Alkitab Mobile SABDA
[VER] : [TORAJA]     [PL]  [PB] 
 <<  2 Samuel 11 >> 

Gau’ kadakena Daud sola Batsyeba

1Tonna tituka’mo pentaunan, tu biasa nanii datu tassu’, nasuami Daud tu Yoab sia mintu’ surodadunna sia mintu’ to Israel male ussanggang to Amon sia umpatama limbu tondok Raba. Apa iatu Daud torro dio Yerusalem.

2Den pissan tonna la makaroenmo millikmi tu Daud diong mai katindoanna, anna sumalong-malong dao bubungan tongkonan layukna; ta’kala natiromi dao mai bubungan iato tu misa’ baine marassan mendio’; iatu baine iato lendu’ ia melona pantarisanna.

3Mesuami Daud umpekutananni tu a’ganna baine iato, anna kuai tau: Iamote tu Batsyeba, anakna Eliam, bainena Uria, to Het.

4Nasuami Daud tu tau male untambai, iatonna tamamo mennolo lako datu, sangampa’mi datu; – iatu baine iato lendu’mo kausseroianna kalena dio mai kanalambiranna bulanna. – Mangkato sulemi tu baine iato lako banuanna.

5Ma’tambukmi anna mesua umpokadanni Daud, nakua: Iatu aku ma’tambukmo’.

6Iamoto nasuai Daud tu tau male lako Yoab, nakua: Suai Tu Uria, to Het, sae lako kaleku. Nasuami Yoab tu Uria male mennolo lako Daud.

7Iatonna rampomo tu Uria lako kalena, mekutanami Daud tu diona kamalaga’-lagaranna Yoab sia kamalaga’-lagaranna mintu’ tu surodadu sia umba nakua tu diona rari iato.

8Mangkato nakuami Daud lako Uria: Mengkalaomoko ammu sule lako banuammu sia basei tu lette’mu. Iatonna tassu’mo tu Uria lan mai tongkonan layukna datu, undimi tau umbanni tu pamenganna datu.

9Apa mamma’ bang tu Uria dio tingayo ba’ba tongkonan layukna datu sola mintu’ taunna datu’; tae’ namengkalao sule lako banuanna.

10Napokadami tau lako Daud, nakua: Tae’ nasule lako banuanna tu Uria. Nakuami Daud lako Uria: Tang mane saerokoka dio mai kalingkammu? Ma’apai natae’ mumengkalao sule lako banuammu?

11Mebalimi Uria lako Daud nakua: Iatu patti sia mintu’ to Israel sia to Yehuda torro lan lu tenda sia puangku Yoab sia mintu’ surodadunna puangku mamma’ bang dio lu padang; matumbai kula tama banuangku la kumande sia mangiru’ sia mamma’ sola baineku? La lelukraka tuona puangku sia la leluk dukaraka tuona deatanna puangku, la toyang ia dio mai kaleku la umpogau’i tu susinna to!

12Ma’kadami Daud lako Uria, nakua: Melo ke torropoko inde te allo iate, masiangpa kumane ussuako sule. Torromi tu Uria dio Yerusalem to allo iato sia masiangna.

13Natoratumi Daud, nakumande sia mangiru’ dio olona datu, napemalangoi datu, anna tassu’ tonna bongi mamma’ dio inanna sola mintu’ taunna datu, apa tae’ namengkalao sule lako banuanna.

14Iatonna melambi’ nasura’mi Daud tu misa’ sura’ napakatuan Yoab, nabaai Uria.

15Sia nasura’ lan sura’ iato, nakua: La mupadio patu surodadu tu Uria dio to’naninna rari maparrang, ammu sorong boko’ dio mai, anna ruai namate.

16Dadimi susito; iatonna marassan tu Yoab umpatama limbui tu tondok, napadiomi tu Uria dio to’ inan tu naissanmo kumua buda tau lalong dio.

17Iatonna tassu’mo tu pa’tondokan anna sirari Yoab, tibambang mate ba’tu pira-pira tau, iamotu surodadunna Daud, sia iatu Uria, to Het, mate duka.

18Nasuami Yoab tu tau male umpokadanni Daud tu diona kasirarian.

19Nakuami ungkuanni tu pesua: Iake mangkami mupokada nasang tu mintu’ lalanna kasirarian lako datu,

20sia iake sengkei tu datu attu iato lako kalemu, kumua: Ma’apai ammi ruku’ maro’i lako tu kota iato la parari? Tae’raka miissanni kumua inang ma’pana tu tau dao mai benteng tembo’?

21Mindara umpatei tonnanu’ tu Abimelekh, anakna Yerubeset? Tang baineraka misa’ umpapa’nakki batu pangrissoan daona lu dao mai benteng tembo’, naurunganni mate dio Tebes? Ma’apai ammi reke’ maro’i susito tu benteng? La mikua mebali: Iatu taunta Uria, to Het, mate dukamo.

22Malemi tu pesua; iatonna rampomo lako, napokadammi Daud tu mintu’ kareba tu napasan Yoab lako kalena.

23Sia ma’kada tu pesua iato lako Daud nakua: Iatu tau iato mai mandu matoto’ na kami sia tassu’ unnula’kan lako padang. Apa kirussun sule sae lako to’ babangan.

24Attu iato mintu’ to ma’pana umpanakan dao mai benteng naurungan mate ba’tu pira-pira tu taunna puangku sia ia duka tu taummi Uria, to Het, matemo.

25Nakuami Daud lako tu pesua: Pokadai te lako Yoab, kumua: Da mutarru’ umpomasussai te apa iate, belanna mangkaoi susite, mangkaoi ten to tu kandean pa’dang. La mupamasarrang tu kaparariammu ullaoi tu tondok iato ammu sanggangi. Susimoto la munii umpabatta’i tu penaanna Yoab.

26Iatonna rangimi bainena Uria tu diona muanena matemo, napassanda bolongammi.

27Iatonna ganna’mo tu mintu’ allo pa’pote dibolongna, nasuami Daud umbaai tama tongkonan layukna, napobainei, anna padadianni baine iato misa’ pia muane. Apa iatu apa napogau’ Daud kadake dio pentiroNa PUANG.



 <<  2 Samuel 11 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel