende’ tu sapinna.
10Re’dekmi tu ara’Na PUANG lako Uza Napongkoi, belanna la natoe tu patti; matemi inde to dio oloNa Puang Matua.
11Magiangmi tu penaanna Daud, belanna Nasanggang maro’ PUANG susito tu Uza; iamoto nasangai tau tu inan iato Perez-Uza sae lako allo iate.
12Allo iato mataku’mi tu Daud lako Puang Matua, anna ma’kada nakua: Umba kupakuanni, da kuparampoi tu pattinNa Puang Matua lako kaleku?
13Iamoto natae’ nabaai Daud tu patti iato tama kotana Daud, sangadinna napalendu’ tama banuanna Obed-Edom, to Gat.
14Iatu pattinNa Puang Matua torro tallung bulan sola to nakurinni Obed-Edom, lan banuanna; Napamasakke-sakkemi PUANG tu to lan banuanna Obed-Edom sola mintu’ barang apanna.
<< 1 Tawarikh 13 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel