Alkitab Mobile SABDA
[VER] : [TORAJA]     [PL]  [PB] 
 <<  1 Tawarikh 15 >> 

Diona pattinNa Puang Matua dipalele lako Yerusalem

1Nagaragammi kalena Daud tu ba’tu pira-pira banua lan kotana Daud, napasakkarammi misa’ inan tu pattinNa Puang Matua anna pabendananni misa’ tenda.

2Attu iato nakuami Daud: Moi misa’ tau tae’ nama’din umbulle pattinNa Puang Matua sangadinna to Lewi, belanna tau iato mai tu Natonno’ PUANG la umbulle pattinNa PUANG sia la umpengkaolai sae lakona.

3Natambaimi Daud tu mintu’ to Israel ma’kombongan dio Yerusalem la umbaai tu pattinNa PUANG lako inan tu mangka napasakkaranni.

4Narampunmi Daud tu bati’na Harun sia to Lewi;

5iatu bati’na Kehat: iamotu Uriel, pangulu na mintu’ siulu’na, saratu’ duangpulo;

6bati’na Merari; Asaya, pangulu na mintu’ siulu’na, dua ratu’ duangpulo;

7bati’na Gerson: Yoël, pangulu na mintu’ siulu’na, saratu’ tallungpulo;

8bati’na Elsafan: Semaya, pangulu na mintu’ siulu’na, duaratu’;

9bati’na Hebron: Eliel, pangulu na mintu’ siulu’na, karua pulona;

10bati’na Uziel: Aminadab, pangulu na mintu’ siulu’na, saratu’ sangpulo dua.

11Natambaimi Daud tu to minaa Zadok na Abyatar, sia to Lewi, iamotu Uriel, Asaya, Yoël, Semaya, Eliel na Aminadab.

12Ma’kadami tu datu lako tau iato mai nakua: Iate kamu pangulunna mintu’ to Lewi, pamaseroi tu kalemi, la kamu la iatu mai siulu’mi, ammi ma’din umbaai tu pattinNa PUANG, Kapenombanna to Israel lako inan, tu kupasakkaranni.

13Belanna tae’ mipogau’i to, tonna dolona, iamoto Naparampoiki’ kamandasan kapua PUANG, Kapenombanta, belanna tae’ tapalaku pa’timbanganNa, susitu sipato’na.

14Iamoto anna pemaseroi kalena tu mintu’ to minaa sia to Lewi la umpalelei tu pattinNa PUANG, Kapenombanna to Israel.

15Napadaomi palempengna to Lewi tu bullean pattinNa Puang Matua, nabullei susitu napasan Musa situru’ kadanNa PUANG.

16Mesuami tu Daud lako mintu’ pangulunna to Lewi kumua anna popa’tibangi tu siulu’na, iamotu to menani umbaa oni-onian, dandi, katapi na taa’-taa’, la umpannoni tanda pa’maruasan kaparannuan.

17Napopa’tibangmi to Lewi tu Heman, anakna Yoël, sia dio mai siulu’na, iamotu Asaf, anakna Berekhya, sia iatu bati’na Merari siulu’na, iamotu Etan, anakna Kusaya;

18sia iatu nasolan tau iato mai iamotu mintu’ siulu’na untoe pangka’ ma’penduan, iamotu: Zakharia, Ben, Yaaziel, Semiramot, Yehiel, Uni, Eliab, Benaya, Maaseya, Matica, Elifele, Mikneya, Obed-Edom na Yeiel, to ma’kampa babangan.

19Iatu to menani Heman, Asaf na Etan dipamanassa umbaa taa’-taa’ tambaga la napannoni.

20Iatu Zakharia, Aziel, Semiramot, Yehiel, Uni, Eliab, Maaseya na Benaya dipamanassa umbaa dandi dipamadao oninna.

21Na iatu Matica, Elifele, Mikneya, Obed-Edom, Yeiel na Azazya dipamanassa umbaa katapi, dipasosso’ karua ton, la unnanta’i tu nanian.

22Iatu Kenanya, pangulunna to Lewi, umbandoro’i to umpalele patti; ia umpasirundunan to umpalele patti, belanna ia to manarang.

23Iatu Berekhya sola Elkana iamotu to ma’kampa babangan la ungkampai tu patti.

24Na iatu to minaa Sebanya, Yosafat, Netaneel, Amasai, Zakharia, Benaya na Eliezer umpannoni tarompe’ dio tingayo pattinNa Puang Matua; na Obed-Edom na Yehia iamotu to ma’kampa babangan la ungkampai tu patti.

25Attu iato malemi tu Daud, sia pekaamberanna to Israel na kamandangna to sangsa’bu ma’marua’-rua’ la umpalelei tu patti basseNa PUANG dio mai banuanna Obed-Edom.

26Sia Natundui Puang Matua tu to Lewi, tu umbulle patti basseNa PUANG, iamoto napemalaranni tau iato mai tu pitu sapi laki na pitu domba laki.

27Iatu Daud ma’bayu lamba’ lenang melo, susi duka tu mintu’ to Lewi, tu umbulle patti, to menani na Kenanya, tu umpangului to menani, tonna dipalele tu patti; na iatu Daud ma’bayu lenang.

28Iatu mintu’ to Israel umbaa patti basseNa PUANG unnarrak-arrak sia umpannoni napiri tanduk, tarompe’ na taa’-taa’, sia ma’dandi na ma’katapi.

29Iatonna rampomo tu patti basseNa PUANG lako kotana Daud, ta’kala mentiromi tu Mikhal anakna Saul, dao mai pentiroan banuanna, natiromi tu datu Daud tumbang-tumbang sia unnondo, nasayumi lan penaanna.



 <<  1 Tawarikh 15 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2020
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran