Peada’na Natan lako Daud sia pengkatobaranna Daud
1Nasuami PUANG tu Natan male mennolo lako Daud. Malemi mennolo lako datu anna ma’kada nakua: Lan misa’ kota anu den da’dua tau, misa’ sugi’ na misa’ bongko.
2Iatu sugi’na unnampui bu’dak domba sia bembe’ sola sapi.
3Apa ia tinde to bongko tae’ apanna sangadinna misa’ri anak domba tu naalli sia napanu’du sakapuana dio kalena sola mintu’ anakna. Iatu anak domba iato ungkande kandena sia mangiru’ lan mai irusanna sia mamma’ diong rianna sia butung to kumua anakna baine.
4Ta’kala katoratuammi tu to sugi’ iato; tang namaseammi penaa unnalai tu domba sia sapi kalena la natoratuanni tu to lumio’ lendu lako kalena, sangadinna naala tu anak domba to bongko iato, natoratuanni tu to lendu’ lako kalena.
5Lendu’mi re’dekna ara’na Daud lako tau iato, anna ma’kada lako Natan, nakua: La lelukraka tuoNa PUANG, iatu to mangka umpogau’i to, la mate dipatei.
6Manassa la nasondai tu anak domba iato penna’pa manglokkon, belanna umpogau’ apa iato sia belanna tae’ natandai kamaturu-turuan.
7Nakuami Natan lako Daud: Puangku bang siamo tu tau iato! Susite tu kadanNa PUANG, Kapenombanna to Israel: Mangkamoko Kutokko dadi datunna to Israel sia Kurampanangko lan mai limanna Saul.
8Sia mintu’ tu to lan tongkonan layukna puangmu Kukamaseangko, susi dukato tu mintu’ bainena puangmu la rokko riammu, ondongpi Kukamaseangko tu mintu’ nalili’ Israel sia Yehuda; – iake tae’pi naganna’ tu mintu’nato, manassa la Kurangannipa apa-apa tu muporai.
9Ma’apai ammu tapa’ bangi tu kadanNa PUANG, ammu pogau’i tu apa kadake dio pentiroNa? Mupesuan umpatei pa’dang tu Uria, to Het, ammu pobainei tu bainena, sia kalena mupatei pa’dangna to Amon!
10Iamoto iatu pa’dang tae’ nala toyang dio mai to lan banuammu tontong sae lakona, belanna mutunaiNa’ sia muala tu bainena Uria, to Het, mupobaine.
11Sia nakuapa tu kadanNa PUANG Nakua: La Kuparampoiko kakadakean lan mai tongkonan layukmu sia la mutiro Kualai tu bainemu Kubenni solamu, anna sangampa’ dio to’ masiangna.
12Iatu apa iato mupogau’ buni, apa la Kupogau’ te iannate dio tingayona mintu’ to Israel sia dio to’ masiangna.
13Nakuami Daud lako Natan: Kasalammo’ lako PUANG. Nakuami Natan lako Daud: Napa’deimo PUANG tu kasalammi, kumua da mimate.
14Apa belanna kamu napobannang tu mintu’ ualinNa PUANG ma’kada solang iatu pia muane tu dipadadiangkomi, manassa la mate.
15Mangkato, sulemi tu Natan lako banuanna, Napasaemi PUANG misa’ kasanggangan lako tu pia napadadian Daud bainena Uria, naurunganni masaki kapua.
16Mengkamoyami tu Daud lako Puang Matua tu diona pia iato sia ma’puasa sia mamma’ diong padang situ’turan bongi.
17Mintu’ tu to matua mase’ponna lan tongkonan layukna male la umpamillik datu diong mai padang, apa manoka sia manoka tu datu kumande sola.
18Iatonna ma’pitung-allomo matemi tu pia iato. Mataku’mi tu mintu’ taunna Daud umpokadanni tu diona tinde pia, kumua matemo, belanna nakua tu tau iato mai: Iatonna tuopa tinde pia, ianta ma’kada lako datu, tae’ namorai umperangii tu kadanta; anna umbamo la takua umpokadanni, kumua matemo tinde pia? Umpaden ia manii kakadakean.
19Iatonna tiromi Daud pada sibisik-bisik tu taunna, naissanmi tu diona pia iato kumua matemo. Iamoto anna ma’kada tu Daud lako taunna, nakua: Matemoraka tu pia? Mebalimi tu tau iato mai, nakua: Matemo, puang.
20Millikmi tu Daud diong mai padang, anna mendio’ sia umpake minna’ busarungngu’ sia ussondai pakeanna; mangkato tamami banuanNa PUANG anna menomba; namane sule lako tongkonan layukna, namesua umpasakkaranni kande, anna kumande.
21Attu iato ma’kadami tu mintu’ taunna lako, nakua: Umbara nakua te gau’mi? Iatonna tuopa tu pia ma’puasa sia tumangi’komi; iatonna matemo tu pia, malimbangunmokomi ammi kumande.
22Nakuami datu: Iamo kuma’puasa sia tumangi’ tonna tuo siapa tu pia, belanna kutangnga’, lan penaangku, kumua: Diisanraka, Nakamasei siana’ manii PUANG, anna tuo tu pia.
23Apa totemo matemo tu pia, apapa gai’ku la ma’puasa? Ma’dinraka la kuala pole’opa sule? Tonganna akumira la male lako, apa ia tae’mo nala sule lako kaleku.
24Mangkato napakatanami Daud tu Batsyeba, bainena, anna tama sitiro sia sangampa’, undinna to nadadianni tu muane misa’ sia nasangai Salomo; Nakamaseimi PUANG tu pia iato.
25Nasuami tu nabi Natan ussangai Yedija, belanna pa’poraianNa PUANG.
Ma’katampakanna kaditaloanna to Amon
26Naloimi Yoab tu tondok Raba to Amon, anna taloi tu kota datu.
27Nasuami Yoab tu ba’tu pira-pira pesua male mennolo lako Daud anna ma’kada: Mangkamo kulaoi tu Raba sia kutalomo tu kampong lili’na kota dio randan salu.
28Totemo la mirampun tu mintu’ surodadu torropa, ammi patama limbui tu kota iato, ammi taloi, da na aku untaloi sia da na aku sikona.
29Narampunmi Daud tu mintu’ surodadu, anna ke’de’ lako Raba, nalaoi tu tondok iato, anna taloi.
30Naalai tu makota dao mai ulunna datunna tau iato mai, sangtalenta tu bulaanna, diparimatai intan, anna pasongko’i tu Daud. Sia buda duka pangrampa nabaa datu lan mai tondok iato.
31Mintu’ tu to torro lan nabaa sun, napandanni diongna lu gare’ge’ sia diongna lu salaga bassi sia diongna lu uase bassi sia napesuan umpalelei lako to’ panglallangan batu. Susimo penggaurannato lako mintu’ tondok to Amon. Mangkato Sulemi tu Daud sola mintu’ surodadu lako Yerusalem.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel