Passanan tengkona kaunan lako puangna
1Samami to naluang samban kakaunanan, la nasanga sipato’ tu puangna napangke’ lan mintu’na, kumua da anna ditelle tu sanganNa Puang Matua sia pangadaranNa.
2Iato to umpopuang to ma’patongan, da natunai tu belanna siulu’mo, sangadinna la samengkaola-olanna lako puangna, belanna ma’patongan tu puangna sia dipakaboro’, tu birisan umpogau’ kameloan. Susimo la muadaranni to sia la mupakilalanni.
Pa’pakatangkinna rasulu’ diona pangadaran ma’papusa
3Iake den tau umpa’pangadaran pangadaran senga’, tang unturu’ kada tongan, iamotu kadanNa Puangta Yesu Kristus, sia pangadaran situru’ kamengkaolan lako Puang Matua,
4tau iato matampo, natae’ apa naissan, sangadinna bomboan massita’gen sia massitamben kada, tu naninna bu’tu kamagallian, kasigagan, ma’rupa-rupa pa’palele beko sia pa’kapang-kapang kadake,
5iamo kasisakkan napabu’tu tu to tang ma’runduanan tangnga’na sia disabakkimo tu kamanapparan, tu ussangai kumua iatu kamengkaolan misa’ tangnga’ la dinii mesaro.
Pa’pakatangkinna rasulu’ diona kabasisi-inaan
6Iatu kamengkaolan tonganna kapua sarona, ke narondongi penaa manaman.
7Belanna moi misa’ apa tae’ tabaa tama te lino, iamoto dadi tae’ duka misa’ apa la tabaa tassu’ lan mai.
8Iake denni kande sia pakean dio kaleta, taposilasan bangmi.
9Apa iatu to ungkamorai la sugi’, tobang tama peroso sia poya sia buda kamaduangan baga sia umpabu’tu kamaparrisan tu umpatallan tolino tama kasanggangan sia kamasolangan.
10Belanna iatu kabasisi-inaan lako doi’, iamo garonto’na mintu’ kakadakean; na iatu to undaka’nai tu iannato, pusamo diona kapatonganan sia umpatamai bungin lassu kalena.
Pa’pakilala lako Timotius
11Apa iatu iko, taunNa Puang Matua, pallaiangko kalemu dio mai tu mintu’nato, sia tuntunni tu kamaloloan, kamengkaolan, kapatonganan, pa’kaboro’ kabattaran sia sorong inaa.
12Pembela-belai lan rari melona kapatonganan, pellambi’i tu katuoan matontongan, tu ditambammoko, sia mangkamoko unnaku pangakuan tongan dio tingayona buda sa’bi.
13Kupasan lako kalemu dio oloNa Puang Matua, tu umpatuo angge maritik sia dio oloNa Kristus Yesu tu ungkatottongi tu pangakuan tongan dio olona Pontius Pilatus.
14Ammu karitutui tu parenta tang la mupaattangan sia tang la mupasayuan sae lako kakitananNa tu Puangta Yesu Kristus.
15Iatu iannato ke attunnamo la Napa’pekitanan Puang ma’kada misa sia tang dilambi’ karongkosanNa. Datunna mintu’ datu sia Puangna mintu’ pekapuangan.
16Tu Ia manna unnampui tu tang mate, sia unnesungi arrang tang dirandan, tu tae’ lenpa tau untiroi ba’tu ma’din untiroi, na mintu’na kamala’biran sia kapaan matontongan lu lako nasang Kalena! Amin.
Pa’pakainga’ lako to sugi’
17Pakainga’i mintu’ to sugi’ lan te lino, kumua da anna pamadao penaanna, sia da narannuanni tu kasugiran tae’ natontong, sangadinna langnganri Puang Matua, tu umpalempan mintu’ apa Napa’kamasean lako kaleta, taangkaran parannui.
18Anna ma’gau melo sia umposugi’ penggauran melo, sia masokan, sia naporai mantaa-taa,
19anna rampunanni kalena tu pong la napoparandangan, ke attu la sae, anna appa’i tu katuoan tongan.
Ma’katampakanna pa’pakilala na pangando
20E Timotius, karitutui tu pangingko’ dipa’pekambiran lako kalemu, sia boko’i tu ulelean punala bang sia tae’ gai’na sia kasita’genan ussita’genni kapaissanan tang pato’ disanga kapaissanan;
21denmo tau pira unnakui, anna pusa dio mai kapatonganan. Narondongmorokomi pa’kamaseanNa Puang Matua.
<< 1 Timotius 6 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel