Diona tongkonan layukna sia to lan banuanna Daud
1Iatu Hiram, datu Tirus, ussua sumbungan pudukna lako Daud umbaa kayu arasi’ sia ba’tu pira-pira pande batu sia pande kayu, anna pabendanan Daud misa’ tongkonan layuk.
2Iatonna iato naissanmi Daud, kumua Napamanda’mo PUANG undatui to Israel, belanna dipamala’bi’ tu kadatuanna diona taunNa, iamotu to Israel.
3Naalaomi Daud tu ba’tu pira-pira baine dio Yerusalem anna padadianomi ba’tu pira-pira pia muane sia baine.
4Inde sia tu sanganna mintu’ anak dipadadianni dio Yerusalem, iamotu: Syamua, Sobab, Natan, Salomo,
5Yibhar, Elisua, Elpelet,
6Nogah, Nefeg, Yafia,
7Elisama, Beelyada na Elifelet.
Daud untalo to Filistin
8Iatonna rangimi to Filistin tu kareba tu diona Daud ditokko undatui mintu’ to Israel, ke’de’mi tu mintu’ to Filistin male undaka’ Daud la natingkan. Iatonna rangimi Daud tu dionato, malemi umpentammui.
9Saemi tu to Filistin anna sikarangan dio rante Refaim.
10Mekutanami Daud lako Puang Matua, nakua: La malera’ka ullaoi tu to Filistin, sia la Misorongraka tama limangku? Mebalimi tu PUANG Nakua: Malemoko, la Kusorong tu tau iato mai tama kuasammu.
11Malemi tu tau iato mai lako Baal-Perasim; nataloi Daud inde to dio. Ma’kadami tu Daud nakua: Limangku Napoparea Naruang tangngai Puang Matua tu ualingku, susito uai ma’tu’ba’. Iamoto nasangai tau tu inan iato Baal-Perasim.
12Natampe dukami tau iato mai tu mintu’ rapang-rapang dipodeatanna inde to dio, anna pa’pesuanni Daud umballai api.
13Sae pole’omi tu to Filistin, anna sikarangan dio rante iato.
14Mekutanaomi Daud lako Puang Matua, anna ma’kada Puang Matua lako kalena Nakua: Da mulaoi dio mai boko’na; tigirikko, muurunganni ullaoi dio mai to’ garonto’ pinu’.
15Iake murangii tu oni butung to tumengka dao lolok pinu’, la maleoko sirari, belanna attu iato tassu’mo tu Puang Matua undoloangko, la untaloi tu surodadu to Filistin.
16Napogau’mi Daud susitu pepasanNa Puang Matua lako kalena; natalomi tu mintu’ to Filistin randuk dio mai Gibeon ma’palulako Gezer.
17Kaleleammi tu sanganna Daud lako mintu’ tondok, anNa pasaei PUANG tu katirambanan lan penaanna mintu’ bangsa ungkataku’ Daud.
<< 1 Tawarikh 14 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel